މަދޫރޯއާ ގާތް ގުޅުމެއް އޮންނަ ވިޔަފާރި ވެރިޔާ ސާބް އެމެރިކާ އަށް ފޮނުވާލާފައިވާ ކަމަށް ވެނެޒުއެލާ އިން ހާމަ ކޮށްފި

ވެނެޒުއެލާގެ ކުރީގެ ރައީސް ނިކޮލަސް މަދޫރޯއާ ގާތް ގުޅުމެއް އޮންނަ، ކޮލްމްބިއާ-ވެނެޒުއެލާގެ ވިޔަފާރި ވެރިޔާ އެލެކްސް ސާބް އެމެރިކާ އަށް ފޮނުވާލާފައިވާ ކަމަށް ވެނެޒުއެލާ އިން ހާމަ ކޮށްފި އެވެ. 

ވެނެޒުއެލާގެ މައިގްރޭޝަން އިދާރާ، ސައިމް އިން މިކަން އިއުލާން ކޮށްފައި ވަނީ ހޮނހިރު ދުވަހު އެވެ. އެމެރިކާ އާއި ވެނެޒުއެލާގެ އިދާރާ ތަކުން ގުޅިގެން ކުރިއަށް ގެންދިޔަ އޮޕަރޭޝަނެއްގައި، މިއަހަރުގެ ފެބްރުވަރީ މަހުގެ ކުރީ ކޮޅު ވެނެޒުއެލާގެ ވެރި ރަށް ކަރަކަސް އިން ސާބް ހައްޔަރު ކޮށްފައިވާ ކަމަށް އެމެރިކާގެ ޤާނޫނު ތަންފީޒު ކުރާ އިދާރާއެއްގެ އޮފިޝަލަކު މީގެ ކުރިން ވަނީ ހާމަ ކޮށްފަ އެވެ.

ސާބް ހައްޔަރު ކޮށްފައި ވަނީ، އެމެރިކާ އިން ކުރިއަށް ގެންދިޔަ ޚާއްސަ އޮޕަރޭޝަނެއްގައި މަދޫރޯ ހައްޔަރު ކުރިތާ މަސް ދުވަސް ފަހުންނެވެ. ސާބް ހައްޔަރު ކުރުމަށް ފަހު އެމެރިކާ އަށް ފޮނުވާލުމުން ދައްކުވައި ދެނީ، ކުރީގެ ނައިބު ރައީސް އަދި މިހާރުގެ ވަގުތީ ރައީސާ ޑެލްސީ ރޮޑްރިގޭޒްގެ ދައުރުގައި އެމެރިކާ އާއި ވެނެޒުއެލާގެ ޤާނޫނު ތަންފީޒު ކުރާ އިދާރާތަކާ ދެމެދު އައު ގުޅުމެއް އޮތް ކަމެވެ. 

ކޮލަމްބިއާ އަށް އުފަން. އުމުރުން 54 އަހަރުގެ ސާބް މީގެ ކުރިން ކޭޑް ވާޑްގައި 2020 ވަނަ އަހަރު ވެސް ހައްޔަރު ކޮށްފައިވެ އެވެ. އެމެރިކާގައި އޭނާ ބަންދު ކޮށްފައި ބެހެއްޓީ ރިޝްވަތުގެ ތުހުމަތަކާ ގުޅިގެންނެވެ. އޭގެ ފަހުން 2023 ވަނަ އަހަރު ވެނެޒުއެލާގައި ބަންދު ކޮށްފައި ތިބި އެމެރިކާގެ ރައްޔިތުން ދޫކޮށްލުމުގެ ބަދަލުގައި، ސާބް އަށް ވަނީ މައާފު ދީފަ އެވެ. 

މި މައްސަލައާ ގުޅުން ހުރި މަސްދަރު ތަކުން ބުނެފައިވާ ގޮތުގައި، މަދޫރޯގެ މައްޗަށް އެމެރިކާާ އިން ކޮށްފައިވާ ކްރިމިނަލް ދައުވާ ވަރުގަދަ ކުރުމަށް ސާބް އަށް މައުލޫމާތު ދެވިދާނެ އެވެ. އެމެރިކާ އިން މަދޫރޯ އާއި އޭނާގެ އަނބިކަނބަލުން ހައްޔަރު ކޮށްގެން ގެންގޮސް ބަންދު ކޮށްފައިވާއިރު، ދެ މީހުންގެ މައްޗަށް ވެސް ވަނީ އެމެރިކާގެ ކޯޓުގައި ދައުވާ އުފުލައިފަ އެވެ. 

ސާބް އާއި އޭނާގެ އަންހެނުން މީގެ ކުރިން އިޓަލީގައި ވެސް ދިރިއުޅުނެވެ. އިޓަލީގައި ސާބްގެ ޤާނޫނީ ވަކީލެއްގެ ގޮތުގައި ހުރި ލުއީޖީ ޖިއުލިއާނޯ ހޮނިހިރު ދުވަހު ބުނީ، އެމެރިކާގައި ސާބްގެ މައްސަލަތައް ބަލާކަން ޔަޤީން ނުވާ ކަމަށެވެ. އަދި އޭނާ އެމެރިކާާ އަށް ފޮނުވާލާފައިވާކަން ވެސް ޔަޤީން ނުވާ ކަމަށް ބުންޏެވެ.