ރާއްޖޭގެ އެކިކަންކޮޅުތަކުން ފެނިގެންދަނީ މާޔޫސްކަމާއި، ހިތްދަތިކަން: ވަހީދު

ދިވެހިރާއްޖޭގެ އެކިކަންކޮޅުތަކުން ފެނިގެންދަނީ މާޔޫސްކަމާއި، ހިތްދަތިކަން ކަމަށް ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވެއްޖެ އެވެ.

އެމްޑީޕީން ބުރާސްފަތި ދުވަހުގެ ރޭ ބޭއްވި "ވަޒީފާ ބުރާސްފަތި" އިހުތިޖާޖުގައި ވަހީދު ވަނީ ރައީސް ޑރ.މުހައްމަދު މުއިއްޒުގެ ސަރުކާރަށް ވަރަށް ބޮޑަށް ފާޑު ވިދާޅުވެފަ އެވެ. އަދި ވިދާޅުވީ މިސަރުކާރުގައި ރައްޔިތުން ނިކަމެތި ކުރަމުންދާ ކަމަށާއި، މިހާރު ރާއްޖޭގެ އެކިކަންކޮޅުތަކުން ފެންނަނީ މާޔޫސްކަމާއި، ހިތްދަތިކަން ކަމަށެވެ.

މިފަދަ ދަރަޖައަކަށް ރާއްޖެ ވައްޓާލިއިރު، ރައީސް މުއިއްޒުގެ ސަރުކާރު ބަދަލުކުރަން ޖެހޭކަން ފާހަގަކުރައްވައި ވަހީދު ވިދާޅުވީ މިގައުމު އަނދަވަޅަކަށް ވައްޓާލާފައިވާ ކަމަށާއި، މިވެރިކަން ބަދަލު ކުރަން ޖެހޭ ކަމަށެވެ. އަދި ވިދާޅުވީ މިސަރުކާރާއެކު މި ހާލަތު ރަނގަޅު ނުވާނެ ކަމަށެވެ. 

އެމްޑީޕީއަކީ މިރާއްޖޭގައި ބިރު ފަހަނައަޅައި، ރާއްޖޭގައި ދިމާވި ހުރިހާ ދައްޗަކުން ދިވެހި ރައްޔިތުންނަށް ސަލާމަތްކަން ހޯދައިދިން ޕާޓީ. އަޅުގަނޑުމެންގެ އެމްޑީޕީ މެންބަރުންގެ ލޭ ހިނގާ ވިންދު ހިނގާ ހިނދެއްގައި އެމްޑީޕީން ދިވެހި ރައްޔިތުންގެ ހައްގުގައި މިކުރާ މަސައްކަތް ހުއްޓާނުލާނަން އަޅުގަނޑުމެންނެއް.

ދިއްދޫ ދާއިރާގެ ރައީސް އަބްދުﷲ ވަހީދު

ވަހީދު ވިދާޅުވީ މިހާރު ފެނިގެން މިދަނީ ސަރުކާރު ވެއްޓެމުންދާ މަންޒަރު ކަމަށާއި، މާލަސްތަކެއް ނުވެ ރައްޔިތުންނަށް ވެރިކަން ވެއްޓޭ މަންޒަރު ފެންނާނެ ކަމަށެވެ. އަދި މިއަދު ފުލުހުންނަށް ގައިރުގާނޫނީ އަމުރު ހިންގައި ރައްޔިތުންގެ ހައްގުތަކަށް ހުރަސްއެޅި ނަމަވެސް ރައްޔިތުންގެ ބާރުވެރިކަން އަބަދުވެސް ގަދަވާނެ ކަމަށް އޭނާ ވިދާޅުވި އެވެ. 

މީގެ އިތުރުން ވަހީދު ވިދާޅުވީ މިސަރުކާރަށް ރައްޔިތުންގެ ތާއީދު ނެތް ކަމަށާއި، އިތުބާރު ގެއްލިފައިވާ ކަމަށެވެ.