ކޮޅުފުށީގެ މަގުތައް ތަރައްގީ ކުރުމުގެ މަޝްރޫއު: ރައީސް މުއިއްޒުގެ ދަތުރުފުޅާ ދިމާކޮށް އަމަލީ މަސައްކަތް ފެށި ނަމަވެސް އޭގެފަހުން މަސައްކަތް ހުއްޓިފައި!
ރައީސް މުއިއްޒު މ. ކޮޅުފުއްޓަށް ކުރެއްވި ދަތުރުފުޅާ ދިމާކޮށް އެ ރަށުގެ މަގު ހެދުމުގެ މަޝްރޫއު ފެށި ނަމަވެސް، އޭގެ ފަހުން އެއްވެސް އަމަލީ މަސައްކަތެއް ކުރިއަށް ނުދާކަމުގެ ޝަކުވާ އާންމުން ވަނީ ކޮށްފައި. އާރްޑީސީން ކުރިއަށްގެންދާ މި މަޝްރޫއުގެ ދަށުން 3.8 ކިލޯމީޓަރުގެ މަގު ހެދުމަށް ހަމަޖެހިފައިވާއިރު، މަސައްކަތް ހުއްޓިފައި އޮތުމުގެ ސަބަބުން މި މަޝްރޫއަށް ނެގި މުވައްޒަފުން ވެސް ތިބީ މަސައްކަތެއް ނެތިފައި. މިކަމާ ގުޅިގެން އެ ދާއިރާގެ އެމްޑީޕީގެ ގައުމީ މަޖިލީހުގެ މެންބަރު މުހައްމަދު އިހުސާން ވިދާޅުވީ، މަޝްރޫއު ފެށުމުގެ ގޮތުން އަތުރާފައިވާ ގައުތައް ވެސް މިހާރު ނަގާފައިވާ ކަމަށް.
ކޮޅުފުށީ މަގުތައް ތަރައްގީ ކުރުމުގެ އަމަލީ މަސައްކަތް ފެށި ރަސްމިއްޔާތުގެ ތެރެއިން. | ރައީސް އޮފީސް
މ. އަތޮޅުގެ ރަށްތަކަށް ރައީސް ޑރ. މުހައްމަދު މުއިއްޒު މިދިޔަ އަހަރު ކުރެއްވި ރަސްމީ ދަތުރުފުޅާ ދިމާކޮށް އެރަށުގެ މަގުތައް ތަރައްގީކުރުމުގެ އަމަލީ މަސައްކަތް ފެށި ނަމަވެސް އޭގެފަހުން މިއަދާ ހަމައަށް އެއްވެސް މަސައްކަތެއް ކުރިއަށް ނުދާކަން ހާމަވެއްޖެ އެވެ.
ރައީސް މުއިއްޒު އެރަށަށް ވަޑައިގެންނެވީ 23 ސެޕްޓެންބަރު 2025 ގަ އެވެ. ރައީސްގެ މިދަތުރުފުޅާ ދިމާކޮށް، ކޮޅުފުށީގެ މަގުތައް ޒަމާނީ ފެންވަރަށް ތަރައްގީކުރުމުގެ އަމަލީ މަސައްކަތް ފައްޓަވައިދެއްވީ މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް، ޑރ. އަބްދުﷲ މުއްލަތިބް އެވެ.
މި މަޝްރޫއާ ގުޅޭގޮތުން އެ ދާއިރާގެ އެމްޑީޕީގެ ގައުމީ މަޖިލީހުގެ މެންބަރު މުހައްމަދު އިހުސާން ވިދާޅުވީ، ރައީސް މުއިއްޒު ކޮޅުފުއްޓަށް ވެވަޑައިގެންނެވި އެންމެ މުހިންމު އެއް ވައުދުފުޅަކީ މަގު ހެދުމުގެ މަޝްރޫއު ކަމަށާއި، އެމަނިކުފާނުގެ ދަތުރުފުޅާ ދިމާކޮށް އަމަލީ މަސައްކަތް ފެށި ކަމަށެވެ.
ނަމަވެސް މިއަދާ ހަމައަށް އެ މަޝްރޫއުގެ އެއްވެސް އަމަލީ މަސައްކަތެއް ކުރިއަށް ނުދާ ކަަމަށް އޭނާ ވިދާޅުވި އެވެ. އަދި ވިދާޅުވީ މަޝްރޫއު ފެށުމުގެ ގޮތުން ގައު އެތުރި ސަރަހައްދު ވެސް ނަގާފައިވާ ކަމަށެވެ.
ޖުމްލަ ގޮތެއްގައި ކޮޅުފުއްޓަށް އަޅުގަނޑުމެން ބަލާލިކަމުގައި ވިޔަސް ކޮޅުފުށީގައި އެންމެ މުހިންމު އެންމެ ބޮޑު ޕްރޮޖެކްޓަކަށް ހަގީގަތުގައި ވެވަވަޑައިގެންނެވި ވައުދަކީ މަގު ހެދުމުގެ މަޝްރޫއު. މަގު ހެދުމުގެ މަޝްރޫއު އިފްތިތާހް ކުރުމުގެ ވަރަށް ވަރުގަދަ ހަފްލާއެއް ވެސް އިންތިޚާބާ ދިމާކޮށް ކުރިއަށް ގެންދިޔަ. މުލަކުގައި ކުރިން އަޅުގަނޑުމެން ފަށާފައިވާ ޕްރޮޖެކްޓްގެ ދަށުން މަގުތަކުގައި ޖަހާފައި ހުރި ގައުތައް ނައްޓަައިގެން ގެންގޮސް ކޮޅުފުށީގެ ވަކި ހިސާބެއްގައި އަތުރައި އެ ޕްރޮޖެކްޓް އިފްތިތާހް ކޮށްދެއްވައި އެ ޕްރޮޖެކްޓަށް ބޭނުންވާ ވަރަށް ގިނަ އަދަދެއްގެ މުވައްޒަފުން ރަށުތެރެއިން ނަގާފައިވަނީ. އެހެންވީމަ އެބޭބޭފުޅުން ވެސް މަސައްކަތެއް ނެތި ރަށުތެރޭގައި އެބަތިބި.މުލަކު ދާއިރާގެ އެމްޑީޕީ ގައުމީ މަޖިލީހުގެ މެންބަރު މުހައްމަދު އިހުސާން
އާރްޑީސީން ކުރިއަށް ގެންދާ މިމަޝްރޫއުގެ ދަށުން 3.8 ކިލޯ މީޓަރުގެ މަގު ތަރައްގީ ކުރުމަށް ހަމަޖެހިފައިވެ އެވެ.
