ރެކޯޑާ މެދު ނުވިސްނަން، ބޭނުން ވަނީ ޓީމަށް ކާމިޔާބު ހޯދަން: މެސީ

ރެކޯޑުތަކާ މެދު ނުވިސްނާ ކަމަށާއި، އޭނާ ބޭނުން ވަނީ ޓީމަށް ކާމިޔާބު ހޯދަން ކަމަށް އާޖެންޓީނާގެ ކެޕްޓަން ލިއޮނަލް މެސީ ބުނެފި އެވެ.

މެސީ މިހެން ބުނެފައި ވަނީ މިހާރު ކުރިއަަށްދާ ފީފާ ވޯލްޑް ކަޕްގެ ގުރޫޕު ސްޓޭޖުގައި އާޖެންޓީނާ އިން އޮސްޓްރިއާ ބަލި ކުރި މެޗަށް ފަހު ވާހަކަ ދައްކަމުންނެވެ. އެ މެޗުގައި އާޖެންޓީނާގެ ދެ ލަނޑު ވެސް މެސީ ޖެހިއިރު، މެޗުގެ މޮޅު ކުޅުންތެރިޔަކަށް ހޮވުނީ ވެސް މެސީ އެވެ.

އެ މެޗުގައި ޖެހި ލަނޑުތަކާ އެކު، މެސީ ވަނީ ފީފާ ވޯލްޑް ކަޕްގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑު މުގުރާލައިފަ އެވެ. މީގެ ކުރިން 16 ލަނޑާ އެކު އެ ރެކޯޑު އޮތީ ޖަރުމަނުގެ މިރޮސްލާވް ކްލޯސާ އަތުގައި އެވެ. ނަމަވެސް، އޮސްޓްރިއާ ކޮޅަށް ޖެހި ދެ ލަނޑާ އެކު ވޯލްޑް ކަޕްގައި މެސީ ޖެހި ލަނޑުގެ އަދަދު ވަނީ 18 އަށް އަރައިފަ އެވެ.

އެ މެޗަށް ފަހު ނޫސްވެރިޔަކު ވަނީ، ވޯލްޑް ކަޕްގައި މެސީ އަށް ކިތައް ލަނޑު ޖެހޭނެތޯ ބުނެ ސުވާލު ކޮށްފައި އެވެ. އެ ސުވާލަށް ޖަވާބު ދެމުން މެސީ ބުނެފައި ވަނީ މިހާރު އޭނާ ހުރީ ވަރަށް ވަރުބަލި ވެފައި ކަމަށާއި، އެހެންވެ އެކަންކަމާ މެދު ނުވިސްނާ ކަމަށެވެ. އޭގެ ބަދަލުގައި އޭނާ ބޭނުން ވަނީ އާޖެންޓީނާގެ ކުޅުންތެރިންނާ އެކު އުފާވެރި ވަގުތު ތަކެއް ކަމަށް މެސީ ބުންޏެވެ.

އުމުރުން 38 އަހަރުގެ މެސީ އިތުރަށް ބުނެފައި ވަނީ، އާޖެންޓީނާ އިން ވަނީ އެ ޓީމުގެ ސަޕޯޓަރުންނަށް އެތައް އުފާވެރި ކަމެއް ހޯދައިދީފައި ކަމަށެވެ. ނަމަވެސް، އިތުރު ކަންކަން ޓީމުގެ ސަޕޯޓަރުންނަށް ހޯދައިދޭން ބޭނުންވާކަން ފާހަގަކޮށް މެސީ ބުނީ، އޭނާ އާއި އާޖެންޓީނާގެ ކުޅުންތެރިން ތިބީ އެކަމަށް އަޒުމު ކަނޑަ އަޅައިގެން ކަމަށެވެ. އަދި ބޭނުން ވަނީ މެޗު ތަކުން މޮޅުވާން ކަމަށް ވެސް މެސީ ބުންޏެވެ.

ވޯލްޑް ކަޕްގެ ގުރޫޕު ސްޓޭޖުގައި ކުޅުނު ދެ މެޗުން ވެސް މޮޅުވެ އާޖެންޓީނާ އިން މުބާާރާތުގެ ގަދަ 32 ވަނަ ބުރުން ޖާގަ ހޯދާފައިވާއިރު، ގުރޫޕު ސްޓޭޖުގައި އެ ޓީމަށް ބާކީ އޮތީ ޖޯޑަންއާ ދެކޮޅަށް ކުޅޭ މެޗެވެ. އާޖެންޓީނާ އަކީ މުބާރާތުގެ އެންމެ ފަހުގެ ޗެމްޕިއަން ކަަމަށްވާއިރު، އެ ޓީމުގެ އަމާޒަކީ މުބާރާތުގެ ތަށި ދިފާއު ކުރުމެވެ.