އީރާން އާއި އެމެރިކާގެ ޓެކްނިކަލް މަޝްވަރާތައް ވެސް ނިމިއްޖެ
ގަރީބާބާދީ ވިދާޅުވީ މިހާރު ވާސިލު ވެފައިވާ ގޮތުގެ މައްޗަށް ބިނާކޮށް، ދެން އަންނަ ވާހަކަތައް ބާއްވާނީ އިސްވެރިންގެ ކޮމިޓީގެ ބެލުމުގެ ދަށުން ކަމަށާއި، މި ވާހަކަ ތަކުގައި އީރާންގެ ޤާނޫނު ހަދާ މަޖިލީހުގެ ރައީސް އާއި ފޮރިން މިނިސްޓަރުގެ އިތުރުން، އެމެރިކާގެ ނައިބު ރައީސް އާއި ޤަތަރު އަދި ޕާކިސްތާންގެ ބޮޑު ވަޒީރުން ބައިވެރިވެ ވަޑައިގަންނަވާނެ ކަމަށް.
އީރާންގެ ފޮރިން މިނިސްޓަރު އައްބާސް އަރާގްޗީ. | ރޮއިޓާސް
އެމެރިކާ އާއި އީރާންގެ ޓެކްނިކަލް ޓީމު ތަކުގެ މެދުގައި ސްވިޒަލެންޑުގައި ކުރިއަށް ދިޔަ މަޝްވަރާތައް ވެސް މިހާރު ނިމިފައިވާ ކަމަށާއި، ދެން ކުރިއަށް އޮތް ބުރު ކުރިއަށް ދާނީ މެދުވެރިންގެ ފަރާތުން އެކުލަވާލާ ކޮމެޓީތަކުގެ ބެލުމުގެ ދަށުން ކަމަށް އީރާން އިން ބުނެފި އެވެ.
އީރާންގެ ފޮރިން މިނިސްޓަރުގެ ނައިބު ކާޒިމް ގަރީބާބާދީ ވިދާޅުވީ، މި ވާހަކަ ތަކުގައި ހަތަރު މަސައްކަތު ގުރޫޕު އުފައްދާފައިވާ ކަމަށެވެ. އީރާންގެ ޕްރެސް ޓީވީ އާއި އީއާރްއެންއޭ ނޫސް އޭޖެންސީ އިން ރިޕޯޓު ކޮށްފައިވާ ގޮތުގައި މި ގުރޫޕު ތަކަކީ ދަތިކުރުންތައް ނިންމުމުގެ މަސައްކަތު ގުރޫޕް އާއި، ނިއުކްލިއާ މަސައްކަތު ގުރޫޕް އާއި، އަލުން ބިނާކުރުމާއި އިގްތިސާދީ ތަރައްގީގެ މަސައްކަތު ގުރޫޕު، އަދި ބެލުމާއި ތަންފީޒު ކުރުމުގެ މަސައްކަތު ގުރޫޕެވެ.
ގަރީބާބާދީ ވިދާޅުވީ ކޮންމެ ގުރޫޕަކުން ވެސް އެއް މައްސަލައަކަށް ސަމާލުކަން ދޭނެ ކަމަށެވެ.
އޭނާ އިތުރަށް ވިދާޅުވީ މިހާރު ވާސިލު ވެފައިވާ ގޮތުގެ މައްޗަށް ބިނާކޮށް، ދެން އަންނަ ވާހަކަތައް ބާއްވާނީ އިސްވެރިންގެ ކޮމިޓީގެ ބެލުމުގެ ދަށުން ކަމަށާއި، މި ވާހަކަ ތަކުގައި އީރާންގެ ޤާނޫނު ހަދާ މަޖިލީހުގެ ރައީސް އާއި ފޮރިން މިނިސްޓަރުގެ އިތުރުން، އެމެރިކާގެ ނައިބު ރައީސް އާއި ޤަތަރު އަދި ޕާކިސްތާންގެ ބޮޑު ވަޒީރުން ބައިވެރިވެ ވަޑައިގަންނަވާނެ ކަމެވެ.
މި ވާހަކަތައް ބާއްވަނީ އީރާން އާއި އެމެރިކާއާ ދެމެދު ފައިނަލް އެއްބަސްވުމަކަށް ވާސިލުވުމަށް ކުރާ މަސައްކަތުގެ ބައެއްގެ ގޮތުގައި އެވެ. ސުވިޒަލެންޑުގައި ބޭއްވި މަޝްވަރާގެ ވާހަކަތައް ކާމިޔާބުކަމާ އެކު ނިންމާލެވިފައިވާ އިރު، މި ވާހަކަ ތަކުގެ ނަތީޖާ އަކީ ދެ ގައުމުގެ ގުޅުން ރަނގަޅު ކުރުމަށް ނެގޭ މުހިންމު ފިޔަވަޅެއް ކަމަށް ބެލެވެ އެވެ.
ހަތަރު މަސައްކަތު ގުރޫޕެއް އުފެއްދުމުން ދައްކުވައި ދެނީ، މި ވާހަކަ ތަކުގައި ބައިވެރިވާ ފަރާތް ތަކުން މި މަސައްކަތަށް ދެމުން އަންނަ ސަމާލުކަމާއި، ސީރިއަސްކަން އަދި ވަރުގަދަކަމާ އެކު އަމަލު ކުރަމުން އަންނަކަން ކަމަށް ބައެއް ފަރާތް ތަކުން ފާހަގަ ކުރެ އެވެ. ކޮންމެ ގުރޫޕަކުން ވަކި މައްސަލަ އަކަށް ސަމާލުކަން ދިނުމުން މި ވާހަކަތައް އިތުރަށް ހަރުދަނާ އަދި ފައިދާހުރި ގޮތަކަށް ކުރިއަށް ގެންދެވޭނެ އެވެ.
އިސްވެރިންގެ ކޮމިޓީގައި ޤަތަރު އަދި ޕާކިސްތާންގެ ބޮޑުވަޒީރުން ބައިވެރިވެ ވަޑައިގަތުމުން ދައްކުވައި ދެނީ މި ދެ ގައުމުން މި ވާހަކަ ތަކުގައި މެދުވެރިންގެ ދައުރު ފުރިހަމަ އަށް އަދާ ކުރަމުން އަންނަ ކަމެވެ.
