އީރާންއާ ދެކޮޅަށް ޓްރަމްޕް ހިންގަވާ އަސްކަރީ ޙަރަކާތްތައް ހުއްޓުވުމުގެ ޤަރާރު އެމެރިކާގެ ސެނެޓުން ފާސްކޮށްފި

އީރާންއާ ދެކޮޅަށް އެމެރިކާ އިން ކުރިއަށް ގެންދާ އަސްކަރީ ހަރަކާތްތައް ހުއްޓުވުމަށް ބާރު އަޅާ ޤަރާރެއް އެމެރިކާގެ ސެނެޓުން ފާސްކޮށްފި އެވެ.

ރިޕަބްލިކަން ޕާޓީގެ އަޣުލަބިއްޔަތު އޮންނަ ސެނެޓުން މި ޤަރާރު ފާސްކޮށްފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތު ތަކަށް އަމާޒު ކުރި ވަރުގަދަ ރައްދެއްގެ ގޮތުގައި އެވެ.

މި މަހުގެ ކުރީކޮޅު އެމެރިކާގެ ހައުސް އޮފް ރެޕްރެޒެންޓެޓިވްސް އިން ފާސްކުރި މި ޤަރާރު، ސެނެޓުން ފާސްވީ 50 ވޯޓުންނެވެ. ޤަރާރު ފާސް ކުރުމާ ދެކޮޅަށް 48 ވޯޓު ވަނީ ދީފައި އެވެ.

މި ވޯޓުގައި ސިޔާސީ ޕާޓީ ތަކުގެ މެދުގައި ބޮޑު ބައިބައި ވުމެއް ފެނިގެންދިޔަ އިރު، ޑިމޮކްރެޓިކް ޕާޓީގެ ހުރިހާ މެންބަރުންނާ އެކު ރިޕަބްލިކަން ޕާޓީގެ ހަތަރު މެންބަރަކު ވަނީ މި ޤަރާރަށް ތާއީދުކޮށް ވޯޓު ދެއްވާފައި އެވެ. ނަމަވެސް ރިޕަބްލިކަން ޕާޓީގެ ދެ މެންބަރަކު މި ވޯޓުގައި ބައިވެރިވެ ވަޑައިގެންފައި ނުވެ އެވެ. 

މި ގަރާރުގައި އެމެރިކާގެ ރައީސް ޓްރަމްޕް އަށް ގޮވާލާފައި ވަނީ އީރާންއާ ދެކޮޅަށް، ނުވަތަ އީރާންއާ ގުޅުންހުރި ހަނގުރާމަވެރި ހަރަކާތް ތަކުން އެމެރިކާގެ ސިފައިން ދުރު ކުރުމަށެވެ. މީގެ އިތުރުން ކޮންގްރެސްގެ ހުއްދައާ ނުލައި އީރާންއާ ދެކޮޅަށް އެއްވެސް އަސްކަރީ ފިޔަވަޅެއް ނޭޅުމަށް ވެސް މި ގަރާރުގައި ބާރު އަޅާފައިވެ އެވެ.

މި ގަރާރު ސެނެޓުން ފާސްވި ނަމަވެސް، މިއީ ރައީސް ޓްރަމްޕް އަށް ދިން ރަމްޒީ އިންޒާރެއްގެ ގޮތުގައި ގިނަ ފަރާތް ތަކުން ސިފަ ކުރެ އެވެ. ސަބަބަކީ މި ޤަރާރު ތަންފީޒު ވިޔަ ނުދިނުމަށްޓަކައި ވީޓޯ ކުރުމުގެ ބާރު ރައީސް ޓްރަމްޕް އަށް ލިބިވަޑައި ގަންނަވާތީ އެވެ. އަދި ރައީސްގެ ވީޓޯ ބާތިލު ކުރުމަށް ބޭނުންވާ ތިންބައި ކުޅަ ދެބައިގެ އަޣުލަބިއްޔަތު ކޮންގްރެސްގައި ނެތުމުން، މި ނިންމުމަކީ އަމަލީ ގޮތުން ބޮޑު ބަދަލެއް އަންނާނެ ކަމެއް ނޫން ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.

އީރާން އާއި އެމެރިކާއާ ދެމެދު އޮތް ގުޅުން ގޯސްވެ، އަސްކަރީ ކުރިމަތި ލުމަކަށް ހިނގައިދާނެ ކަމުގެ ބިރު ބޮޑު ވެފައިވާ ދަނޑިވަޅެއްގައި ސެނެޓުން މިފަދަ ނިންމުމެއް ނިންމީ، ޓްރަމްޕްގެ ސަރުކާރުން އަމިއްލަ އަށް ނިންމުންތައް ނިންމައިގެން ހަނގުރާމަ އަކަށް މަގުފަހި ކޮށްފާނެތީ، އެކަމާ މެދު މެންބަރުން ކަންބޮޑުވުން ފާޅު ކުރަމުންދާ ދަނޑިވަޅެއްގައި އެވެ.

މި ޤަރާރަކީ އެމެރިކާގެ ޚާރިޖީ ސިޔާސަތާއި، އަސްކަރީ ނިންމުން ތަކުގައި ކޮންގްރެސްގެ ދައުރު ބޮޑު ކުރުމަށް ކުރެވޭ މަސައްކަތެއްގެ ގޮތުގައި ވެސް ބެލެވެ އެވެ.