އީރާން އިން އެއްބަސްވުމަށް އަމަލު ނުކުރާ ނަމަ، ފިޔަވަޅު އަޅާނަން: ޓްރަމްޕް

އެމެރިކާ އާއި އީރާންއާ ދެމެދު ޤާއިމު ކޮށްފައިވާ އެއްބަސްވުމަށް، އީރާން އިން އަމަލު ނުކުރާ ނަމަ އެކަމާ ދެކޮޅަށް ފިޔަވަޅު އަޅުއްވާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

ޓްރަމްޕް މިހެން ވިދާޅުވެފައި ވަނީ، އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުންނެވެ. އީރާން އާއި ބައިނަލްއަޤުވާމީ ޤައުމުތަކާ ދެމެދު ވެފައިވާ އެއްބަސްވުން ތަކަކީ އެ ޤައުމުގެ ނިއުކްލިއާ ޕްރޮގްރާމް ހުއްޓުވުމާ ގުޅޭ އެއްބަސްވުން ތަކެކެވެ. މި އެއްބަސްވުން ތަކުގެ ދަށުން އީރާން އިން ނިއުކްލިއާ ހަތިޔާރު އުފެއްދުމުގެ މަސައްކަތް ހުއްޓާލަން ޖެހެ އެވެ. 

އެއްބަސްވުމުގައި ބުނެފައިވާ ގޮތަށް އީރާން އިން އަމަލު ނުކުރާ ކަމަށް ބުނެ ވާހަކަ ދެކެވެމުން އަންނަނިކޮށް ޓްރަމްޕް ވިދާޅުވީ، އީރާން އަށް ޖެހޭނީ އެއްބަސްވުމަށް އަމަލު ކުރަން ކަމަށެވެ. އަދި އީރާން އިން އެއްބަސްވުމަށް އަމަލު ނުކުރާ ނަމަ، އެމެރިކާ އިން އެކަމާ ދެކޮޅަށް ފިޔަވަޅު އަޅުއްވާނެ ކަމަށް ވެސް ޓްރަމްޕް ވިދާޅުވި އެވެ. 

އެމެރިކާ އިން މީގެ ކުރިން ވެސް ވަނީ އީރާން އާއެކު ނިއުކްލިއާ އެއްބަސްވުމެއް ޤާއިމު ކޮށްފަ އެވެ. އެގޮތުން އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި އީރާން އާއެކު ޤާއިމު ކޮށްފައި އޮތް އެއްބަސްވުމުން އެމެރިކާއިން ވަކިވީ ޓްރަމްޕްގެ ރިޔާސީ ފުރަތަމަ ދައުރުގެ ތެރޭގަ އެވެ. އެއަށް ފަހު، ޓްރަމްޕް ވަނީ އީރާންއާ މެދު ވަރަށް ހަރުކަށި ސިޔާސަތުތަކެއް ގެންގުޅުއްވައިފަ އެވެ. 

އީރާންއާ ދެކޮޅަށް އެމެރިކާ އިން އަޅާފައިވާ ދަތިކުރުމުގެ ބައެއް ފިޔަވަޅު ތަކަށް މިހާރު ލުއި ދީފައިވާއިރު، މިއީ މި ފަހުން އެކުލަވާލެވުނު އެއްބަސްވުމުގެ ދަށުން އެމެރިކާ އިން ދީފައިވާ ލުއި ތަކެކެވެ. އެމެރިކާ އާއި އީރާންގެ މަޝްވަރާތައް ސްވިޒަލެންޑުގައި ކުރިއަށް ގެންދިޔައިރު، ދެ ޤައުމުގެ ވެސް އިސްވެރިން ވަނީ ބައިވެރިވެ ވަޑައިގެންފައި އެވެ. 

އީރާން އިން ނިއުކްލިއާ ހަތިޔާރު އުފެއްދުމަށް މަސައްކަތް ކުރަމުން އަންނަ ކަމަށް ބައެއް ޤައުމު ތަކުން އަބަދު ވެސް ތުހުމަތު ކުރެ އެވެ. ނަމަވެސް، އެ ތުހުމަތުތައް ދޮގުކޮށް އީރާން އިން ބުނަމުން އަންނަނީ، އެ ޤައުމުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށް ގެންދާ ޕްރޮގްރާމެއް ކަމަށެވެ.