މަޝްވަރާ ތަކުގެ ނަތީޖާ ބިނާވެފައި ވަނީ އިޙްތިރާމްގެ މައްޗަށް: އީރާންގެ ރައީސް ޕެޒެޝްކިއާން

އެމެރިކާއާ އެކު ކުރިއަށްދާ މަޝްވަރާ ތަކުގެ ނަތީޖާ ބިނާވެފައި ވަނީ އެއްބަސްވެފައިވާ ކަންކަމަށް ފުރިހަމަ އަށް އިހުތިރާމްކޮށް، އެ ކަންކަން ތަންފީޒު ކުރުމުގެ މައްޗަށް ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އީރާންގެ ރައީސް ޕެޒެޝްކިއާން ވިދާޅުވީ، މަޝްވަރާ ތަކުގައި ކުރިއެރުން ލިބޭނީ އެއްބަސްވެފައިވާ ޒިންމާ ތަކަށް އަމަލީ ގޮތުން ތަބާވާ މިންވަރަކުން ކަމަށެވެ. އަދި އެއްބަސްވެފައިވާ ލިޔެކިޔުން ތަކުގެ ބޭރުން ދައްކާ ވާހަކަ ތަކުގެ ސަބަބުން މަޝްވަރާ ތަކަށް އެއްވެސް ކުރިއެރުމެއް ނުލިބޭނެ ކަމަށް ވެސް ޕެޒެޝްކިއާން ވިދާޅުވި އެވެ. ނަމަވެސް، ޕެޒެޝްކިއާން އިޝާރާތް ކުރެއްވީ ކޮން ވާހަކަ ތަކަކަށް ކަން ސީދާ ސާފު ކޮށްދެއްވާފައި ނުވެ އެވެ. 

އީރާންގެ ރައީސް ޕެޒެޝްކިއާން މިފަދަ މޭރުމަކުން ވާހަކަފުޅު ދައްކަވާފައި މި ވަނީ، އެމެރިކާގެ ރައީސް ޑޮނަލްޑް ޓްރަމްޕް ފާއިތުވި މަދު ގަޑިއިރު ތަކެއްގެ ތެރޭގައި އީރާންއާ ގުޅޭ ގޮތުން ދެއްކެވި ވާހަކަފުޅު ތަކަކާ ގުޅިގެން އީރާންގެ އޮފިޝަލުން އެކަމާ ދެކޮޅު ހައްދަވަމުންދާ ދަނޑިވަޅެއްގައި އެވެ. ޓްރަމްޕް ވަނީ އީރާންގެ ނިއުކްލިއާ މަރުކަޒުތައް ބަލައި ފާސް ކުރުމުގެ ހުއްދަ ދިނުމަށް އެ ގައުމުން އެއްބަސްވެފައިވާ ކަމަށް ވިދާޅުވެފައި އެވެ.

މީގެ އިތުރުން، އީރާންގެ ހިފަހައްޓާފައިވާ ފައިސާގެ ތެރެއިން ދޫކޮށްލާ ކޮންމެ ފައިސާއެއް ބޭނުން ކުރަން ޖެހޭނީ އެމެރިކާގެ ދަނޑުވެރި ކަމުގެ އުފެއްދުންތައް ގަތުމަށް ކަމަށް ވެސް ޓްރަމްޕް ވަނީ ވިދާޅުވެފައި އެވެ. ނަމަވެސް އީރާންގެ އޮފިޝަލުން ވަނީ ޓްރަމްޕްގެ މި ދައުވާ ތަކަކީ ހަގީގަތާ ހިލާފު ވާހަކަ ތަކެއް ކަމަށް ބުނެ އެކަން ދޮގު ކޮށްފައި އެވެ.

މަޝްވަރާ ތަކުގެ މާހައުލު ގޯސް ވެދާނެ ފަދަ ވާހަކަ ތަކުން ދުރުހެލިވުމަށް އީރާން އިން ގޮވާލާފައިވާއިރު، ދެ ގައުމުގެ ދެމެދުގައި އޮތް ނުތަނަވަސްކަން ހައްލު ކުރުމަށް ކުރެވޭ މަސައްކަތް ތަކަށް މިފަދަ ބަހުގެ ހަމަލާ ތަކުގެ ސަބަބުން ހުރަސް ތަކެއް ކުރިމަތި ވަމުންދާ ކަމަށް މަސްރަހު ދިރާސާ ކުރާ ފަރާތް ތަކުން ފާހަގަ ކުރެ އެވެ.

އީރާން އިން ތަކުރާރުކޮށް ބުނަމުން ދަނީ އެމެރިކާ އާއެކު ކުރިއަށް ދާނީ އެއްބަސްވެފައިވާ އުސޫލު ތަކުގެ ތެރެއިން ކަމަށެވެ.