ސްވިޒަލެންޑުގައި މަޝްވަރާތައް ކުރިއަށް ދަނިކޮށް ޓްރަމްޕް ދިން އިންޒާރުގެ ސަބަބުން، މަޝްވަރާތައް ނުރައްކަލަކަށް ވެއްޓުނު: އީރާން

އެމެރިކާ އާއި އީރާންއާ ދެމެދު ސްވިޒަލެންޑުގައި މަޝްވަރާތައް ކުރިއަށް ދަނިކޮށް، އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރު ތަކުގެ ސަބަބުން ބޮޑެތި ހުރަސް ތަކެއް ކުރިމަތިވި ކަމަށް އދ. އަށް ކަނޑައަޅާފައި ހުންނަވާ އީރާންގެ ސަފީރު އަލީ ބަހްރައިނީ ވިދާޅުވެއްޖެ އެވެ.

ޖެނީވާގައި ހުންނަވައި ރޮއިޓާސް ނިއުސް އެޖެންސީ އަށް ދެއްވި ބަސްދީގަތުމެއްގައި ބަހްރައިނީ ވިދާޅުވީ، ޓްރަމްޕްގެ ބަހުގެ ހަމަލާ ތަކުގެ ސަބަބުން ސްވިޒަލެންޑުގައި ކުރިއަށް ދިޔަ މަޝްވަރާތައް ނުރައްކަލުގެ ތެރެއަށް ވެއްޓިފައިވާ ކަމަށެވެ.

މިދިޔަ އާދީއްތަ ދުވަހު ސްވިޒަލެންޑުގައި މި މަޝްވަރާތައް ފެށުނުތާ ކުޑަ ވަގުތުކޮޅެއްގެ ތެރޭގައި، އެ ބައްދަލުވުމުގައި ބައިވެރިވެ ވަޑައިނުގަންނަވާ ޓްރަމްޕް ވަނީ ސޯޝަލް މީޑިއާ މެދުވެރިކޮށް އީރާން އަށް ވަރުގަދަ އިންޒާރެއް ދެއްވާފައި އެވެ.

ޓްރަމްޕްގެ "ޓްރޫތް ސޯޝަލް" އެކައުންޓުގައި ކުރެއްވި ޕޯސްޓެއްގައި ވިދާޅުވީ، ލުބުނާންގައި ހަރަކާތްތެރިވާ ހިޒްބުﷲ ފަދަ އީރާން އިން ޚަރަދުކުރާ ހަނގުރާމަވެރި ޖަމާއަތް ތަކުން ހިންގާ ހަމަ ނުޖެހުންތައް ވަގުތުން ހުއްޓާލަން ޖެހޭ ކަމަށެވެ. އަދި އެކަން އެގޮތަށް ނުކޮށްފި ނަމަ، އެންމެ ފަހުން އީރާން އަށް ދިން ހަމަލާއަށް ވުރެ މާ ވަރުގަދަ ހަމަލާއެއް އެ ގައުމަށް ދޭނެ ކަމުގެ އިންޒާރު ޓްރަމްޕް އިންޒާރު ދެއްވި އެވެ.

މި އިންޒާރުތަކާ ގުޅިގެން ސަފީރު ބަހްރައިނީ ވިދާޅުވީ، އެމެރިކާ އިން ބިނާ ކުރަނިވި ގޮތެއްގައި މަޝްވަރާ ކުރުމަށް ތައްޔާރަށް އޮތްކަން ދައްކައިދޭ ނަމަ، އީރާން އިން އެމެރިކާ އާއެކު ވާހަކަ ދެއްކުމުގައި ދެމި އޮންނާނެ ކަމަށެވެ. އޭނާ އިތުރަށް ފާހަގަ ކުރެއްވި ގޮތުގައި، މަޝްވަރާ ތަކުގައި ބައިވެރިވާ ފަރާތް ތަކުން މިހާރު މަސައްކަތް ކުރަމުން ދަނީ ނިއުކްލިއާ މައްސަލައާ ގުޅޭ ވާހަކަ ތަކަށް ދިއުމުގެ ކުރިން، ދެ ގައުމުގެ ދެމެދުގައި ވެފައިވާ ފަހުމުނާމާގެ ހުރިހާ މާއްދާ ތަކަކަށް އެއްބަސްވުމަކަށް އައުމަށެވެ.

މި މަޝްވަރާ ތަކަކީ ދެ ގައުމުގެ ދެމެދުގައި އުފެދިފައިވާ ނުތަނަވަސްކަން ކުޑަ ކުރުމަށް ކުރިއަށް ގެންދާ މުހިންމު ބައްދަލުވުން ތަކެކެވެ. ނަމަވެސް ޓްރަމްޕްގެ ހަރުކަށި ސިޔާސަތުތަކާއި، ދެއްވަމުންދޭ އިންޒާރު ތަކުގެ ސަބަބުން، ޑިޕްލޮމެޓިކް އުސޫލުން މައްސަލަ ހައްލު ކުރުމަށް ކުރާ މަސައްކަތް ތަކަށް ބޮޑެތި ގޮންޖެހުން ތަކެއް ކުރިމަތިވަމުންދާ ކަމަށް އީރާން އިން ގަބޫލު ކުރެ އެވެ.