މިސައިލް ނެތް ނަމަ، ޣައްޒާ ގޮތަށް އަހަރަމެން ވެސް ފުނޑު ފުނޑު ވާނެ: އީރާންގެ ރައީސް ޕެޒެޝްކިއާން

އީރާންގެ މިސައިލް ޕްރޮގްރާމް އަކީ އެ ގައުމުގެ ދިފާއަށް ކޮންމެހެން ބޭނުންތެރި އެއްޗެއް ކަމަށާއި، އެ ނޫން ނަމަ މިއަދު އީރާން އޮންނާނީ ޣައްޒާ ފަދަ ހާލަތެއްގައި ކަމަށް އެ ގައުމުގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އަންގާރަ ދުވަހު ޕާކިސްތާން އަށް ކުރެއްވި ރަސްމީ ދަތުރުފުޅެއްގައި ވާހަކަފުޅު ދައްކަވަމުން ޕެޒެޝްކިއާން ވިދާޅުވީ، އީރާންގެ ބެލިސްޓިކް މިސައިލް ޕްރޮގްރާމްއާ ގުޅޭ ގޮތުން އެއްވެސް ފަރާތަކާ އެކު މަޝްވަރާ ނުކުރައްވާނެ ކަމަށެވެ.

އެގޮތުން ޕެޒެޝްކިއާން ވިދާޅުވީ އީރާންގެ ދިފާއީ ބާރުގެ ގޮތުގައި މިސައިލްތައް ނެތް ނަމަ، އެމެރިކާ އާއި އިޒްރޭލް އިން ޣައްޒާ އަށް ހަދާލިހެން އީރާން ވެސް ފުނޑު ފުނޑު ކޮށްލާނެ ކަމަށެވެ. އަދި އެފަދަ ހާލަތެއްގައި ކުޑަ ކުއްޖަކަށް ނުވަތަ މުސްކުޅި އަކަށް ބެލުމެއް ނެތް ރަހުމު ކުޑަ ހަމަލާ ތަކެއް އީރާން އަށް އަމާޒު ވާނެ ކަމަށް ވެސް ޕެޒެޝްކިއާން ފާހަގަ ކުރެއްވި އެވެ. އެހެން ކަމުން އެއްވެސް ހާލަތެއްގައި، އެއްވެސް މީހަކާ އެކު އީރާންގެ ދިފާއީ ގާބިލުކަމާ ބެހޭ ގޮތުން މަޝްވަރާ ނުކުރައްވާނެ ކަމަށް ޕެޒެޝްކިއާން ތަކުރާރުކޮށް ވިދާޅުވި އެވެ.

މެދު އިރުމަތީގެ ހަނގުރާމަ ދާއިމީކޮށް ހުއްޓާލުމަށް އެމެރިކާ އާއި އީރާންއާ ދެމެދު މެދުވެރިއެއްގެ ދައުރު އަދާކުރާ ޕާކިސްތާންގެ ބޮޑު ވަޒީރު ޝެހްބާޒް ޝަރީފް ވެސް ވަނީ މިކަމާ ގުޅޭ ގޮތުން ވާހަކަފުޅު ދައްކަވާފައި އެވެ. ބޮޑު ވަޒީރު ޝަރީފް ވިދާޅުވީ، އެމެރިކާ އާއި އީރާންއާ ދެމެދު ސޮއި ކުރެވުނު އިބްތިދާއީ އެއްބަސްވުމުގައި ބެލިސްޓިކް މިސައިލްތަކާ ބެހޭ އެއްވެސް ވާހަކައެއް ހިމަނާފައި ނުވާނެ ކަމަށެވެ.

އީރާން އިން އެ ގައުމުގެ މިސައިލް ޕްރޮގްރާމް އެންމެ ފުރަތަމަ ތަރައްޤީ ކުރަން ފެށީ 1980 ގެ އަހަރު ތަކުގައި އިރާޤާ އެކު ކުރި ހަނގުރާމައިގައި އީރާންގެ ވައިގެ ދިފާއީ ނިޒާމު ބަލި ކަށިވުމުން، އެކަން ފޫ ބެއްދުމަށެވެ. އޭގެ ފަހުން މިސައިލް ތަކުގެ ރޭންޖާއި އަމާޒަށް ވާސިލުވުމުގެ ޤާބިލުކަން ވަނީ ވަރަށް ބޮޑަށް އިތުރު ކޮށްފައި އެވެ. އީރާންއާ 1،500 ކިލޯ މީޓަރު ދުރުގައި އޮންނަ އިޒްރޭލް އިން އަބަދު ވެސް ދެކެނީ މި ޕްރޮގްރާމް އަކީ އެ ޤައުމުގެ ދެމި އޮތުމަށް އޮތް ނުރައްކަލެއްގެ ގޮތުގައި އެވެ.

މީގެ ކުރިން އެމެރިކާ އިން މަސައްކަތް ކުރީ އީރާންގެ ނިއުކްލިއާ މަޝްވަރާ ތަކުގެ ތެރޭގައި ބެލިސްޓިކް މިސައިލް ޕްރޮގްރާމް އާއި، ހަތިޔާރު އެޅި ޖަމާއަތް ތަކަށް އީރާން އިން ދޭ އެހީތެރި ކަމުގެ މައްސަލަ ހިމެނުމަށެވެ. ނަމަވެސް ފަހަކަށް އައިސް އެމެރިކާގެ ރައީސް ޑޮނަލްޑް ޓްރަމްޕް ވަނީ މިކަމުގައި ގެންގުޅުއްވާ ހަރުކަށި ސިޔާސަތަށް ކޮންމެ ވެސް ވަރެއްގެ ލުޔެއް ދެއްވާފައި އެވެ. ފްރާންސްގައި ބޭއްވި ޖީ7 ސަމިޓުގައި ވާހަކަފުޅު ދައްކަވަމުން ޓްރަމްޕް ވިދާޅުވީ، އެހެން ޤައުމު ތަކުގައި މިފަދަ ހަތިޔާރު ހުންނައިރު، އީރާން އަށް އެފަދަ އެއްޗެއް ނެތުމަކީ އިންސާފެއް ނޫން ކަމަށް ފެންނަ ކަމަށެވެ. 

އެމެރިކާ އާއި އިޒްރޭލް އިން އީރާން އަށް ދިން ހަމަލާތަކާ ގުޅިގެން ފެށުނު ހަނގުރާމައިގެ ތެރޭގައި، އީރާން އިން ވަނީ އަވަށްޓެރި ގަލްފްގެ ގައުމު ތަކުގައި ހުރި އެމެރިކާގެ އަމާޒު ތަކަށާއި، އިޒްރޭލް އަށް އަމާޒުކޮށް އެތައް ސަތޭކަ މިސައިލް އަދި ހާހަކަށް ވުރެ ގިނަ ޑްރޯން ފޮނުވާލާފަ އެވެ.