ރައްޔިތުންގެ މޫނު މަތީގައި ޖަހާލީ ހެޔޮވަރުގެ ތަފާއްޔެއް!

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުގައި ތިއްބެވި 10 ވަޒީރަކު ކުއްލި ގޮތަަކަށް އިސްތިއުފާ ދެއްވި އެވެ. ސަރުކާރުގައި ތިއްބެވި ނުފޫޒު ގަދަ އަދި ރައީސް މުޢިއްޒުގެ އަރިސް ވަޒީރުން ތަކެއް އިސްތިއުފާ ދެއްވުން ވެގެން ދިޔައީ، އާދައިގެ ކަމަކަށް ނޫނެވެ. ހަމަ އެ ދުވަހު، އެ ވަޒީރުން އިސްތިއުފާ ދެއްވީ ރައްޔިތުންގެ ވިންދާ އެއްގޮތަށް ވެރިކަން ކުރުމަށް ކަމަށް ރައީސް އޮފީހުން ބުނެ، ބަޔާނެއް ވެސް ނެރުނެވެ.

އެއާ އެކު ވެސް އާންމުންގެ ތެރޭގައި ގިނަ ބަޔަކު ސުވާލު އުފައްދަމުން ދިޔަ އެވެ. ވަކި ކުރެއްވި ބޭފުޅުންނަށް އިތުރު މަގާމެއް ސަރުކާރުން ނުދޭނެ ހެއްޔެވެ؟ ރައްޔިތުންގެ ވިންދާ އެއްގޮތަށް ވެރިކަން ހިންގުމަށް ބޭނުންވާތީ، އެ ވަޒީރުން އިސްތިއުފާ ދެއްވުމަށް ފަހު، އެހެން މަގާމެއް ދީފި ނަމަ އެއީ ގޯހެއް ކަމަށް ވެސް ގިނަ ބަޔަކު ބުންޏެވެ. 

އާޚިރުގައި ކަންތައް ވާން މި ފެށީ ވެސް އެހެންނެވެ. ވިންދާ އިޙުސާސްތަކާ އެއްގޮތަށް ވެރިކަން ކުރުމަށް އިސްތިއުފާ ދެއްވި ވަޒީރުންނަށް، އަލުން މަގާމު ދޭން ފަށައިފި އެވެ. ރައީސް މުޢިއްޒުގެ ކެބިނެޓުން އިސްތިއުފާ ދެއްވި ޠާރިޤު އިބްރާހީމް އާއި އާދަމް ޝަރީފް އުމަރަށް މަގާމެއް ދެއްވިކަން ހާމަވެއްޖެ އެވެ. ވަޒީރުންގެ ފެންވަރުގައި ދެ ބޭފުޅުންނަށް ދެއްވީ އެމްބެސެޑަރ އެޓް ލަރޖްގެ މަގާމެކެވެ. 

ރަށު ތެރޭގައި ވާހަކަ ދެެކެވެމުން އަންނަ ގޮތުގައި، ދެން ވެސް ތިއްބެވި ބޭފުޅުންނަށް މަގާމު ދެއްވަ އެވެ. ކެބިނެޓުން އިސްތިއުފާ ދެއްވި، އަދި ރައީސް މުޢިއްޒުގެ ނުހަނު އަރިސް ބޭފުޅެއް ކަމަށް ޑޮކްޓަރު އަލީ ހައިދަރު އަށް ވެސް މަގާމެއް ދެއްވާ ވާހަކަ ދެކެވެ އެވެ. އެގޮތުން ރައީސް އޮފީހުގެ ޕްރިންސިޕަލް ސެކްރެޓަރީގެ މަގާމަށް ހައިދަރު ހަމަޖައްސަވާ ވާހަކަ ދެކެވޭތާ ވެސް ދުވަސް ކޮޅެއް ވެއްޖެ އެވެ.

ކޮންމެ އަކަސް، އިސްތިއުފާ ދެއްވި ވަޒީރުންނަށް އަލުން މަގާމެއް ނުވަތަ ވަޒީފެއް ދިނުމުގެ ކަންކަން ސަރުކާރުން ކުރިއަށް ގެންދާ ވާާހަކައިގެ އަސްލު ފެންނަން ފަށައިފި އެވެ. މިއީ ރައްޔިތުންގެ ވިންދާއި އިޙުސާސްއާ އެއްގޮތަށް ވެރިކަން ކުރެއްވުމުގެ ނަމުގައި، ރައްޔިތުންގެ މޫނު މަތީގައި ޖަހާލި ހެޔޮ ވަރުގެ ތަފާއްޔެކެވެ. ރައްޔިތުންގެ ވިންދު ހުރީ ސަރުކާރުން ކުރާ ބޭކާރު ޚަރަދުތައް މަދު ކުރުމަށެވެ.

މަގާމުން ވަކި ކުރާ ބޭފުޅުންނާއި، އިސްތިއުފާ ދެއްވާ ބޭފުޅުންނަށް އަލުން މަގާމު ދިނުމަކީ ރައްޔިތުންގެ ވިންދެއް ނޫނެވެ. އިޙުސާސެއް ވެސް ނޫނެވެ. ރައްޔިތުން ބޭނުން ވަނީ އަދިވެސް ސަރުކާރުގެ ޚަރަދުތައް ކުޑަ ކުރުމަށެވެ. ބޭކާރު މަޤާމު ތަަކަށް މީހުން އައްޔަންކޮށް، ރައީސް މުޢިއްޒުގެ އަމިއްލަފުޅު ސިޔާސީ މަންފާ ހާސިލު ކުރުމަށް ކުރަމުން އަންނަ ބޭކާރު ޚަރަދުތައް ހުއްޓާލުމަކީ ރައްޔިތުންގެ ވިންދެވެ. ރައްޔިރުންގެ އިޙުސާސް އަކީ އެކަހަލަ ބޭކާރު ޚަރަދު ނުކޮށް، ރައްޔިތުންނަށް ކަމެއް ކޮށްދިނުމެވެ.