ރައްޔިތުންގެ އަސާސީ ބޭނުންތަކަށް ދެނީ "ވެއިޓިންގ ލިސްޓެއްގެ" ދަރަޖަ!

ރައްޔިތުން ހައިހޫނުކަމުގައި، ބޮޑެތި ބިލުތަކާއި ލޯނުތައް ބޮލުގައި އަޅައިގެން ތިބެ ހަނާވަނީއެވެ. ނަމަވެސް ސަރުކާރުން އެކަމަށް ފަރުވާލެއް ނެތި، މުއްސަނދި މަހުޖަނަކު ފަދައިން ބޮޑެތި ޖާފަތްތަކަށް އިސްރާފުކުރަމުން ދަނީއެވެ. ސަރުކާރުން ބޭނުންވާ ކަމެއް އޮތްނަމަ އެކަމެއް ކުރައްވައެވެ. ބަޖެޓުގެ ދަތިކަމެއް، މާލީ ދަތިކަމެއް، އެއިރަކު ނޯވެއެވެ. އެ ދަތިކަން އަންނަނީ މުޅިންވެސް، ރައްޔިތަކަށް ކަމެއް ކޮށްދޭންޖެހޭ ހިސާބުންނެވެ.

މުޅި ރާއްޖެއަށް ބަލާއިރު، ފަށާފައިވާ ބޯހިޔާވަހިކަމުގެ މަޝްރޫއުތައް ހުރީ ނުނިމިއެވެ. ގިނަ މަޝްރޫއުތައް ކުރިއަށްވެސް ނުދެއެވެ. ރަށްރަށުގައި ބިމުގެ އަޑިއަށް ބޯ ކޮށްޕާލައިގެން އިސްޖަހައިގެން ތިބި ހައިމާކުތަކާއި ކޮންނަ ބޯޓުތަކުގެ އަދަދުވެސް ވަކި މަދެއް ނޫނެވެ. އޭގެ ތެރޭގައި ގިނައީވެސް އިންތިޚާބާ ދިމާކޮށް ރަށްރަށަށް، ރައްޔިތުންގެ ލޮލުގައި އަނދުން އެޅުވުމަށް ފޮނުވި އުޅަނދުތަކެވެ.

ނިމިދިޔަ އަހަރަކީ މި ސަރުކާރުގެ ބޯހިޔާވަހިކަމުގެ ބޮޑު އަހަރުގެ ގޮތުގައި ބުނަމުން ދިޔަނަމަވެސް، ލިބޭނެ ކަމަށް ބުނި ގެދޮރުގެ އިންތިޒާރުގައި އާއިލާތައް އަދިވެސް ތިބީ ކެތްތެރިކަން ކޮޅުންލާފައެވެ. ގިނަ ބަޔަކު ދިރިއުޅެމުންދަނީ ތޮއްޖެހިފައިވާ ތަންތަނުގައި، އަތްނުފޯރާ ފަށުގެ ކުލި ދައްކަމުންނެވެ. ނުވިތާކަށް މިދިޔަ ސަރުކާރުން ދީފައިވާ ގޯއްޗާއި ފްލެޓުތަކަށްވެސް ވާނުވާ އަދިވެސް މުޅިއަކުން ސާފެއް ނުވެއެވެ.

ކަން މިހެން ހުރިނަމަވެސް، ދައުލަތުގެ ފައިސާ ދަނީ ހޭދަވަމުންނެވެ. ބަޖެޓުން ލާރި ދަނީ ހުސްވަމުންނެވެ. ކޮންމެ ދުވަހަކުވެސް ކޮންމެވެސް ރަސްމިއްޔާތެއް ބޭއްވުމާއި، ރިބަން ކެނޑުމާއި، ކުލަގަދަ އިޢުލާނުތައް ކުރުމާއި، ޚަބަރުތަކުގެ ސުރުޚީތައް ހޯދުމަށް މަސައްކަތް ކުރާތަން ފެންނަމުން ދިޔަނަމަވެސް، އަމަލީ މަސައްކަތެއް ނުފެންނާތީ ރައްޔިތުން ތިބީ ނުހަނު ބޮޑު މާޔޫސްކަމެއްގައެވެ.

އެންމެ ފަހުން މިއަދު ހެރިޓޭޖް މިނިސްޓްރީން އެ ބޭއްވި ނޫސްވެރިންގެ ބައްދަލުވުމުންވެސް ހާމަވެގެން ދިޔައީ ސަރުކާރުގެ ސާބިތު ސިޔާސަތުތަކެއް ނެތްކަމެވެ. ރައްޔިތުން އެންމެ އެދޭ ކަންކަން ފުނިޖެހިފައި ހުއްޓާ ދައުލަތުގެ ބަޖެޓުން މިވަގުތު ހޭދަކުރަންވީ "ދޫދޫ މަތިން ހަނދާނެއް ކުރުމުގެ ޤައުމީ މަޝްރޫއު" އަށް ތޯއެވެ؟ އެކަންކަން ވެސް ނުކުރާށެކޭ ނޫނެވެ. ނަމަވެސް ފުރަތަމަ ރައްޔިތުންގެ ތަކުލީފުތަކާއި މުހުތާދުތައް ބަލާލުން ކީއްތޯއެވެ؟ ބަޖެޓުން އިސްކަންދޭންވީ އެކަންކަމަކަށް ނޫންތޯއެވެ؟

މިދަނޑިވަޅުގައި، އާންމު ރައްޔިތުންގެ ދިރިއުޅުމާ ގުޅިފައިވާ އަސާސީ މަޝްރޫއުތައް ކުރިއަށްދަނީ ނުހަނު ލަސް ދުވެއްޔެއްގައެވެ. ރަށްރަށުގެ ރައްޔިތުން އަދިވެސް ތިބީ އަސާސީ އުމްރާނީ ވަސީލަތްތަކުގެ އިންތިޒާރުގައެވެ. ބަނދަރު ހެދުމުގެ މަޝްރޫއުތައް ލަސްވުމުގެ ސަބަބުން ރަށްރަށުގެ އިގްތިސާދަށް ވަނީ ހުރަސް އެޅިފައެވެ. މަގު ހެދުމުގެ މަޝްރޫއުތައް ނުނިމި ދިގުލައިގެން ދާތީ ޝަކުވާ ކުރާ ރައްޔިތުންވެސް މަދެއް ނޫނެވެ. ފެނާއި ނަރުދަމާގެ ނިޒާމުތައް ގާއިމުކޮށްދޭނެ ކަމަށް މީގެ އެތައް ދުވަހެއް ކުރިން ވައުދުވި ނަމަވެސް، އެ މަސައްކަތްތައް އަދިވެސް ހުރީ ނުނިމިއެވެ. ރައްޔިތުންގެ ބޭނުންތަކަށް ދެނީ "ވެއިޓިންގ ލިސްޓެއްގެ" ދަރަޖައެވެ.