އިގްތިސާދީ ގޮންޖެހުންތައް ބޮޑު ދަނޑިވަޅެއްގައި އެސްއޯއީތަކުގެ މިސްރާބު ގެއްލި، ރައްޔިތުން ސުވާލުމާކެއްގައި!
އިޤްތިސާދީ ގޮންޖެހުންތަކުން އަރައިގަތުމަށް މަސައްކަތްކުރަންޖެހޭ ދަނޑިވަޅެއްގައި، ސަރުކާރު ހިއްސާވާ ކުންފުނިތަކުގެ އިސް މަގާމުތަކަށް މެދުނުކެނޑި ބަދަލުތައް ގެންނާތީ އާންމުންގެ މެދުގައި ކަންބޮޑުވުން ވަނީ އިތުރުވެފައި. މިފަދަ ކުއްލި ބަދަލުތަކުގެ ސަބަބުން ސަރުކާރުގެ ހިންގުމުގެ ނިޒާމާއި ސިޔާސަތުތަކުގެ ހަމަޖެހުމާމެދު ސުވާލު އުފެދި، އިޤްތިސާދީ މައި ތަނބުތަކަށް ބުރޫއަރަމުންދާކަން ފާހަގަކުރެވޭ.
ރައީސް މުޢިއްޒު ވިދާޅުވީ ފީއަލީ ފެނަކަ އަށް މި ސަރުކާރުން ނެގީ 10 މުވައްޒަފުން ކަމަށް، އެކަމަކު މިހާތަނަށް 39 މުވައްޒަފުން ނަގައިފި | ރާއްޖެ އެމްވީ
މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ތެލުގެ އަގަށާއި، މުދާ އުފުލާ ނިޒާމުތަކަށް ކުރަމުންދާ އަސަރުތަކާ ގުޅިގެން ދުނިޔޭގެ ހުރިހާ ގައުމެއްގެ ސަރުކާރުތަކުން ވެސް މިހާރު ދަނީ ޚަރަދު ކުޑަކޮށް، އިޤްތިސާދީ އަޑިގުޑަންތަކުން އަރައިގަތުމަށް ރޭވުންތެރިކަމާއެކު ދުރާލާ މަސައްކަތްތައް ކުރަމުންނެވެ.
އެހެންނަމަވެސް ދިވެހިރާއްޖޭގައި ކަންކަން ހިނގަމުންދާ ގޮތް ފެނުމުން ރައްޔިތުންގެ ހިތަށް ތަސައްލީއެއް ލިބުމުގެ ބަދަލުގައި ލިބެމުންދަނީ އިތުރު ކަންބޮޑުވުންތަކެވެ. އުފެދެމުންދަނީ އިތުރު ސުވާލުތަކެކެވެ.
އިގްތިސާދީ ގޮތުން ރައްކާތެރިކަމުގެ ފިޔަވަޅުތައް އެޅުން އެންމެ މުހިންމު މި ދަނޑިވަޅުގައި އާންމު ރައްޔިތުންނަށް ފެންނަމުންދަނީ ސަރުކާރުގެ ނިޒާމުގެ ތެރޭގައި އޮތް ނުތަނަވަސްކަމެވެ. މި ނުތަނަވަސްކަމުގެ އެންމެ ސާފު އެއް ހެއްކަކީ، ސަރުކާރު ހިއްސާވާ ކުންފުނިތަކުގެ (އެސް.އޯ.އީ) އިސް މަގާމުތަކަށް މެދުނުކެނޑި ގެންނަމުންދާ ބަދަލުތަކެވެ. އެ ތަނުގެ އިސް މަޤާމުތަކަށް ކުއްލި ކުއްލިއަށް އެ ގެންނަމުންދާ ބަދަލުތަކާއެކު ސަރުކާރުގެ ސްޓެބިލިޓީއާމެދު ސުވާލު އުފައްދާ ރައްޔިތުން ވެސް މަދެއް ނޫނެވެ.
މެނޭޖިންގ ޑިރެކްޓަރުން އިސްތިއުފާ ދެއްވުމާއި، މަގާމުތަކުން ވަކިކޮށް އަވަސްއަވަހަށް ބަދަލުކުރަމުން ދިއުމުގެ ސަބަބުން ސަރުކާރުގެ އަމަލުތައް ހުރީ ދުރާލާ ރޭވިފައިވާ ސިޔާސަތެއްގެ ދަށުން ނޫންކަން އެނގި ހާމަވަމުން އެބަ ދެއެވެ.
ސަރުކާރު ހިއްސާވާ ކުންފުނިތަކަކީ އާދައިގެ މުއައްސަސާތަކެއް ނޫނެވެ. އެއީ ދަތުރުފަތުރާއި، ބޯހިޔާވަހިކަމާއި، މަސްވެރިކަމާއި، އަސާސީ ހިދުމަތްތައް ފަދަ މުހިންމު ދާއިރާތައް ބަލަހައްޓާ، ދިވެހި އިގްތިސާދުގެ މައި ތަނބުތަކެވެ.
އިގްތިސާދީ ދަތި ދަނޑިވަޅެއްގައި މި މުއައްސަސާތައް ހިންގަންވާނީ ހަމަޖެހުމާއި، ފަންނީ ގާބިލުކަމާއި، ސާފު މިސްރާބެއްގެ ދަށުންނެވެ. އިސް މަގާމުތަކަށް އަވަސްއަވަހަށް ބަދަލު އައުމަކީ އެ ހަމަޖެހުން ގެއްލޭ ކަމެކެވެ. އޭގެ ސަބަބުން ނިންމުންތައް ނިންމުން ލަސްވެ، ދުރު ރާސްތާގެ ރޭވުންތަކަށް ބުރޫއަރައި، މުވައްޒަފުންގެ މެދުގައި ނުތަނަވަސްކަން އުފެދެއެވެ.
މިއަށްވުރެ ވެސް ކަންބޮޑުވާން ޖެހޭ ކަމަކީ މިފަދަ ކުއްލި ބަދަލުތަކުގެ ސަބަބުން އާންމު ރައްޔިތުންނަށް ލިބޭ ނުބައި މެސެޖެވެ. އެއީ، ގައުމުގެ އެންމެ މަތީ ފަންތީގައި ތިއްބެވި ބޭފުޅުންނަށް ޤައުމުގެ ހާލަތު ކޮންޓްރޯލް ނުކުރެވޭ ކަމުގެ އިޝާރާތެކެވެ. ރައްޔިތުން މިއަދު އެ ވާހަކަ ތުންތުންމަތިން ދައްކަންވެސް ފަށައިފިއެވެ.
ވެރިކަމުގެ މަތީ ފަޑީގެ އިސް މަގާމުތަކަށް މެދުނުކެނޑި ބަދަލު އަންނަތަން ފެނުމުން، އެ ބަދަލުތަކުގެ ފަހަތުގައިވާ ސަބަބުތަކާ މެދު ރައްޔިތުން ސުވާލު އުފައްދަން ފަށައެވެ. އެ ނިންމުންތަކަކީ މަސައްކަތުގެ ފެންވަރަށާއި ޒިންމާދާރުކުރުވުމަށް ބިނާކޮށް ނިންމާ ނިންމުންތަކެއް ހެއްޔެވެ؟ ނުވަތަ އެއީ ސިޔާސީ މަސްލަހަތުތަކެއްގެ މައްޗަށް ބިނާވެފައިވާ ކަންކަން ހެއްޔެވެ؟ ސަރުކާރުގެ ދުރު ރާސްތާގެ ރޭވުމެއް އެބައޮތް ހެއްޔެވެ؟ ނުވަތަ ސަރުކާރުން މަސައްކަތް ކުރަނީ ކުރިމަތިވާ ފިއްތުންތަކަށް ވަގުތުން ވަގުތަށް ހައްލެއް ހޯދުމަށް އެކަނި ހެއްޔެވެ؟
މިއީ ކުދިކުދި ޝައްކުތަކެއް ނޫނެވެ. މިއީ ސަރުކާރު ހިންގުމުގެ އަސާސްތަކާ ގުޅިފައިވާ ސުވާލުތަކެވެ. އިގްތިސާދީ ނުތަނަވަސްކަމުގެ ވަގުތެއްގައި، ސަރުކާރުގެ ސިޔާސަތުތަކެކޭ އެއްވަރަށް، ރައްޔިތުންނަށް އެ ސިޔާސަތުތަކާ މެދު ޔަޤީންކަން އޮތުން ވެސް މުހިއްމެވެ.
ހަމައެއާއެކު، ހަރަދު ކުޑަކުރުމާއި އިޤްތިސާދީ ގޮންޖެހުންތަކުން އަރައިގަތުމަށް ކުރެވޭ މަސައްކަތެއް މި ދަނޑިވަޅުގައި ރައްޔިތުންނަށް ދެއްކުމުގެ ބަދަލުގައި މުޅިން ވެސް ފެންނަމުން މި ދަނީ ސަރުކާރު ހިއްސާވާ ކުންފުނިތަކާއި ސިޔާސަތުތަކުގެ މިސްރާބު އޮޅުންބޮޅުން ވަމުންދާ މަންޒަރެވެ.
ދިވެހިރާއްޖެއިން މީގެ ކުރިންވެސް ގޮންޖެހުންތަކާ ކުރިމަތިލައި، އެކަންކަމުން އަރައިގަނެފައިވެއެވެ. ކޮވިޑް 19 ގެ ބަލި މަޑުކަމާއި، އޭގެ ކުރިން ދިމާވި އެފަދަ ދަތި އުނދަގޫ ވަގުތުތަކުގައިވެސް އޭރުގެ ސަރުކާރުތަކުން މަސައްކަތް ކޮށްފައިވަނީ ރައްޔިތުންގެ މެދުގައި އޮންނަ ނުތަނަވަސްކަން ވިހާ ވެސް ކުޑަކުރުމަށެވެ. އެކަން ޙާސިލުވުން އަބަދު ވެސް ބިނާވެފައި އޮންނަނީ ސާބިތު ލީޑަޝިޕަކާއި ރައްޔިތުންގެ އިތުބާރުގެ މައްޗަށެވެ. މިވަގުތު މި ދެކަންތައް ވެސް ފެންނަނީ ބަލިކަށިވެފައިވާ ތަނެވެ.
އެހެންކަމުން އަޅުގަނޑަށް ޤަބޫލު ކުރެވޭ ގޮތުގައި ދުނިޔެއަށް ކުރިމަތިވެފައިވާ މި އިގްތިސާދީ ނުތަނަވަސްކަމުގެ ތެރެއިން ގައުމު ސަލާމަތްކުރުމަށް ސަރުކާރުން ސީރިއަސްވާ ނަމަ، އެންމެ ފުރަތަމަ ކުރަންޖެހޭ ކަމަކީ ސަރުކާރުގެ އެތެރޭގައި އޮތް ނުތަނަވަސްކަމާއި ހަމަނުޖެހުންތަކަށް ހައްލެއް ހޯދުމެވެ.
