ގަތަރުގެ ގޭސް ޕްލާންޓެއް ގޮވައި 18 މީހަކު ގެއްލި، 54 ޒަޚަމް
ގަތަރުގެ ރަސް ލައްފާންގައި ހުންނަ ބަރްޒާން ގޭސް ފެސިލިޓީ އަލުން ހުޅުވަން އުޅުމުގެ ތެރޭގައި ހިނގި ޓެކްނިކަލް މައްސަލައަކާ ގުޅިގެން ބާރުގަދަ ގޮވުމެއް ގޮވައި، ގިނަ ބަޔަކަށް ވަނީ އެކިވަރުގެ އަނިޔާތައް ލިބިފައި. މި ހާދިސާއާ ގުޅިގެން ކަމާބެހޭ އިދާރާތަކުން ހަރަކާތްތެރިވެ އަލިފާންގަނޑު މިހާރު ކޮންޓްރޯލް ކޮށްފައިވާއިރު، ގެއްލުނު މީހުން ހޯދުމުގެ މަސައްކަތް ރެސްކިއު ޓީމުތަކުން ދަނީ ކުރަމުން. ގައުމުގެ އެތެރޭގެ ބާޒާރަށް ބޭނުންވާ ހަކަތަ ފޯރުކޮށްދޭ މި މަރުކަޒަށް ލިބުނު ގެއްލުމުގެ ތަފްސީލު ގަތަރު އެނާޖީން އަދި ހާމަކޮށްފައެއް ނުވޭ.
ޤަޠަރުގެ ރަސް ލައްފާންގައި ހުންނަ އިސްތިރާތީޖީ ސިނާއީ ސަރަހައްދެއްގައި ބާރުގަދަ ގޮވުމެއް ގޮވާފައިވާ ކަމަށް އެ ގައުމުގެ އިންޓީރިއާ މިނިސްޓްރީން ރިޕޯޓްކޮށްފި. | އެކްސް
ގަތަރުގެ ގުދުރަތީ ގޭސް (އެލް.އެން.ޖީ) އުފައްދާ މައި މަރުކަޒު ކަމަށްވާ ރަސް ލައްފާންގައި އާދީއްތަ ދުވަހު ހިނގި ގޮވުމެއްގައި 54 މީހަކު ޒަޚަމްވެ، 18 މީހަކު ގެއްލިފައިވާ ކަމަށް އެ ގައުމުގެ ކަމާބެހޭ އިދާރާތަކުން ބުނެފިއެވެ.
ގަތަރުގެ ހަކަތައާ ބެހޭ ގައުމީ ކުންފުނި، ގަތަރު އެނާޖީން ނެރުނު ބަޔާނެއްގައި ބުނެފައިވަނީ، ރަސް ލައްފާން އިންޑަސްޓްރިއަލް ސިޓީގައި ހުންނަ ބަރްޒާން ލޯކަލް ގޭސް ސަޕްލައި ފެސިލިޓީގެ މަސައްކަތްތައް އަލުން ފެށުމަށް އުޅުމުގެ ތެރޭގައި އާދީއްތަ ދުވަހުގެ އިރުއޮއްސުނު ވަގުތު ބާރުގަދަ ގޮވުމަކާއެކު އަލިފާނުގެ ހާދިސާއެއް ހިނގާފައިވާ ކަމަށެވެ. މި ހާދިސާއާ ގުޅިގެން ކަމާބެހޭ އިމަޖެންސީ ޓީމުތަކުން ހަރަކާތްތެރިވެ، މިހާރު އަލިފާންގަނޑު ކޮންޓްރޯލް ކޮށްފައިވާ ކަމަށްވެސް އެ ކުންފުނިން ބުނެފައިވެއެވެ.
ގަތަރުގެ އިންޓީރިއާ މިނިސްޓްރީން ނެރުނު ބަޔާނެއްގައި ބުނެފައިވަނީ، މި ހާދިސާގައި 54 މީހަކަށް އެކިވަރުގެ އަނިޔާތައް ލިބިފައިވާއިރު، ގެއްލިފައިވާ 18 މީހަކު ހޯދުމުގެ މަސައްކަތް ރެސްކިއު ޓީމުތަކުން ކުރަމުންދާ ކަމަށެވެ. މި ގޮވުން ގޮވަން މެދުވެރިވީ "ޓެކްނިކަލް މައްސަލައެއްގެ" ސަބަބުން ކަމަށާއި، އާންމުންގެ ސަލާމަތަށް އެއްވެސް ނުރައްކަލެއް ނެތް ކަމަށްވެސް އެ މިނިސްޓްރީން ބުނެފައިވެއެވެ.
ގަތަރުގެ އެތެރޭގެ ބާޒާރަށް ބޭނުންވާ ގޭސް ފޯރުކޮށްދޭ މި ޕްލާންޓަށް ލިބުނު ގެއްލުމުގެ ތަފްސީލެއް ގަތަރު އެނާޖީން ހާމަކޮށްފައެއް ނުވެއެވެ.
ރޮއިޓާސްގެ މުރާސިލަކު ރިޕޯޓްކޮށްފައިވާ ގޮތުގައި، ރަސް ލައްފާން ފެސިލިޓީގެ ދެކުނުން އޮންނަ ގަތަރުގެ ވެރިރަށް ދޯހާއަށްވެސް މި ގޮވުމުގެ ބާރުގަދަ އަޑު ވަނީ އިވިފައެވެ.
ބަރްޒާން ގޭސް ފެސިލިޓީއަކީ ދުވާލަކު 1.4 ބިލިއަން ކިއުބިކް ފީޓުގެ ގޭސް އުފެއްދުމުގެ ގާބިލުކަން ހުންނަ ތަނެކެވެ. މި ތަނުން ގޭސް ފޯރުކޮށްދެނީ ގަތަރުގެ ސިނާއީ މަސައްކަތްތަކަށާއި ކަރަންޓު އުފައްދާ މަރުކަޒުތަކަށެވެ.
މީގެ އިތުރުން، މި ފެސިލިޓީއަކީ ގައުމުން ބޭރަށް އެކްސްޕޯޓް ކުރުމަށާއި އެތެރޭގެ ބާޒާރަށް ބޭނުންވާ އީތޭން، ކޮންޑެންސޭޓް، ލިކުއިފައިޑް ޕެޓްރޯލިއަމް ގޭސް (އެލް.ޕީ.ޖީ) އަދި ސަލްފާ އުފެއްދުމުގެ ގާބިލުކަންވެސް ލިބިފައިވާ ތަނެކެވެ.
މި ހާދިސާ ހިނގި ރަސް ލައްފާން އިންޑަސްޓްރިއަލް ސިޓީއަކީ ގަތަރު އެނާޖީން އެލް.އެން.ޖީ އުފައްދައި ބޭރުކުރާ އެންމެ މައި މަރުކަޒެވެ. މި ސަރަހައްދުގައި ހުންނަ 14 ޕްރޮޑަކްޝަން ލައިން ނުވަތަ ޓްރެއިންތަކުން އަހަރަކު 77 މިލިއަން މެޓްރިކް ޓަނުގެ ގޭސް އުފެއްދުމުގެ ގާބިލުކަން ހުރެއެވެ.
