8.6 ބިލިއަން ޑޮލަރުގެ އަސްކަރީ ސާމާނު ގަތަރާއި، ކުވެއިތު، ޔޫއޭއީއޭ އަދި އިޒްރޭލަށް ވިއްކުމަށް އެމެރިކާ އިން ހުއްދަދީފި

އެމެރިކާގެ މެދުއިރުމަތީގެ ބައިވެރިން ކަމަށްވާ އިޒްރޭލާއި، ގަތަރާއި، ކުވެއިތުގެ އިތުރުން ޔުނައިޓެޑް އެރަބް އެމިރޭޓްސް (ޔޫއޭއީ) އަށް ޖުމްލަ 8.6 ބިލިއަން ޑޮލަރަށްވުރެ ގިނަ އަދަދެއްގެ އަސްކަރީ ސާމާނު ވިއްކުމުގެ ހުއްދަ ދީފައިވާކަން އެމެރިކާގެ ސްޓޭޓް ޑިޕާޓްމަންޓުން ހުކުރު ދުވަހު ހާމަކޮށްފިއެވެ.

މިކަން އިއުލާނުކޮށްފައި މިވަނީ، އެމެރިކާއާއި އިޒްރޭލުން އީރާނާ ދެކޮޅަށް ކުރަމުންދާ ހަނގުރާމައަށް ނުވަ ހަފުތާވެފައި ވަނިކޮށެވެ. އަދި މިއީ އެ ހަނގުރާމައިގައި އިއުލާނުކުރި ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށިތާ ތިން ހަފުތާއަށްވުރެ ގިނަ ދުވަސް ފަހުންނެވެ.

ހުކުރު ދުވަހު ސްޓޭޓް ޑިޕާޓްމަންޓުން ނެރުނު ބަޔާނުގައިވާ ގޮތުން، ގަތަރަށް 4.01 ބިލިއަން ޑޮލަރުގެ "ޕެޓްރިއަޓް" އެއާ އެންޑް މިސައިލް ޑިފެންސް ރިޕްލެނިޝްމަންޓް ޚިދުމަތްތަކާއި، 992.4 މިލިއަން ޑޮލަރުގެ "އެޑްވާންސްޑް ޕްރެސިޝަން ކިލް ވެޕަން ސިސްޓަމްސް" (އޭޕީކޭޑަބްލިއުއެސް) ވިއްކުމަށް ވަނީ ހުއްދަ ދީފައެވެ.

މީގެ އިތުރުން، ކުވެއިތަށް 2.5 ބިލިއަން ޑޮލަރުގެ "އިންޓެގްރޭޓެޑް ބެޓްލް ކޮމާންޑް ސިސްޓަމް" އެއް ވިއްކުމަށާއި، އިޒްރޭލަށް 992.4 މިލިއަން ޑޮލަރުގެ "އެޑްވާންސްޑް ޕްރެސިޝަން ކިލް ވެޕަން ސިސްޓަމްސް" ވިއްކުމަށް ވެސް ވަނީ ނިންމާފައެވެ.

ހަމައެއާއެކު، ޔޫއޭއީއަށް 147.6 މިލިއަން ޑޮލަރުގެ "އޭޕީކޭޑަބްލިއުއެސް" ވިއްކުމުގެ ހުއްދަ ވެސް ސްޓޭޓް ޑިޕާޓްމަންޓުން ވަނީ ދީފައެވެ.

ސްޓޭޓް ޑިޕާޓްމަންޓުން ބުނި ގޮތުގައި، ގަތަރާއި އިޒްރޭލު އަދި ޔޫއޭއީއަށް ވިއްކާ "އޭޕީކޭޑަބްލިއުއެސް" ހަތިޔާރުތައް ފޯރުކޮށްދޭ މައިގަނޑު ކުންފުންޏަކީ ބީއޭއީ ސިސްޓަމްސްއެވެ.

ކުވެއިތަށް ވިއްކާ "އިންޓެގްރޭޓެޑް ބެޓްލް ކޮމާންޑް ސިސްޓަމް" އާއި ގަތަރަށް ވިއްކާ "ޕެޓްރިއަޓް" މިސައިލް ޑިފެންސް ސިސްޓަމްގެ ޚިދުމަތްތައް ފޯރުކޮށްދޭ މައިގަނޑު ކުންފުނިތަކަކީ އާރްޓީއެކްސް އަދި ލޮކްހީޑް މާޓިން ކަމަށް ވެސް ސްޓޭޓް ޑިޕާޓްމަންޓުން ބުންޏެވެ.

މީގެ އިތުރުން، ކުވެއިތަށް ވިއްކާ ސާމާނު ފޯރުކޮށްދިނުމުގައި ނޯތުރޮޕް ގްރަމަން ކުންފުނި ވެސް މައިގަނޑު ބައިވެރިއެއްގެ ގޮތުގައި ހިމެނެއެވެ.