މެދު އިރުމަތީގެ ޤައުމު ތަކާއި އިޒްރޭލް އަށް، 8.6 ބިލިއަން ޑޮލަރުގެ ހަތިޔާރު ވިއްކުމަށް އެމެރިކާ އިން ހުއްދަ ދީފި

އެމެރިކާގެ މެދު އިރުމަތީގެ ބައިވެރިން ކަމަށްވާ ޤަތަރާއި، ކުވެއިތާއި، ޔުނައިޓެޑް އަރަބް އެމިރޭޓްސް (ޔޫއޭއީ)ގެ އިތުރުން އިޒްރޭލް އަށް 8.6 ބިލިއަން އެމެރިކާ ޑޮލަރަށް ވުރެ ގިނަ އަދަދެއްގެ ހަތިޔާރު ވިއްކުމުގެ ހުއްދަ، އެމެރިކާގެ ސްޓޭޓް ޑިޕާޓްމަންޓް އިން ދީފި އެވެ. 

އެމެރިކާގެ ސްޓޭޓް ޑިޕާޓްމަންޓް އިން މި ހުއްދަ ދީފައި ވަނީ ހުކުރު ދުވަހު އެވެ. މި ނިންމުން އިއުލާން ކޮށްފައި މި ވަނީ އެމެރިކާގެ އެހީތެރިކަމާ އެކު، އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމަ އަށް ނުވަ ހަފުތާ ވެފައި ވަނިކޮށެވެ. އަދި މިއީ ހަނގުރާމަ ހުއްޓާލުމުގެ ނާޒުކު އެއްބަސްވުމަަކަށް އަމަލުކުރަން ފެށިތާ ތިން ހަފުތާއަށް ވުރެ ގިނަ ދުވަސްވީ ފަހުން، އެމެރިކާ އިން ނިންމި ނިންމުމެކެވެ. 

އެމެރިކާގެ ސްޓޭޓް ޑިޕާޓްމަންޓް އިން އާންމު ކޮށްފައިވާ ތަފްސީލު ތަކަށް ބަލާއިރު، ޤަތަރަށް ވިއްކުމަށް ހަމަޖެހިފައި ވަނީ ޕެޓްރިއަޓް އެއާ އެންޑް މިސައިލް ޑިފެންސް ރިޕްލެނިޝްމަންޓް ސާވިސަސް އާއި، އެޑްވާންސްޑް ޕްރިސިޝަން ކިލް ވެޕަން ސިސްޓަމްސް (އޭޕީކޭޑަބްލިއުއެސް) އެވެ. މީގެ ތެރެއިން މިސައިލް ޑިފެންސް ސިސްޓަމްގެ އަގު 4.01 ބިލިއަން އެމެރިކާ ޑޮލަރަށް އަރާއިރު، އޭޕީކޭޑަބްލިއުއެސް ހަތިޔާރުގެ އަގަކީ 992.4 މިލިއަން އެމެރިކާ ޑޮލަރެވެ. 

މީގެ އިތުރުން ކުވެއިތަށް 2.5 ބިލިއަން އެމެރިކާ ޑޮލަރުގެ އިންޓަގްރޭޓެޑް ބެޓްލް ކޮމާންޑް ސިސްޓަމެއް ވިއްކުމަށް ވަނީ ހުއްދަ ދީފަ އެވެ. އަދި އިޒްރޭލް އަށް 992.4 މިލިއަން އެމެރިކާ ޑޮލަރުގެ އެޑްވާންސްޑް ޕްރިސިޝަން ކިލް ވެޕަން ސިސްޓަމްސް ވިއްކުމަށް ނިންމާފައިވާއިރު، ޔޫއޭއީ އަށް ވެސް 147.6 މިލިއަން އެމެރިކާ ޑޮލަރުގެ އެފަދަ ހަތިޔާރު ވިއްކުމަށް ވަނީ ހަމަޖެހިފަ އެވެ. 

މި މުއާމަލާތުގެ ދަށުން ޤަތަރާއި، އިޒްރޭލް އަދި ޔޫއޭއީ އަށް ވިއްކާ އޭޕީކޭޑަބްލިއުއެސް ހަތިޔާރު ފޯރުކޮށްދޭ މައިގަނޑު ކޮންޓްރެކްޓަރަކީ ބީއޭއީ ސިސްޓަމްްސް ކަމަށް ސްޓޭޓް ޑިޕާޓްމަންޓް އިން ބުނެފައިވެ އެވެ. އަދި ކުވެއިތަށް ވިއްކާ ބެޓްލް ކޮމާންޑް ސިސްޓަމް އާއި، ޤަތަރަށް ވިއްކާ ޕެޓްރިއަޓް މިސައިލް ޑިފެންސް ސިސްޓާމްގެ މަސައްކަތްތައް ކުރިއަށް ގެންދާނީ އާރުޓީއެކްސް އަދި ލޮކްހީޑް މާޓިން ކުންފުނިން އެވެ. 

ކުވެއިތަށް ހަތިޔާރު ވިއްކުމުގެ މަޝްރޫއުގައި ނޯތުރޮޕް ގްރަމަން ކުންފުނި ވެސް މައިގަނޑު ކޮންޓްރެކްޓަރެއްގެ ގޮތުގައި ބައިވެރި ވާނެ ކަމަށް އެމެރިކާގެ ސްޓޭޓް ޑިޕާޓްމަންޓް އިން މައުލޫމާތު ދީފައިވެ އެވެ. މި ބޮޑު އަދަދުގެ ހަތިޔާރުގެ މުއާމަލާތް ތަކަކީ މެދު އިރުމަތީގެ ސަލާމަތީ މަސްރަހަށް އަންނަމުންދާ ބަދަލުތަކާ ގުޅިގެން އެމެރިކާގެ ބައިވެރިންގެ ދިފާއީ ޤާބިލުކަން އިތުރު ކުރުމަށް ނިންމި ނިންމުމެއް ކަމަށް ބެލެވެ އެވެ.