ވަޒީރެއްގެ ފެންވަރުގައި އަނެއްކާވެސް ނާޒިމް ސަރުކާރަށް
ކުރީގެ ހެލްތު މިނިސްޓަރު އަބްދުﷲ ނާޒިމް އިބްރާހީމް، މިނިސްޓަރު ފެންވަރުގައި ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމަށް އައްޔަންކުރައްވައިފި.
ނާޒިމް ނޫސްވެރިންގެ ބައްދަލުވުމެއްގައި ވާހަކަދައްކަވަނީ | ރާއްޖެ އެމްވީ
ކުރީގެ ހެލްތު މިނިސްޓަރު އަބްދުﷲ ނާޒިމް އިބްރާހީމް، މިނިސްޓަރު ފެންވަރުގައި އަނެއްކާވެސް ރައީސް އޮފީހުގެ އިސް މަގާމަކަށް އައްޔަން ކުރައްވައިފިއެވެ. މައުލޫމާތު ލިބިފައިވާ ގޮތުގައި ނާޒިމް މި މަގާމަށް އައްޔަން ކުރައްވާފައި ވަނީ ނިމިދިޔަ ހަފުތާގެ ތެރޭގައެވެ.
މިފަހަރު ނާޒިމް އައްޔަން ކުރައްވާފައި ވަނީ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމަށެވެ. މިއީ މިނިސްޓަރުންގެ ފެންވަރުގެ މަގާމެކެވެ. ނާޒިމް އަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައި ވެސް ހެލްތު މިނިސްޓަރުކަން ކުރެއްވި ބޭފުޅެކެވެ.
މި ސަރުކާރު ފެށުނުއިރު ވެސް ނާޒިމް ފުރަތަމަ ހުންނެވީ ރައީސް އޮފީހުގެ އިސް މަގާމެއްގަ އެވެ. ނަމަވެސް އެ މަގާމުގައި ހުންނަވަނިކޮށް، 2024 ސެޕްޓެމްބަރު 30 ގައި އޭނާ ވަނީ ހެލްތު މިނިސްޓަރުގެ މަގާމަށް އައްޔަން ކުރައްވައިފައެވެ. ނާޒިމް ހެލްތު މިނިސްޓަރުގެ މަގާމުން އިސްތިއުފާ ދެއްވީ މިދިޔަ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިޚާބާއި ރެފަރަންޑަމް ވޯޓުގައި ސަރުކާރަށް ލިބުނު ނާކާމިޔާބީ އަށް ފަހު ކެބިނެޓަށް ގެނައި ބަދަލުތަކުގެ ތެރޭގަ އެވެ.
އެގޮތުން މިދިޔަ އޭޕްރީލް މަހުގެ 14 ވަނަ ދުވަހު ގިނަ މިނިސްޓަރުންތަކެއް މަގާމުން އިސްތިއުފާ ދެއްވިއިރު، އޭގެ ތެރެއިން ބައެއް ބޭފުޅުންނަށް ސަރުކާރުން އިސް މަޤާމުތައް ދެމުންދާކަން ފާހަގަކުރެވެ އެވެ. ނާޒިމްގެ އިތުރުން، ލޯކަލް ގަވަމެންޓް މިނިސްޓަރުގެ މަގާމުން އިސްތިއުފާ ދެއްވި އާދަމް ޝަރީފް އުމަރު ގަތަރަށް ކަނޑައަޅާ ސަފީރަކަށް އައްޔަން ކުރެއްވުމަށް ވަނީ ނިންމަވައިފައެވެ.
މީގެ އިތުރުން، އެންވައިރޮމެންޓް މިނިސްޓަރުގެ މަގާމުގައި ހުންނެވި ތޯރިގް އިބްރާހީމް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކަނޑައަޅާ ސަފީރަކަށް އައްޔަން ކުރެއްވުމަށް ވެސް ސަރުކާރުން ވަނީ ނިންމަވައިފައެވެ. މި ބަދަލުތަކަކީ ސަރުކާރުގެ ސިޔާސަތުތައް ތަންފީޒު ކުރުމުގައާއި ބޭރުގެ ގައުމުތަކާއެކު އޮންނަ ގުޅުން ވަރުގަދަ ކުރުމަށް ރައީސުލްޖުމްހޫރިއްޔާ ގެންނަވަމުންދާ ބަދަލުތަކެއް ކަމަށް ބެލެވެއެވެ.
