ހަނގުރާމަ ނިންމުމަށް ސުލްޙަވެރި އޮނިގަނޑެއްގެ ތެރެއިން މަސައްކަތް ކުރަން އީރާން އޮތީ ތައްޔާރަށް: އީރާންގެ ރައީސް

ސަރަޙައްދީ ހަނގުރާމަ އާއި ނުތަނަވަސްކަން ނިމުމަކަށް ގެނައުމަށްޓަކައި، އިއްޒަތްތެރި، ގަދަރުވެރި އަދި ސުލްޙަަވެރި އޮނިގަނޑެއްގެ ތެރެއިން މަސައްކަތް ކުރުމަށް އީރާން ތައްޔާރަށް އޮތް ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.

އީރާންގެ ރައީސް މިހެން ވިދާޅުވީ ގަތަރުގެ އަމީރު ޝެއިޚް ތަމީމް ބިން ޙަމަދު އައްޘާނީއާ އެކު އަންގާރަ ދުވަހު ފޯނުން ގުޅުއްވައި ދެއްކެވި ވާހަކަފުޅުގަ އެވެ. އީރާނުގެ ރައީސްގެ މީޑިއާ އޮފީހުން ހާމަ ކޮށްފައިވާ ގޮތުގައި، މި މަޝްވަރާ ތަކުގައި ޕެޒެޝްކިއާން ވަނީ މަޝްވަރާގެ މަގުން ކަންކަން ހައްލު ކުރުމުގައި އީރާން އިން އަބަދުވެސް އިޚުލާޞްތެރިކަމާއި ސާބިތުކަން ދައްކާފައި ވާނެކަން ފާހަގަ ކުރައްވާފައި އެވެ. އަދި މިހާރު މިއީ އަނެއް ފަރާތުން އެމީހުންގެ އިޚުލާޞްތެރިކަން ދައްކަން ޖެހޭ ވަގުތު ކަމަށާއި، ބަހާއި އަމަލުން ބައިނަލްއަގުވާމީ ޒިންމާ ތަކަށް އެފަރާތް ތަކުން ތަބާވާން ޖެހޭ ކަމަށް ވެސް ޕެޒެޝްކިއާން ވިދާޅުވި އެވެ.

މި ފޯނު ކޯލުގައި ޕެޒެޝްކިއާން ވަނީ ސަރަޙައްދީ ސުލްހައަށްޓަކައި ގަތަރުގެ ސަރުކާރުން ކުރަމުންދާ ބިނާ ކުރުވަނިވި މަސައްކަތް ތަކަށް ޝުކުރު އަދާ ކުރައްވާފަ އެވެ. ވަކިން ހާއްސަކޮށް ސުލްހަ ގާއިމު ކުރުމުގައި ގަތަރުގެ އަމީރު އަމަލީ ގޮތުން އަދާކު ރައްވާ ދައުރު އީރާންގެ ރައީސް ފާހަގަ ކުރެއްވި އެވެ. އޭގެ ޖަވާބުގައި ގަތަރުގެ އަމީރު ޝެއިޚް ތަމީމް ވިދާޅުވީ، ސަރަޙައްދީ ހަމަޖެހުމާއި ސަލާމަތް ތެރިކަން ގާއިމު ކުރުމަށްޓަކައި ޤަތަރުން ކުރަމުންދާ މަސައްކަތްތައް ހުއްޓައި ނުލާ ކުރިއަށް ގެންދާނެ ކަމަށާއި، މެދުވެރިއެއްގެ ދައުރު އަދާ ކުރުމުގައި ދެމިއޮންނާނެ ކަމަށެވެ.

މި ސަރަޙައްދުގައި ނުތަނަވަސްކަން އުފެދިފައި ވަނީ މިއަހަރުގެ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް ގުޅިގެން އީރާންއާ ދެކޮޅަށް ހަމަލާ ތަކެއް ދޭން ފެށުމާ ގުޅިގެންނެވެ. އެ ހަމަލާ ތަކުގައި އީރާންގެ ކުރީގެ ރޫހީ ލީޑަރު އާޔަތުﷲ ސައްޔިދު އަލީ ޚާމަނާއީ ހިމެނޭހެން، އީރާން ސަރުކާރުގެ އިސް ބޭފުޅުންނާއި އަސްކަރީ ކޮމާންޑަރުން ވަނީ އަވަހާރަ ކޮށްލާފައި އެވެ.

މި ހަމަ ލާތަކުގެ ރައްދުގައި އީރާންގެ އަސްކަރިއްޔާ އިން ވަނީ އެމެރިކާ އާއި އިޒްރޭލްގެ މުހިންމު އަދި އިސްތިރާތީޖީ އަމާޒުފަތް ތަކަށް 100 އަށް ވުރެ ގިނަ ރައްދު ހަމަލާތައް ކާމިޔާބުކަމާ އެކު ފޮނުވާލާފައި އެވެ.

ހަނގުރާމަ އަށް 40 ދުވަސްވީ ފަހުން، އޭޕްރިލް މަހުގެ އަށް ވަނަ ދުވަހު ޕާކިސްތާންގެ މެދުވެރިވުމާ އެކު އެމެރިކާ އާއި އީރާންއާ ދެމެދު ވަނީ ހަނގުރާމަ ހުއްޓާލުމުގެ އެއްބަސްވުމެއް ގާއިމު ކޮށްފައި އެވެ. މިހާރު ދެ ޤައުމުގެ ދެ މެދުގައި މަޝްވަރާތައް ކުރިއަށް ދަނީ ދާއިމީ ގޮތެއްގައި ހަނގުރާމަ ހުއްޓާލުމަށެވެ.