"ހަކަތަ ލިބުމުގެ ދަތިކަމާ" ދުނިޔެއަށް ވަރަށް އަވަހަށް ކުރިމަތިލާން ޖެހޭނެ ކަމުގެ އިންޒާރު ގަތަރުގެ ފިނޭންސް މިނިސްޓަރު ދެއްވައިފި

"ހަކަތަ ލިބުމުގެ ދަތިކަމާ" ދުނިޔެއަށް ވަރަށް އަވަހަށް ކުރިމަތިލާން ޖެހޭނެ ކަމުގެ އިންޒާރު ގަތަރުގެ ފިނޭންސް މިނިސްޓަރު ބުދަ ދުވަހު ދެއްވައިފިއެވެ. އަދި އީރާނުގެ ހަނގުރާމައިގެ ސަބަބުން ދުނިޔޭގެ އިގްތިސާދަށް ކުރާނެ ފުރިހަމަ އަސަރުތައް ވަރަށް އަވަހަށް ފެންނަން ފަށާނެ ކަމަށްވެސް އެމަނިކުފާނު ވިދާޅުވިއެވެ.

ވޮޝިންޓަންގައި އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބޭއްވި މަޝްވަރާއެއްގައި ވާހަކަދައްކަވަމުން ގަތަރުގެ ފިނޭންސް މިނިސްޓަރު އަލީ އަހުމަދު އަލް ކުވާރީ ވިދާޅުވީ، ހަނގުރާމައިގެ ސަބަބުން ކުރާނެ ފުރިހަމަ އަސަރުތައް ފެންނަން އޮތީ މާ ދުރުގައި ނޫން ކަމަށެވެ. އަދި ދުނިޔޭގެ ބާޒާރުގައި ތަކެތީގެ އަގުތައް މިހާރު އުފުލިފައިވަނީ ކުރިއަށް އޮތް ބޮޑު ނުރައްކަލުގެ ކުޑަ މިންވަރެއްގައި ކަމަށްވެސް އޭނާ ސިފަކުރެއްވިއެވެ.

އަލް ކުވާރީ އިތުރަށް ވިދާޅުވީ، ކުރިއަށް އޮތް އެއް މަސް ނުވަތަ ދެ މަސްދުވަހުގެ ތެރޭގައި މުޅި ދުނިޔޭގެ އިގްތިސާދަށް އޭގެ "ބޮޑު އަސަރެއް" ކުރާނެ ކަމަށެވެ.

"ވަރަށް އަވަހަށް ހަމައެކަނި އަގު ބޮޑުވުމުގެ މައްސަލައެއް ނޫން ކުރިމަތިވާނީ، ހަކަތަ ލިބުމުގެ ދަތިކަންވެސް ކުރިމަތިވާނެ. އެހެންކަމުން ހަކަތައަށް ފައިސާ ދެއްކޭނެ ތަނަވަސްކަން ހުރި ނަމަވެސް، އެ ތަކެތި ގަންނަން ނުލިބުމުގެ ބޮޑު މައްސަލައަކާ ކުރިމަތިލާން ޖެހޭނެ،" އޭނާ ވިދާޅުވިއެވެ.

މިފަދަ އިންޒާރުތަކެއް ދެއްވި ނަމަވެސް، ގަތަރުގެ މާލީ ހާލަތު ހުރި ގޮތުން މަދުވެގެން އެއް އަހަރު ދުވަހުގެ މުއްދަތަށް މި ދަތިތަކުން އަރައިގަނެވޭނެ ކަމަށް ފިނޭންސް މިނިސްޓަރު ވިދާޅުވިއެވެ.

މީގެ އިތުރުން، އެ ސަރަހައްދުން އުފައްދާ އަދި ސަޕްލައިކުރާ ގަސްކާނާގެ މިންވަރު ވަރަށް ބޮޑަށް ދަށްވުމުގެ ސަބަބުން، ދުނިޔޭގެ އެކި ކަންކޮޅުތަކުގައި ދަނޑުވެރިކަން ކުރާ މޫސުންތައް ގެއްލި، ކާބޯތަކެތީގެ ނުތަނަވަސްކަމެއް ކުރިމަތިވެދާނެ ކަމުގެ ބިރު އެބައޮތް ކަމަށްވެސް އޭނާ ފާހަގަކުރެއްވިއެވެ.

ގަތަރުގެ ހާލަތު ޖޭޕީ މޯގަންގެ އިގްތިސާދީ މާހިރުން އިންޒާރު ދީފައިވާ ގޮތުގައި، ގަތަރުގެ ބިޔަ ރަސް ލައްފާން ލިކުއިފައިޑް ނެޗުރަލް ގޭސް (އެލްއެންޖީ) ޕްލާންޓަށް އީރާނުން ދިން މިސައިލް ހަމަލާތަކާ ގުޅިގެން، އެ ގައުމުގެ އުފެއްދުންތެރިކަމުގެ 17 އިންސައްތަ ވަނީ ހުއްޓިފައެވެ. މީގެ ސަބަބުން މިއަހަރު ގަތަރުގެ އިގްތިސާދު 9 އިންސައްތައަށް ދަށަށް ދާނެ ކަމަށް ބެލެވެއެވެ.

ނަމަވެސް، ހަނގުރާމައިގެ ސަބަބުން ގައުމުގެ މާލީ ހާލަތަށް ކުރާ އަސަރުތައް ކޮންޓްރޯލް ކުރެވޭނެ މިންވަރެއްގައި ހުރި ކަމަށް އަލް ކުވާރީ ވިދާޅުވިއެވެ.

ގައުމުގެ މާލީ ކަންކަން ބެލެހެއްޓުމުގައި މައްސަލައެއް ނެތް ކަމަށް ވިދާޅުވަމުން އޭނާ ފާހަގަކުރެއްވީ، ހަނގުރާމައިގެ ކުރިންވެސް ގަތަރުން ގެންގުޅުނު "ކޮންޒަވޭޓިވް" ބަޖެޓާއި، ކުއްލި ހާލަތްތަކުގައި ބޭނުންކުރުމަށް އެކުލަވާލާފައިވާ "ޝޮކް ސްޓެބިލިޓީ ފަންޑު" ގެ ސަބަބުން ހާލަތު ކޮންޓްރޯލް ކުރެވޭނެ ކަމަށެވެ.

ގައުމުގެ ސޮވެރިން ވެލްތު ފަންޑު ކަމަށްވާ ގަތަރު އިންވެސްޓްމަންޓް އޮތޯރިޓީގެ ރިޒާވް ބޭނުން ނުކޮށްވެސް ހަ މަސް ދުވަހު ހިފަހައްޓާލެވޭނެ ކަމަށް އަލް ކުވާރީ ވިދާޅުވިއެވެ. އަދި ބޭނުންވެއްޖެ ނަމަ ބަޖެޓު ކުޑަކުރުމާއި، ލޯނު ނެގުމާއި، ބައެއް އިންވެސްޓްމަންޓް މަޝްރޫއުތައް ފަސްކުރުމުގެ ފުރުސަތު އޮތްކަން އޭނާ ފާހަގަކުރެއްވިއެވެ.

"އަޅުގަނޑުމެންނަށް މާ ބޮޑު މައްސަލައެއް ކުރިމަތިވާނެ ކަމަކަށް ނުފެނޭ. މި ހާލަތުގައި މުޅި އަހަރު ދުވަހުވެސް އަޅުގަނޑުމެންނަށް ހިފަހައްޓާލެވޭނެ،" އަލް ކުވާރީ ވިދާޅުވިއެވެ.