އެމެރިކާ އާއި އީރާންއާ ދެމެދު އޮތް އެއްބަސްވުމާ ގުޅޭ ގޮތުން، ޤަތަރާއި ކުވެއިތުން މަޝްވަރާ ކޮށްފި

އެމެރިކާ އާއި އީރާންއާ ދެމެދު ޤާއިމު ކޮށްފައިވާ ހަނގުރާމަ މެދު ކަނޑާލުމުގެ އެއްބަސްވުމާ ގުޅޭ ގޮތުން، ޤަތަރުގެ ބޮޑު ވަޒީރު އަދި ފޮރިން މިނިސްޓަރު ޝައިޚް މުޙައްމަދު ބިން ޢަބްދުއް ރަޙްމާން ބިން ޖާސިމް އަލް ޘާނީ އާއި، ކުވެއިތުގެ ބޮޑު ވަޒީރު މުޙައްމަދު ޞަބާޙް އައްސަލަމް އައް ޞަބާޙްއާ މަޝްވަރާ ކުރައްވައިފި އެވެ. 

މި މަޝްވަރާ ކުރެއްވުން ކުރިއަށް ގެންގޮސްފައި ވަނީ ގްރީސްގެ އެތެންސްގައި ފުރަތަމަ ފަހަރަށް ބާއްވަމުން އަންނަ އެލަޔަންސް ފޯ ޔޫރަޕް-ގަލްފު ޖިއޯޕޮލިޓިކްސް އެންޑް އިންވެސްޓްމަންޓްސް ސަމިޓުގެ ޙަރަކާތްތައް ކުރިއަށް ދަނިކޮށް، އެ ތަނުގައި ބޭއްވި ބައްދަލުވުމެއްގަ އެވެ. 

ޤަތަރުގެ ފޮރިން މިނިސްޓްރީ އިން އެކްސްގައި ޝާއިއު ކޮށްފައިވާ ބަޔާނެއްގައި ބުނެފައިވާ ގޮތުގައި، ދެ ޤައުމުގެ ބޮޑު ވަޒީރުން މަޝްވަރާ ކުރެއްވީ އެމެރިކާ އާއި އީރާންއާ ދެމެދު ޤާއިމު ކޮށްފައިވާ ހަނގުރާމަ މެދު ކަނޑާލުމުގެ އެއްބަސްވުމާއި، ޙާލަތު ހަމަޖެއްސުމަށް ކުރަމުން އަންނަ މަސައްކަތްތަކާ ގުޅޭ ގޮތުންނެވެ. 

ޤަތަރުގެ އެންމެ އިސް ޑިޕްްލޮމެޓް ވަނީ މި ސަރަހައްދުގައި ކުރިއަށްދާ މަސައްކަތް ތަކަށް ހުރިހާ ފަރާތް ތަކުން ރަނގަޅު ރައްދެއް ދިނުމުގެ މުހިންމުކަން ފާހަގަ ކުރައްވައިފަ އެވެ. އޭނާ ވިދާޅުވީ، މި މަސައްކަތް ތަކަށް ރަނގަޅު ރައްދެއް ދިނުމަށް ކުރިމަތި ވެފައިވާ ބޮޑު މައްސަލައިގެ އަސްލު ސަބަބުތައް ސުލްޙަވެރި ގޮތުގައި ވާހަކަ ދައްކައިގެން ޙަައްލު ކުރެވޭނެ ކަމަަށެވެ. އަދި މިއީ ކުރިއަށް އޮތް ތަނުގައި އަލުން ޙާލަތު ގޯސްވުން ހުއްޓުވޭނެ، ދެމެހެއްޓެނިވި އެއްބަސްވުމަކަށް ދިޔުމަށް މަގު ފަހި ކުރާނެ ކަމެއް ކަމަށް ވެސް ފާހަގަ ކޮށްފައިވެ އެވެ. 

މި ބައްދަލުވުން އޮތީ މެދު އިރުމަތީގެ ސަރަހައްދުގައި ޙާލަތު އިތުރަށް ގޯސްވުން ހުއްޓުވުމަށް ބައިނަލްއަޤުވާމީ މަސައްކަތްތައް ކުރަމުން އަންނަ ދަނޑިވަޅެއްގަ އެވެ. ޤަތަރުން ވަނީ މި ސަރަހައްދުގައި ކުރިމަތިވެފައިވާ ބޮޑެތި ގިނަ މައްސަލަ ތަކުގައި މެދުވެރިއެއްގެ ދައުރު އަދާ ކޮށްފަ އެވެ. 

އެތެންސްގައި ބާއްވަމުން އަންނަ މި ސަމިޓަކީ ޔޫރަޕް އަދި ގަލްފު ސަރަހައްދުގެ ޤައުމުތަކާ ދެމެދު ސިޔާސީ އަދި އިޤްތިޞާދީ ގުޅުން ބަދަހި ކުރުމަށް ބޭއްވި މުހިންމު ބައްދަލުވުމެކެވެ. މި ސަމިޓުގައި އެ ސަރަހައްދުގެ ލީޑަރުންނާއި އިސްވެރިން ވެސް ބައިވެރިވެ ވަޑައިގަންނަވަ އެވެ.