އެމް.ޑީ.ޕީން ކޯޓަށް ގޮސް ވަޒީފާއިން ކަނޑާލި މުވައްޒަފުންގެ ޙައްޤު ހޯދައިދޭނަން: ނިޔާޒު
ސަރުކާރުން ވަޒީފާތަކުގައި ތިބި މުވައްޒަފުން ވަކިކުރަނީ އެއްވެސް އުސޫލެއް ނެތި ކަމަށް ތުހުމަތުކުރައްވައި، އެ މީހުންގެ ހައްގުތައް ހޯދައިދޭން އެމްޑީޕީން ކޯޓަށް ދާނެ ކަމަށް އަލީ ނިޔާޒު ވިދާޅުވެއްޖެ. 2018 ވަނަ އަހަރު އެމްޑީޕީން ވެރިކަމާ ހަވާލުވިއިރު އެޗްޑީސީގައި ތިބި ވަގުތީ މުވައްޒަފުންނަށް ވަޒީފާގެ ޔަގީންކަން ދިންކަން އޭނާ ފާހަގަކުރެއްވި. ވަޒީފާގެ ކުރިއެރުން ދިނުމާއި ވަކިކުރުމުގައި ސިޔާސީ ފިކުރަށް ބަލައިގެން ނުވާނެ ކަމަށާއި، ގާނޫނާ ހިލާފަށް ކުރާ ކަންކަމާ ދެކޮޅަށް އެ ޕާޓީން ވަކާލާތު ކުރާނެ ކަމަށްވެސް ނިޔާޒު ވިދާޅުވި.
އެމްޑީޕީ އިން ބޭއްވި "ވަޒީފާ ބުރާސްފަތި" އިހުތިޖާޖުގައި ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވާހަކަ ދައްކަވަނީ. | ރާއްޖެ އެމްވީ
ރައީސް ޑރ. މުހައްމަދު މުއިއްޒުގެ ސަރުކާރުން ވަޒީފާތަކުން ވަކިކުރަމުންދާ މުވައްޒަފުންގެ ޙައްޤުތައް ހޯދައިދިނުމަށް އެމް.ޑީ.ޕީން ކޯޓަށް ގޮސްގެން ވެސް މަސައްކަތް ކުރާނެ ކަމަށް ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު ވިދާޅުވެއްޖެ އެވެ.
ނިޔާޒު މިހެން ވިދާޅުވީ ވަޒީފާތަކުން މުވައްޒަފުން ވަކިކުރާ މައްސަލައާ ގުޅިގެން އެމް.ޑީ.ޕީން ބުރާސްފަތި ދުވަހުގެ ރޭ ބޭއްވި "ވަޒީފާ ބުރާސްފަތި" އިހުތިޖާޖުގައި ވާހަކަ ދައްކަވަމުންނެވެ.
ނިޔާޒުގެ ވާހަކަައިގައި މީގެ ފަސް އަހަރު ކުރިން އެމް.ޑީ.ޕީން ވެރިކަމާ ހަވާލުވިއިރު އޮތް ހާލަތަށް އަލިއަޅުއްވާލެއްވި އެވެ. އެގޮތުން 2018 ވަނަ އަހަރުގެ ރިޔާސީ އިންތިޚާބާ ދިމާކޮށް އޭރު އޮތް ސަރުކާރުން އިންތިޚާބު ކާމިޔާބު ކުރުމުގެ ބޭނުމުގައި އެޗް.ޑީ.ސީ.އަށް 400 އަށްވުރެ ގިނަ ވަގުތީ މުވައްޒަފުން ވައްދާފައިވާ ކަމަށާއި، އެ މުވައްޒަފުން އޭރު ތިބީ ވަޒީފާގެ ބިރުވެރިކަމެއްގެ ތެރޭގައި ކަމަށް އޭނާ ވިދާޅުވި އެވެ. ނަމަވެސް އެމް.ޑީ.ޕީ.ން ވެރިކަމަށް އައުމަށް ފަހު އެ ހުރިހާ މުވައްޒަފުންނަށް ވަޒީފާގެ ޔަޤީންކަން ދީ، އެ މީހުން ވަޒީފާގައި ބޭތިއްބި ކަމަށް ނިޔާޒު ފާހަގަކުރެއްވި އެވެ.
ވަޒީފާ ދިނުމުގައި މައްސަލައެއް އުޅޭނަމަ އެއީ ވަޒީފާ ދިން މީހުންގެ މައްސަލައެއް ކަމަށާއި، ވަޒީފާގައި ތިބި މުވައްޒަފުންނަކީ މައްސަލައެއް ނޫން ކަމަށް ނިޔާޒު ވިދާޅުވި އެވެ. އަދި މިއަދު ސަރުކާރުން މުވައްޒަފުން ވަކިކުރަމުންދަނީ އެއްވެސް އުސޫލެއް، އިންސާފެއް ނެތި އަދި އެއްވެސް ޙައްޤަކާ ނުލައި ކަމަށް އޭނާ ތުހުމަތު ކުރެއްވި އެވެ. ވަޒީފާއާ ބެހޭ ޤާނޫނުގައި ވަކި ސިޔާސީ ޕާޓީއަކަށް ތާއީދުކުރަން ޖެހޭނެ ކަމަށް ބަޔާންކޮށްފައި ނޯންނާނެ ކަމަށާއި، މުވައްޒަފުން އަމަލުކުރަން ޖެހޭނީ ޤާނޫނުއަސާސީއާއި ވަޒީފާއާ ބެހޭ ޤާނޫނަށް ކަމަށް ވެސް ވިދާޅުވި އެވެ.
ދިވެހިރާއްޖޭގެ ޤާނޫނުއަސާސީއާއި އަދި އެއާއެކު ވަޒީފާތަކާ ބެހޭ ގާނޫނުގެ ދަށުން މުވައްޒަފުންނަށް އުނދަގޫވާ ގޮތަށް މުވައްޒަފުންގެ ޙައްޤުތަކަށް އަރައިގޮސް ހުންނަ ގަވާއިދުތަކާއި އުސޫލުތަކަކީ ތަބާވަޖެހޭ އެއްޗެއް ނޫން. އަޅުގަނޑު ހުރިހާ މުވައްޒަފުންނަށް ވެސް މި ދަންނަވަނީ، ތިބޭފުޅުންގެ ސިޔާސީ ފިކުރަކަށް ބެލުމެއް އޮވެގެންނެއް ވަޒީފާގެ ކުރިއެރުމަށް ވެސް އަދި ވަޒީފާއަށް ކެނޑުމަށް ވެސް އޮވެގެންނެއް ނޯންނާނެ. އެފަދަ ކަމަކަށް އަޅުގަނޑުމެން މި ތިބީ ތައްޔާރަށް އެމް.ޑީ.ޕީން ކޯޓަށް ގޮސް ތިބޭފުޅުންނަށް އެ ޙައްޤު އަޅުގަނޑުމެން ހޯދައިދޭނަން.ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު
މީގެ އިތުރުން ނިޔާޒު ވިދާޅުވީ ވަޒީފާއިން މީހުން ކަނޑާ ފަރާތްތައް ހިފައި ހައްޔަރުކުރަން ޖެހޭ ކަމަށެވެ. ނިޔާޒު ވަނީ ވަޒީފާގެ ބިރުވެރިކަމެއް ނެތި މަސައްކަތް ކުރުމުގެ މާޙައުލެއް އޮންނަންޖެހޭނެ ކަމަށް ވަކާލާތު ކުރައްވާފަ އެވެ.
ސަރުކާރުގެ އެކި މުއައްސަސާތަކާއި ކުންފުނިތަކުން މުވައްޒަފުން ވަޒީފާއިން ވަކިކުރަމުންދާ ކަމާ ދެކޮޅަށް އަޑުއުފުލުމަށް އިދިކޮޅު އެމްޑީޕީން އިސްނަގައިގެން ބުރާސްފަތި ދުވަހުގެ ރޭ ބޭއްވި ވަޒީފާ ބުރާސްފަތި އިހުތިޖާޖުގައި މާލެއާއި އަތޮޅުތެރޭގެ އެކި ރަށްރަށުން އެތައް ހާސް ބަޔަކު ބައިވެރިވި އެވެ.
އިހުތިޖާޖުގެ ބައިވެރިން ދިޔައީ ނުހައްގުން ވަޒީފާއިން ކަނޑާލި މުވައްޒަފުންނަށް އަލުން ވަޒީފާ ދިނުމަށާއި، ސަރުކާރު ޒިންމާދާރުވުމަށް ގޮވާލާ އަޑުއުފުލަމުންނެވެ. މީގެ އިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި އެމަނިކުފާނުގެ ސަރުކާރުގެ އިސްތިއުފާއަށް ވެސް އިހުތިޖާޖުގެ ބައިވެރިން ވަނީ ގޮވާލާފަ އެވެ.
