ވަޒީފާއިން ވަކިކުރާ ކޮންމެ މީހެއްގެ އާއިލާއަކީ މި ސަރުކާރާއި ދެކޮޅުވާނެ އާއިލާއެއް: ޝާހިދު
ސަރުކާރުގެ ވަޒީފާތަކުން މީހުން ވަކިކުރާ މައްސަލައިގައި އެމްޑީޕީން ބޭއްވި އިހުތިޖާޖުގައި ވާހަކަދައްކަވަމުން އެ ޕާޓީގެ ރައީސް އަބްދުﷲ ޝާހިދު ވިދާޅުވީ، ވަޒީފާ އަދާކުރުމުގެ ހައްގަށް ސަރުކާރުން އަރައިގަންނަ އިރު އެމްޑީޕީން މަޑުން ނޯންނާނެ ކަމަށް. އަދި ވަޒީފާއިން ވަކިކުރާ ކޮންމެ މީހަކާއެކު މި ސަރުކާރާ ދެކޮޅު އާއިލާއެއް އުފެދެމުންދާކަން ފާހަގަކުރައްވައި، އެމްޑީޕީގެ ވެރިކަމެއްގައި އެ މުވައްޒަފުން އަނބުރާ ވަޒީފާތަކަށް ރުޖޫއަކޮށްދޭނެ ކަމުގެ ޔަގީންކަން ޝާހިދު އެރުއްވި.
"ވަޒީފާ ބުރާސްފަތި" އިހުތިޖާޖުގައި އެމްޑީޕީގެ ރައީސް އަބްދުﷲ ޝާހިދުގެ އިތުރުން އިސްވެރިން. | ރާއްޖެ އެމްވީ
ރައީސް ޑރ. މުހައްމަދު މުއިއްޒުގެ ސަރުކާރުން ވަކިކުރާ ކޮންމެ މުވައްޒަފެއްގެ އާއިލާއަކީ މި ސަރުކާރާއި ދެކޮޅުވާނެ އާއިލާއެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
އެމްޑީޕީއިން ބުރާސްފަތި ދުވަހުގެ ރޭ ބޭއްވި "ވަޒީފާ ބުރާސްފަތި" އިހުތިޖާޖުގައި ވާހަކަ ދައްކަވަމުން ޝާހިދު ވިދާޅުވީ ދިވެހިރާއްޖޭގެ ގާނޫނުއަސާސީގައި ރައްޔިތުން ވަޒީފާ އަދާކުރުމުގެ ހައްގު އިންތިހާއަށް ރައްކާތެރިވެފައިވާ ކަމަށެވެ. އަދި ރައީސް ޑރ. މުހައްމަދު މުއިއްޒުގެ ސަރުކާރުން އެ ހައްގަށް އަރައިގަންނަ އިރު އެމްޑީޕީ އިން މަޑުން ނޯންނާނެ ކަމަށެވެ. ޝާހިދު ވިދާޅުވީ އެމްޑީޕީގެ މެންބަރުންނާއި ރައްޔިތުންނަކީ ބިރަކަށް ފަހަތަށް ޖެހޭނެ ބައެއް ނޫން ކަމަށާއި، ނުކުމެ މިތިބީ ސަރުކާރަށް ގޮންޖަހައި ނުކުމެ ކަމަށެވެ.
އަބްދުﷲ ޝާހިދު ވިދާޅުވީ ވަޒީފާއިން ވަކިކުރާ ކޮންމެ މިހަކާއެކު މިހާރު އޮތް ސަރުކާރާއި އުފައްދަމުން އެދަނީ މި ސަރުކާރާއި ދެކޮޅުވާނެ އާއިލާއެއް ކަމަށެވެ. އަދި ރައްޔިތުން ބިކަކުރުމުން ރައްޔިތުންގެ ލޮތްބެއް ނުލިބޭނެ ކަމަށާއި، މިހާރު ފެންނަމުން ދަނީ މި ސަރުކާރު ބޮނދު ބުޑަށް ސައިވަމުންދާތަން ކަމަށެވެ.
ޝާހިދު ވިދާޅުވީ ރައްޔިތުންނަށް އެމްޑީޕީގެ ފަރާތުން އަރުވާ ޔަގީންކަމަކީ ވަޒީފާއިން ވަކިކުރާ މީހުންގެ ދިފާއުގައި ޕާޓީ އިން ކުރަން ޖެހުނު ކޮންމެ ކަމެއް ކުރާނެ ކަމަށެވެ. އަދި އެނބުރި ވެރިކަމަށް އައިސް ވަކިކޮށްފައިވާ ވަޒީފާތަކަށް މުވައްޒަފުން ރުޖޫއަކުރާނެ ކަމަށާއި، އެ ޔަގީންކަން ރައްޔިތުންނަށް ދެއްވާ ކަމަށެވެ.
"ވަޒީފާ ބުރާސްފަތި" އިހުތިޖާޖު އެއްފަހަރާ މުޅި ރާއްޖޭގެ ހުރިހާ ރަށެއްގައި ބާއްވާފައިވެ އެވެ.
