އެމްޑީޕީ ބޮޑު މުޒާހަރާ: ރައްޔިތުންނަށް ލިބޭ ފެށުމެއް

ހަނދާނަށް އަންނަނީ އިސްލާހީ މަސައްކަތުގެ ވާހަކަ ފެށިގެން އައި ދުވަސްވަރުގެ މަތިންނެވެ. އޭރު އެވާހަކަ ދައްކަމުން ދިޔައީ ސިއްރު ސިއްރުންނެވެ. ގޭގޭގެ ހަތަރުފާރުން އެތެރޭގައެވެ. ރައްޓެހި ރަހުމަތްތެރިން ދިމާވީމާ ވަކިން ތިބެ ކުރާ ސިއްރު ސައްލާތަކުގެ ގޮތުގައެވެ. ނޫންނަމަ އަރުވާލެވިގެން ތިބެ ރާއްޖެއިން ބޭރުގައެވެ. އޭރުގެ ބިރަކީ ހައްޔަރުކޮށްފާނެތީއެވެ. ވަޒީފާ ގެއްލިދާނެތީއެވެ. ބުނެވޭ ބަހަކުން، ވާހަކަ ދައްކާލެވޭ މީހެއްގެ ގޮތުން ހުރަގެއަށް ދާން ޖެހިދާނެ ކަމުގެ ބިރަށްޓަކައެވެ.

ހަށިފޮޅާލާފައި ނުކުތީ އެ ބިރު ފަހަނައަޅާގޮސްގެންނެވެ. އެކަން ކުރުމުގެ އާރުކާޓީއަކީ އެއްވެސް މީހަކު ދެބަހެއް ނުވެވޭނެ ގޮތުން އެމްޑީޕީއެވެ. މަލްޓިޕާޓީ ވެރިކަމަކަށް ގެންދިއުމަށްޓަކައި އެޕާޓީގެ އިސް ސަފުގައި މަސައްކަތްކުރި މީހުންގެ ލައްކަ ބުރަ މަސައްކަތުންނެވެ. އެކަމަށްޓަކައި އެންމެ އާދައިގެ މީހާވެސް ހިމެނޭގޮތަށް އެތައް ގުރުބާނީތަކެއް ވެގެންނެވެ. ބައެއްގެ ވަޒީފާތައް ގެއްލުނެވެ. ވިޔަފާރިތަކެއް ފުނޑި ބަނގުރޫޓުވިއެވެ. އާއިލާތައް ބިކަވެ ބައެއް މީހުންނަށް ޖަލުގައި އެތައް އަނިޔާއެއް ލިބުނެވެ. އެކަމަކު އެއްވާނެއްގައި ދުލެއް ނުދީ ކުރި މަސައްކަތުން ބޮޑެތި ބަދަލުތަކެއް މިވަނީ އައިސްފައެވެ. މިއަދު ރައްޔިތުންގެ އަޑު ސަރުކާރުތަކުންނާއި ވެރިން އަހަން ޖެހެއެވެ. ވެރިކަމަށް އައުމަށްޓަކައި ވައުދުތަކެއް ވާން ޖެހެއެވެ. ވެރިކަމުގައި އޮތުމަށާއި އިތުރު ދައުރެއް ބޭނުންނަމަ އެވައުދުތައް ފުއްދާން ޖެހެއެވެ. ހިލޭ ބޭސް މިހާރު ދޭން ޖެހޭނެއެވެ. ދަރިވަރުންނަށް ފޮތްފުންސުރު ގަންނާކަށް މިހާރަކު ނުޖެހޭއެވެ. ޖީސީއަށް ފައިސާ ނުދެއްކި ތަޙައްމަލްކުރި ބޮލުގެ ރިހުން ނެތިއްޖެއެވެ. މުސްކުޅިވި ދުވަހު މައިން ބަފައިން ބެލޭނޭގޮތް އެވަނީ ހަމަޖެހިފައެވެ. އެކަނިވެރިން ހާލުގައި ޖެހުން ކުޑަކޮށް ދަރިން ގޮވައިގެން އުޅެވޭނޭ ގޮތެއް އެވަނީ ހޯދިފައެވެ. މިއީ އެ އިސްލާހީ މަސައްކަތުގެ ތެރއިން ފާހަގަ ކޮށްލެވޭ ކުޑަ މިންވަރެކެވެ.

މިކަންކަން މިހާރު ނުކޮށް ސަރުކާރުތައް ކަސިޔާރުވެގެން ދިޔަ ނުދިނުމަށް ބަސް ބުނެވޭނެ، ޚިޔާލު ފާޅުކުރުމާއި، އެއްވެ އުޅުމުގެ މިނިވަންކަން ގާނޫން އަސާސީން މިހާރު އެވަނީ ލިބިދީފައެވެ. ދެއްކޭ ވާހަކައަކަށް ޓެރަރިޒަމްގެ ކުށާއި، ސަރުކާރާ ދެކޮޅުވުމުގެ ކުށެއް ފަސޭހައަކުން ނުކުރެވޭނެއެވެ. ނޫސްވެރިން މިނިވަންކަމާ އެކު އެކަން ކުރެވޭނެ ޖާގަ އެވަނީ ހޯދިފައެވެ.

މިހުރިހާ ކަމެއް ވެގެން ދިޔަތާ އަހަރުތަކެއް ފަހުން އަނެއްކާ ވެސް ކުރިން އޮތް ހާލަތަށް ހިނގައިދާނެ ކަމުގެ ބިރު މި ވަނީ ފެންނާން ފަށާފައެވެ. ފުރަތަމަ ފެށެނީ އެވާހަކަ ދައްކަންތިބި މަޖިލިސް މެންބަރުންނާ ހަމައިންނެވެ. އެވެރިންގެ ކޮންޓްރޯލް އެއޮތީ ރައީސަކަށް ހުންނެވި ބޭފުޅާގެ އަތުގައެވެ. އިންތިޚާބު ކުރި ރައްޔިތުންގެ ހައްގުގައި އަދި މުޅި ގައުމުގެ ހައްގުގައި ވެސް އެއްޗެއް ބުނެލާނެ ބާރެއް މަޖިލީހުގެ މެޖޯރިޓީ ބޭފުޅުންގެ ކިބަޔަކު ނެތެވެ. އެ ކޮންޓްރޯލާއެކު ކޯޓުތަކާއި މިނިވަން މުއައްސަސާތަކުގެ ކޮންޓްރޯލް އެވަނީ ރައީސް މީހާގެ މުށުތެރޭގައެވެ. އެ ބާރާއެކު އެދަނީ ހިތުހުރި އެއްޗެއް ހައްދަވަމުންނެވެ. ކަންކުރާން ނޭނގި ރައްޔިތުން އެދަނީ ހަފުސްވަމުންނެވެ. ޕާޓީގެ މީހުންނަށް ވަޒީފާ ދީގެން ދައުލަތުގެ ބަޖެޓް، މުސާރައަށް ހުސްކޮށް ނިމޭއިރު ރައްޔިތުން މިވަނީ އަނގަޔާ އަތާދިމާ ނުވާފަދަ ހާލަތެއްގައެވެ. މީން ދުވަހަކު ޑޮލަރުގެ އަގު ބޮޑުނުވާވަރަށް ބޮޑުވެ ތަކެތީގެ އަގާއި ބިލްތަކަށް ދައްކާން ޖެހޭ މިންވަރު އެވަނީ އުފުލިފައެވެ. ވަޒީފާތަކުގައި ތިބި މުވައްޒަފުންގެ ރައްކާތެރިކަން އެވަނީ ގެއްލި އަދުތޯ؟ މާދަންތޯ؟ ވެފައެވެ. ސޯޝަލް މީޑިޔާގައި ކުރެވޭ ކޮމެންޓަކުން ނޫނީ ދެވޭ ލައިކަކުން ވެސް ވަޒީފާ ގެއްލުމުގެ ބިރު އެވަނީ އުފެދިފައެވެ. މި ވާހަކަތައް ދައްކާން ތިބި ނޫސްވެރިންގެ ތެރެއިން ބޮޑުބައެއް އެވަނީ ސަރުކާރުން ފައިސާ ދީގެން ކޮންޓްރޯލް ކުރުވާފައެވެ. ދައުލަތުގެ ޓީވީ އާއި ސަރުކާރުން ލާރިދީގެން ހިންގާ އޮންލައިން ނޫސްތަކުން އެނޫން އެއްވެސް ގޮތެއް ނެތެވެ. މަތިހަށި ނަގާފައި ހަގީގަތް ހާމަކުރާން ތިބި މަދު ނޫސްވެރިން ކޮޅަކަށް އެ ގެންދަނީ ޖަލުގެ ކުޑަގޮޅިއަށް ވަންނަން ޖެހޭނޭ ކަމުގެ ބިރު ދައްކަމުންނެވެ. ރީތިކޮށް ކުރުކޮށް ބުނާ ނަމަ ނޫސްވެރިކަމުގެ މިނިވަންކަން އެދަނީ ގެއްލެމުންނެވެ.

މި ހާލަތަށް ވެއްޓުމާއެކު ރައްޔިތުންގެ އާދޭހަކީ މިކަން ހައްލުކުރާނެ ބަޔަކު ނުކުތުމެވެ. ނިމިދިޔަ، ފެންނަ ނުފެންނަ ވޯޓުގައި ވަރަށް ޞަރީޙަކޮށް އެބުނީ އެވާހަކައެވެ. މިހާރު ކަންކުރަމުންދާ ގޮތް ރަނގަޅު ނޫން ވާހަކައެވެ. އެކަމުގައި ވެސް އެހީތެރިކަމަކަށް ގިނަބައެއްގެ އަތް ދިއްކުރަމުން ދަނީ އިދިކޮޅު އެމްޑީޕީއަށެވެ. ކަމެއް ކުރެވޭނީ އެވެރިން ނުކުމެ ކުރި މަސައްކަތަކުންނޭ ބުނެއެވެ. އަނެއްކާ ވެސް އާފެށުމަކުން ފަށަންވެއްޖެއޭ ބުނެވެ.

ކޮންމެއަކަސް އެމްޑީޕީން އެތެދުވަނީ އެ އާދޭސްތަކާއެކުގައެވެ. ވަޒީފާއިން ވަކިކުރަމުންދާ މީހުންގެ ހައގުގައެވެ. އެމިހުންގެ ކުދި ޅަދަރިންނާއި އާއިލާތައް ބިކަވުމުން ސަލާމަތް ކުރުމަށެވެ. މުޅި ރާއްޖޭގައި ކުރެވޭ ސުލްހަވެރި އިހުތިޖާޖަކަށް އެވެރިން އެނުކުތީ އެކަމުގައެވެ. ދެން އޮތީ ރައްޔިތުންގެ ދައުރެވެ. އަނިޔާ ލިބެމުންދާ ރައްޔިތުންގެ ދައުރެވެ. ވަޒީފާ ގެއްލެމުންދާ އާއިލާތަކުގެ ހައްގުގައި އެމީހުންނާއި އެމީހުންގެ އާއިލާތައް އަދި ރައްޓެހިންގެ ދައުރެވެ. އެކެއްގެ ކިބައިން އަނެކަކު ހިތްވަރު ލިބިގަނެ އެންމެން އެއްވާނެއްގައި ނުކުމެ ގެއްލެމުންދާ މިނިވަންކަން ހޯދުމުގެ މަސައްކަތް ކުރުމަށެވެ. އެމްޑީޕީގެ ބޮޑު މުޒާހަރާ މިއީ އަނެއްކާ ވެސް ރައްޔިތުންނަށް ލިބޭ ފެށުމެކެވެ.