ރޮމޭންސް ސްކޭމުގައި ޖައްސާ ފައިސާ ހޯދި މައްސަލައިގައި ހައްޔަރުކުރި މޫސާ މުހައްމަދު ޝަރީއަތް ނިމެންދެން ބަންދުކޮށްފި
ފޭސްބުކް މެސެންޖަރާއި ވައިބަރ މެދުވެރިކޮށް ލިންކު ފޮނުވައިގެން މީހުންގެ ބެންކު އެކައުންޓުތަކުން މަކަރާއި ހީލަތުން ފައިސާ ހޯދި މައްސަލައެއްގައި ހައްޔަރުކުރި މޫސާ މުހައްމަދު ޝަރީއަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފި. މި މައްސަލައިގެ ތަހުގީގުން އެނގުނު ގޮތުގައި އޭނާ ވަނީ މީހެއްގެ އެކައުންޓުން 50,000 ރުފިޔާ ފޭރުމުގެ އިތުރުން، މިފަދަ އިތުރު 10 ހާދިސާއެއްގައި ބައިވެރިވެ ގިނަ އަދަދެއްގެ ފައިސާ އޭނާގެ އަމިއްލަ އެކައުންޓަށް ޖަމާކޮށްފަ. އޭނާއަކީ ނަފްސާނީ ބަލިމީހެއް ކަމަށް ކޯޓުގައި ބުނި ނަމަވެސް، އެކަން ސާފުކޮށްދޭނެ އެއްވެސް ލިޔެކިޔުމެއް ހުށަހަޅާފައި ނުވާކަމަށް ފުލުހުން ބުނެފައިވޭ.
ރޮމޭންސް ސްކޭމުގައި ޖައްސަލައި ފައިސާ ހޯދި މައްސަލައިގައި ހައްޔަރުކުރި މޫސާ މުހައްމަދު. | ޕޮލިސް
ފޭސްބުކް މެސެންޖަރ މެދުވެރިކޮށް މީހުންނާ ލޯބީގެ ގޮތުން ގުޅުން އުފައްދައި، މަކަރާއި ހީލަތުން ގިނަ އަދަދެއްގެ ފައިސާ ހޯދަމުންދިޔަ މައްސަލައިގައި ހައްޔަރުކުރި މޫސާ މުހައްމަދު، ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފި އެވެ.
މި މައްސަލައިގައި އޭނާގެ މައްޗަށް ދައުވާ ކުރުމަށް މިހާރު ވަނީ ކޯޓަށް ހުށަހަޅާފަ އެވެ.
މި މައްސަލައާ ގުޅިގެން ހައްޔަރުކޮށްފައިވާ މޫސާ މުހައްމަދުގެ ބަންދަށް ކްރިމިނަލް ކޯޓުން ކުރިން ދިން 30 ދުވަހުގެ މުއްދަތު ހަމަވުމުން، ބުދަ ދުވަހު އޭނާގެ ބަންދާ މެދު ގޮތެއް ނިންމުމަށް އަލުން ކޯޓަށް ހާޒިރުކުރުމުން، ކޯޓުން ވަނީ އޭނާ ޝަރީއަތް ނިމެންދެން ރިމާންޑް ޖަލެއްގައި ބެހެއްޓުމަށް އަމުރުކޮށްފަ އެވެ. ކޯޓުގައި އޭނާގެ ފަރާތުން އޭނާއަކީ ނަފްސާނީ ބަލި ތަހައްމަލުކުރަމުންދާ މީހެއް ކަމަށް ބުނެފައިވީ ނަމަވެސް، އެކަމާ ގުޅޭ އެއްވެސް ތަފްސީލެއް ނުވަތަ ލިޔެކިޔުމެއް އާއިލާގެ ފަރާތުން ވެސް ހުށަހަޅާފައި ނުވާކަމަށް ފުލުހުން ބުނެފައިވެ އެވެ. ފުލުހުން ބުނީ އެކަން އާއިލާ މެދުވެރިކޮށް ސާފުކުރުމުގެ މަސައްކަތް ކުރަމުންދާ ކަމަށެވެ.
މި މައްސަލައިގެ ތަހުގީގަށް އެނގިފައިވާ ގޮތުގައި، މޫސާ މުހައްމަދު ވަނީ މިދިޔަ އޭޕްރީލް މަހުގެ 24 ވަނަ ދުވަހު ފޭސްބުކް މެސެންޖަރ މެދުވެރިކޮށް މީހަކާ ގުޅުން އުފައްދާފަ އެވެ. އެއަށްފަހު ވައިބަރ މެދުވެރިކޮށް އޭނާ ވަނީ އެ މީހާއަށް ލިންކެއް ފޮނުވާފަ އެވެ. އެ ލިންކަށް ފިތާލުމާއެކު އެ މީހާގެ ފޯނު ރީސެޓުވެ، ބެންކު އެކައުންޓުގައި ހުރި 50,000 ރުފިޔާ ވަނީ ކެނޑިފަ އެވެ. ފުލުހުން ހާމަކުރި ގޮތުގައި އެ ފައިސާ ޖަމާވެފައި ވަނީ ސީދާ މޫސާ މުހައްމަދުގެ ނަމުގައި ހުޅުވާފައިވާ ބެންކު އެކައުންޓަށެވެ.
މި މައްސަލައިގެ ތުހުމަތުގައި މޫސާ މުހައްމަދު ހައްޔަރުކޮށްފައި ވަނީ މެއި މަހުގެ 2 ވަނަ ދުވަހު އެވެ. އޭނާ ހައްޔަރުކޮށް ފުރަތަމަ ކޯޓަށް ހާޒިރުކުރުމުން ބަންދަށް ދީފައިވަނީ 15 ދުވަހުގެ މުއްދަތެކެވެ. އެފަހުން އިތުރު 30 ދުވަހުގެ މުއްދަތެއް ދީފައިވެ އެވެ. ނަމަވެސް ތަހުގީގު ކުރިއަށްދާވަރަކަށް މި މައްސަލައިގެ ނުރައްކާތެރިކަން ބޮޑުވެ، އޭނާގެ އެކައުންޓަށް އިތުރު ބައެއްގެ ފައިސާ ޖަމާވެފައިވާކަން މިހާރު ވަނީ ފާހަގަވެފަ އެވެ.
ފުލުހުން ކޯޓުގައި ހާމަކުރި ގޮތުގައި، މީހެއްގެ ވައިބަރ އެކައުންޓް ކޮމްޕްރަމައިޒްކޮށްގެން ނުވަތަ ހެކްކޮށްގެން 50,000 ރުފިޔާ ނެގި މައްސަލައިގެ އިތުރުން، ހަމަ މި ބާވަތުގެ އިތުރު 10 ހާދިސާއެއްގައި ވެސް މޫސާ މުހައްމަދުގެ ބައިވެރިވުން އޮތްކަމަށް ތުހުމަތު ކުރެވެ އެވެ. އެގޮތުން އެކި މީސްމީހުންގެ އެކައުންޓުން މަކަރާއި ހީލަތުން ފައިސާ ނަގައި، އޭނާގެ އެކައުންޓަށް ޖަމާކޮށްފައިވާކަން ތަހުގީގަށް ވަނީ ފާހަގަކުރެވިފަ އެވެ.
މިފަހަކަށް އައިސް ލިންކުތައް މެދުވެރިކޮށް ބެންކު އެކައުންޓުތަކުން ފައިސާ ފޭރުމުގެ މައްސަލަތައް ވަނީ ވަރަށް ބޮޑަށް އިތުރުވެފަ އެވެ. އެހެންކަމުން ނުދަންނަ ފަރާތްތަކުން ފޮނުވާ ލިންކުތަކަށް ނުފިތުމަށާއި، އަމިއްލަ މައުލޫމާތާއި ބެންކިންގް ތަފްސީލުތައް ހިއްސާ ނުކުރުމަށް ފުލުހުންނާއި ބެންކުތަކުން އަންނަނީ ތަކުރާރުކޮށް އިލްތިމާސް ކުރަމުންނެވެ. މޫސާ މުހައްމަދުގެ މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
