ޒާޔާއާ ދެކޮޅަށް ހެއްކެއް ނެތް، ދައުވާކުރަނީ އެކަށީގެންވާ ހެކި ނެތި: ނަޝީދު

ހުޅުމާލެ އުތުރު ދާއިރާގެ ކައުންސިލަރު ފާތިމަތު ޒަހިއްޔާ (ޒާޔާ) އާ ދެކޮޅަށް ދައުލަތުން އުފުލާފައިވާ ދައުވާއަކީ އެއްވެސް ހެއްކެއް ނެތި، ސިޔާސީ މަގްސަދެއްގައި އުފުލާފައިވާ ދައުވާއެއް ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވީ ކްރިމިނަލް ކޯޓު ސަރަހައްދުގައި ހުންނަވައިގެން ރާއްޖެޓީވީއަށް ދެއްވި ބަސްދީގަތުމެއްގަ އެވެ.

ރައީސް ނަޝީދު ވިދާޅުވީ، މިހާރު ބައެއް ފަރާތްތަކަށް ކުރަމުންދާ ދައުވާތަކުގައި ސިޔާސީ ކުލަވަރު ޖެހިފައިވާ ކަމަށާއި، މިއީ ސިޔާސީ މަގްސަދުތަކެއް ހާސިލުކުރުމަށް ކުރާ ކަންކަން ކަމަށެވެ. މި ބާވަތުގެ ދައުވާތަކަކީ މީގެ ކުރިން 2005 އިން ފެށިގެން 2008 ވަނަ އަހަރާ ދެމެދު ވަރަށް ގިނައިން ފެނިގެންދިޔަ ކަންކަންކަން ފާހަގަކުރައްވަމުން، އެމަނިކުފާނު ވަނީ މީގެ ކުރިން ޒިޔާދަށް (ޒިޔައްޓެ) ކުރެވުނު ދައުވާތަކުގެ ހަނދާންތައް އާކުރައްވާފަ އެވެ.

ޒާޔާއަށް ކުރާ ދައުވާއާ ގުޅޭގޮތުން ވާހަކަދައްކަވަމުން ނަޝީދު ވިދާޅުވީ، ފުލުހުންނަށް ހުރަސްއެޅި ކަމަށް ބުނެ ދައުވާ ކުރާއިރު، އެއީ ކޮން ފުލުހަކަށް ކުރި ހުރަހެއްކަން ސާފުނުވާ ކަމަށެވެ. އަދި ފުލުހުން ކޯޓުގައި ދޭ ހެކިބަހާއި، ފެންނަން ހުރި މަންޒަރުތަކާ ދިމާނުވާ ކަމަށްވެސް އެމަނިކުފާނު ފާހަގަކުރެއްވި އެވެ. ރައީސް ނަޝީދު ތުހުމަތު ކުރެއްވި ގޮތުގައި ޕްރޮސިކިއުޓަރ ޖެނެރަލް މި ދައުވާ އުފުލާފައިވަނީ އެކަށީގެންވާ ހެކި ނުހޯއްދަވަ އެވެ.

ދެން އޭގައި މިހާރު މިސާލަކަށް ޒާޔާއަށް ކުރެވޭ ދަޢުވާގައި އެބަބުނޭ ފުލުހުންނަށް ހުރަސްއެޅީކަމަށް. ދެން އެއީ ކޮން ފުލުހަކަށްތޯ؟ އެ ފުލުހުން މި ތަނުގައި ދޭ ހެކިބަހާއި، ދެން އެހެން ފެންނާން ހުރި މަންޒަރުތަކާއި، މި ކަންކަން މުޅިން ދިމާނުވެދަނީ. ދެން އަޅުގަނޑަށް ލަފާކުރެވޭ ގޮތުގައި ޕްރޮސިކިއުޓަރ ޖެނެރަލް މި ދަޢުވާ އުފުލާފައި މިވަނީ އެ ބޭނުންވާ ހެކި، އެކަށީގެންވާ ހެކި، ނުހޯއްދަވާ. ދެން ޙަޤީޤަތުގައި ހެއްކެއްނުވެސް ނެތް. އެހެންވީމާ، ދެން ހެއްކެއް ނެތުނީމަ ހައްތާ އަބަދުވެސް ފެބްރިކޭޓްކުރެވޭނީ.

ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު

ޒާޔާއާ ދެކޮޅަށް އެއްވެސް ހެއްކެއް ނެތް ކަމަށާއި، ހެކި ނެތުމުން ދެން ކުރާނެ ކަމަކީ ހެކި އުފެއްދުން ނުވަތަ ފެބްރިކޭޓް ކުރުން ކަމަށް ނަޝީދު ވިދާޅުވި އެވެ. މިފަދަ ބޭއިންސާފު ކަންކަން ހިނގުމަކީ ރާއްޖޭގެ އަދުލުއިންސާފުގެ ނިޒާމަށް ލިބޭ ވަރަށް ބޮޑު ގެއްލުމެއްގެ ގޮތުގައި އެމަނިކުފާނު ސިފަކުރެއްވި އެވެ.

ރައީސް ނަޝީދު އިތުރަށް ވިދާޅުވީ، މި ދައުވާތަކަކީ ދައުލަތުން ކުރަންޖެހޭ ކަމެއް ނޫން ކަމަށާއި، މީގެން ދިވެހި ރައްޔިތުންނަށްވެސް އަދި ގައުމަށްވެސް ލިބޭނެ އެއްވެސް ފައިދާއެއް ނެތް ކަމަށެވެ. އެހެންކަމުން، މި ދައުވާތައް ދައުލަތުން އަނބުރާ ގެންދަވާނެ ކަމަށް ވަރަށް ބޮޑަށް އުއްމީދު ކުރައްވާ ކަމަށްވެސް އެމަނިކުފާނު ވިދާޅުވި އެވެ.

ޒާޔާގެ މައްޗަށް ދައުލަތުން އުފުލާފައިވަނީ ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ދައުވާ އެވެ. މި ދައުވާ އުފުލާފައިވަނީ ދިވެހިރާއްޖޭގެ ގާނޫނުލްއުގޫބާތުގެ 532 ވަނަ މާއްދާގެ (ހ) އާ ހަވާލާދީ، އެ މާއްދާގެ (ށ) ގެ ދަށުންނެވެ. މި މައްސަލައިގައި ޒަހިއްޔާ ހިމެނޭހެން ޖުމްލަ އަށް މީހެއްގެ މައްޗަށް ދައުވާ އުފުލާފައިވާއިރު، އޭގެ ތެރޭގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވެސް ހިމެނިވަޑައިގަންނަވަ އެވެ.