ރައީސް މުއިއްޒުގެ މި ސަރުކާރުގައި މިހާތަނަށް 80 އަށް ވުރެ ގިނަ މުވައްޒަފުންނަށް އަނިޔާވެރިވެފައިވޭ: އެމްޑީޕީ
މި ސަރުކާރުން މުވައްޒަފުންނަށް ވަޒީފާގެ ބިރުދައްކައި، ނުހައްގުން ވަޒީފާއިން ވަކިކުރަމުންދާ ކަމަށް ބުނެ އެމްޑީޕީން ވަނީ ކަންބޮޑުވުން ފާޅުކޮށްފައި. އެ ޕާޓީން ބޭއްވި ނޫސްވެރިންގެ ބައްދަލުވުމެއްގައި ގައުމީ މަޖިލީހުގެ މެމްބަރ ހުސައިން ވިދާޅުވީ، ވަޒީފާއާ ބެހޭ ޓްރައިބިއުނަލަށް މިހާތަނަށް 60 އަށް ވުރެ ގިނަ މައްސަލަ ހުށަހަޅާފައިވާ ކަމަށް. މީގެ އިތުރުން، ވަޒީފާގެ ހައްގުތައް ކަށަވަރުކޮށްދިނުމަށް އެމްޑީޕީގެ ލީގަލް ޓީމުން މުވައްޒަފުންނަށް ގާނޫނީ އެހީތެރިކަން ފޯރުކޮށްދެމުންދާނެ ކަމަށް ވެސް އޭނާ ވިދާޅުވި.
ބުރާސްފަތި ދުވަހު އެމްޑީޕީގެ ހަރުގޭގައި ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ގައުމީ މަޖިލީހުގެ މެންބަރު ހުސައިން ހަސަން ވާހަކަ ދައްކަވަނީ. | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ މިސަރުކާރުގައި މިހާތަނަށް 80 އަށް ވުރެ ގިނަ މުވައްޒަފުންނަށް އަނިޔާވެރިވެފައިވާ ކަމަށް ތަފާސްހިސާބުތަކުން ދައްކާ ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ން ބުނެފި އެވެ.
ބުރާސްފަތި ދުވަހު އެމްޑީޕީގެ ހަރުގޭގައި ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ގައުމީ މަޖިލީހުގެ މެންބަރު ހުސައިން ހަސަން ވިދާޅުވީ ''ވަޒީފާ ބުރާސްފަތި'' ނަމުގައި މުޒާހަރާއަށް ނުކުންނަނީ ވަޒީފާއިން ވަކިކޮށް ނުވަތަ ސަސްޕެންޑް ކުރަމުންދާ މުވައްޒަފުންގެ ހައްގުގައި ކަމަށާއި، މި އަނިޔާވެރިކަން ވަރަށް ބޮޑު ވެފައިވާ ކަމަށެވެ. އަދި މިހާރު ވަޒީފާގެ ބިރު ދެއްކުން އިންތިހާއަށް ބޮޑުވެފައިވާ ކަމަށް ކަމަށް އޭނާ ވިދާޅުވި އެވެ.
މީގެ އިތުރުން ހުސެއިން ވިދާޅުވީ މިހާތަނަށް ލިބުނު މައުލޫމާތަށް ބަލާއިރު، ވަޒީފާގެ ކަންކަމުގައި 80 އަށް ވުރެ ގިނަ މުވައްޒަފުންނަށް އަނިޔާ ލިބިފައިވާ ކަމަށެވެ. އަދި ވިދާޅުވީ އަނިޔާ ލިބިފައިވާ މުވައްޒަފުންގެ ހައްގުގައި އެމްޑިޕީގެ ލީގަލްޓީމުން މަސައްކަތް ކުރަމުންދާ ކަމަށާއި، މިހާރު ވެސް ވަޒީފާއާ ބެހޭ ޓްރައިބިއުނަލްގައި 60 ވުރެ ގިނަ މައްސަލަ އެބައޮތް ކަމަށެވެ.
މިއީ މިއަދަކު ނޫނީ އިއްޔެއަކު ހިނގާގެން އުޅޭ ކަމެއް ނޫން. މިހާތަނަށް އަޅުގަނޑުމެންގެ ރިކޯޑްސްތަކުން ފެންނަ ގޮތުން 80ށް ވުރެ ގިނަ މުވައްޒަފުން ވަޒީފާއިން ވަކިކޮށްގެން ސަސްޕެންޑް ކޮށްގެން މިފަދަ މައްސަލަތައް އަޅުގަނޑުމެންނަށް ލިބިފައި އެބަހުރި. މިވަގުތު ވެސް ވަޒީފާއާ ބެހޭ ޓްރައިބިއުނަލްގައި އަޅުގަނޑުމެންގެ ލީގަލް ޓީމުން އެބޭފުޅުން ތަމްސީލު ކުރަމުންދާ މައްސަލަތަކުގެ އަދަދު 60 ށް އެބަ އަރާ. ވަޒީފާއާ ބެހޭ ޓްރައިބިއުނަލްގައި ނުހައްގުން ވަޒީފާއިން ވަކި ކޮށްގެން ހިންގާ މައްސަލަތައް 60 އަށް އެބަ އަރާ. އަދި މިދިޔަ އަންގާރަ ދުވަހު އަޅުގަނޑުމެންގެ ލީގަލް ޓީމުން މައުލޫމާތު ދޭ ގޮތުގައި 10 ވަރަކަށް މައްސަލަ މިގޮތަށް އަޅުގަނޑުމެން އެބޭފުޅުންގެ ލީގަލް ޓީމަށް ހުށަހަޅާފައިވެއްޖެ.
ހުސެއިން ވިދާޅުވީ މިސަރުކާރުން ވަޒީފާގެ ބިރު ދެއްކުން އާއްމު ކަމަކަށް ހަދާފައިވާ ކަމަށާއި، މިވާހަކަތައް ދައްކަމުންދާތާ އެތައް ދުވަހެއް ވެފައިވާ ކަމަށެވެ.
އެހެންކަމުން ބުރާސްފަތި ދުވަހުގެ ރޭ ބާއްވާ މި މުޒާރަހާގައި އެމްޑީޕީގެ ލީޑަރޝިޕުން ބައިވެރިވެވަޑައިގަންނަވާނެ ކަމަށާއި، ޢައްމުން ވެސް ބައިވެރުމަށް އެދުނެވެ. އަދި ދެން ކުރިއަށް އޮތްތަނުގައި މިޕާޓީ މަޑުން ނޯންނާނެ ކަމަށް އޭނާ ވިދާޅުވި އެވެ.
