ޓްރަމްޕްގެ އިންޒާރު އީރާނަށް: އެއްބަސްވުމަށް އަމަލުނުކުރާނަމަ އަލުން ބޮން އަޅާނަން

އެމެރިކާ އާއި އީރާނާ ދެމެދު ކުރަމުންދާ ހަނގުރާމަ ނިމުމަކަށް ގެނައުމުގެ އެއްބަސްވުމުގައި ސޮއިކުރުމަށް ދެ ދުވަހަށް ވެފައިވަނިކޮށް، އީރާނުން އެ ގައުމުގެ ޒިންމާތަކާ އެއްގޮތައް އަމަލުނުކުރާނަމަ އަލުން އަސްކަރީ ފިޔަވަޅު އެޅުމަށް ތައްޔާރަށް ހުންނެވި ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ދެއްވައިފިއެވެ.

ޖީ7 ސަމިޓުގެ ތެރެއިން ވާހަކަދައްކަވަމުން، އަންނަ ހުކުރު ދުވަހު ސުވިޒަލޭންޑުގައި ސޮއިކުރުމަށް ހަމަޖެހިފައިވާ އެއްބަސްވުމާ ގުޅޭގޮތުން ޓްރަމްޕް ވިދާޅުވީ، މިއީ އަދި އެންމެ ފަހުގެ ނިންމުން ނޫން ކަމަށާއި، މިއީ ހަމައެކަނި ފަހުމުނާމާއެއް (އެމް.އޯ.ޔޫ) ކަމަށެވެ.

މިސްރުގެ ރައީސް އަބްދުލް ފައްތާހު އަލް ސީސީއާއެކު ހުންނަވައި ވާހަކަދައްކަވަމުން ޓްރަމްޕް އިތުރަށް ވިދާޅުވީ، އެ އެއްބަސްވުމާ މެދު ހިތްޕުޅުހަމަނުޖެހޭނަމަ، އީރާނަށް އަލުން ބޮމުގެ ހަމަލާތައް ދޭން ފައްޓަވާނެ ކަމަށެވެ.

އަދި އީރާނުން ރަނގަޅަށް އަމަލުނުކުރާނަމަ، އެ ގައުމުގެ މެދުތެރެއަށް އަމާޒުކޮށް އަލުން ބޮން އަޅަން ފައްޓަވާނެ ކަމަށްވެސް ޓްރަމްޕް ވިދާޅުވިއެވެ.

އެމެރިކާގެ މަދަދުގާރު ޝާހުގެ ވެރިކަން 1979 ވަނަ އަހަރު ވައްޓާލުމަށްފަހު އުފެދުނު އިސްލާމީ ޖުމްހޫރިއްޔާއަށް އިޝާރާތް ކުރައްވައި ޓްރަމްޕް ވިދާޅުވީ، މިފަދަ ހަރުކަށި ފިޔަވަޅެއް އަޅަން ޖެހެނީ ވޭތުވެދިޔަ 47 އަހަރު ދުވަހު އެ ގައުމުން އަމަލުކޮށްފައިވަނީ ގޯސްކޮށް ކަމަށްވާތީ ކަމަށެވެ.

އީރާނާ ދެކޮޅަށް އެމެރިކާ އާއި އިޒްރޭލުން ހަނގުރާމަ ފެށީ މިއަހަރުގެ ފެބްރުއަރީ މަހުގެ 28 ވަނަ ދުވަހު ދިން ވައިގެ ހަމަލާތަކަކުންނެވެ. މި ހަމަލާތަކުގައި އީރާނުގެ އެންމެ މަތީ ލީޑަރު އަލީ ޚާމަނާއީ އާއި އެ ގައުމުގެ އިސް އޮފިޝަލުންތަކެއް ވަނީ އަވަހާރަކޮށްލާފައެވެ.

މި ހަނގުރާމަ ނިމުމަކަށް ގެނައުމަށް އެމެރިކާ އާއި އީރާނާ ދެމެދު ވެވޭ އެންމެ ފަހުގެ އެއްބަސްވުމުގެ މަޝްވަރާތައް ފެށުމަށް ހަމަޖެހިފައިވަނީ ހުކުރު ދުވަހު ސުވިޒަލޭންޑުގައި ސޮއިކުރާ އެއްބަސްވުމާ އެކުގައެވެ. އަދި މި އެއްބަސްވުމުގެ ތަފްސީލުތައް ފުރިހަމަކުރުމަށް 60 ދުވަހުގެ މުއްދަތެއް ހޭދަވާނެ ކަމަށް ބެލެވެއެވެ.