އެމެރިކާއާއި އީރާނުގެ ހަމަނުޖެހުންތައް ނިމުމަކަށް ގެނައުމަށް އެއްބަސްވުމަކަށް އާދެވުނު ނަމަވެސް ޝައްކުތަކާއި ރިސްކުތައް ފިލައިގެން ނުދޭ!

އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތައް ނިމުމަކަށް ގެނައުމަށް އެއްބަސްވުމަކަށް އާދެވިފައިވާކަން އިޢުލާނުކުރުމަކީ، ޑޮނަލްޑް ޓްރަމްޕަށް އޭނާގެ އުފަންދުވަހާ ދިމާކޮށް ލިބުނު ވަރަށް ބޮޑު ހަދިޔާއެކެވެ. ނަމަވެސް މި އެއްބަސްވުމާ މެދު އަދިވެސް ވަނީ ނޭނގުމާއި ޝައްކުތަކެއްގެ ތެރޭގައެވެ.

މި އެއްބަސްވުމާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި އެމެރިކާގެ ރައީސް ވިދާޅުވީ، ހުރްމުޒް ކަނޑުއޮޅި ވިޔަފާރި އުޅަނދުފަހަރަށް ހުޅުވާލެވޭނެ ކަމަށާއި، އެމެރިކާއިން އެ ސަރަހައްދުގައި ހިންގަމުންދާ ކަނޑުގެ ބްލޮކޭޑް ނުވަތަ ބަންދުކުރުންތައް ނިމުމަކަށް ގެންނާނެ ކަމަށެވެ.

އާދީއްތަ ދުވަހު ޓްރަމްޕް ވިދާޅުވީ "ތެޔޮ ބޭރުކުރުމަށް ފުރުސަތު ދޭށެވެ!" މިފަދައިންނެވެ.

މީގެ ކުރިން އެމެރިކާގައި ތިއްބެވި ރައީސުންނަށް މިކަމުގައި ކާމިޔާބީއެއް ހޯދިފައި ނުވި ނަމަވެސް، މުޅި ސަރަހައްދަށް "ސުލްހައާއި އަމާންކަން" ގެނެސްދޭނެ "މުހިންމު އެއްބަސްވުމެއް" އޭނާ ކާމިޔާބު ކުރައްވާފައިވާ ކަމަށް ޓްރަމްޕް ވިދާޅުވިއެވެ.

މިފަދަ ބޮޑެތި ވާހަކަތަކަކީ ޓްރަމްޕްގެ ފަރާތުން އާ ކަމެއް ނޫނެވެ. މިދިޔަ އަހަރު ޣައްޒާ ހަނގުރާމަ ނިމުމަކަށް ގެނައުމަށް ވެވުނު އެއްބަސްވުމާ ގުޅޭގޮތުންވެސް، އެއީ "އަބަދަށްދެމިގެންދާނެ ސުލްހައެއް" ކަމަށާއި "އުންމީދުގެ އާ ޒަމާނެއްގެ ފެށުން" ކަމަށް އޭނާ ސިފަކުރެއްވިއެވެ. ނަމަވެސް، ބިންމަތީގެ ހަގީގީ ހާލަތު އޮތީ އެ ވިދާޅުވި ބަސްފުޅުތަކާ ވަރަށް ދުރުގައެވެ.

މިފަދަ ނާޒުކު ޑިޕްލޮމެޓިކް އެއްބަސްވުންތަކުގައި، ކާމިޔާބީ ނުވަތަ ނާކާމިޔާބީ ބިނާވެފައި އޮންނަނީ އޭގެ ތަފުސީލުތަކުގެ މައްޗަށެވެ. ނަމަވެސް މި އެއްބަސްވުމުގައި އެފަދަ ތަފުސީލުތައް ފެންނާކަށް ނެތެވެ.

އާދީއްތަ ދުވަހުގެ ރޭ ފޮކްސް ނިއުސްއަށް ދެއްވި އިންޓަވިއުއެއްގައި ނައިބު ރައީސް ޖޭޑީ ވޭންސް ވިދާޅުވީ، އީރާނުން ދުވަހަކުވެސް ނިއުކްލިއާ ހަތިޔާރެއް ނުއުފެއްދޭނެކަން މި އެއްބަސްވުމުގެ ދަށުން ކަށަވަރުކޮށްފައިވާނެ ކަމަށާއި، އެމެރިކާއަށް އެކަން މޮނިޓާ ކުރެވޭނެ ކަމަށެވެ.

އެހެންނަމަވެސް، ޔުރޭނިއަމް މުއްސަނދިކުރުމަށް ހުރި ހުރަސްތަކަކީ ކޮބައިކަމާއި، މިހާރު އީރާނުން މުއްސަނދިކޮށްފައިވާ ޔުރޭނިއަމް އަށް ހަދާނެ ގޮތަކާ މެދު އަދިވެސް ވަނީ ސުވާލު އުފެދިފައެވެ.

މިކަންކަމުގެ ތަފުސީލުތައް ކުރިއަށް އޮތް 60 ދުވަހުގެ ސުލްހައިގެ މުއްދަތުގައި ކުރެވޭ "ޓެކްނިކަލް" މަޝްވަރާތަކުގައި ނިންމޭނެ ކަމަށް ބެލެވެއެވެ. ނަމަވެސް، އީރާނުގެ ނިއުކްލިއާ އުންމީދުތައް ހުއްޓުވުމަށް އެތައް އަހަރެއް ވަންދެން ކުރި މަސައްކަތުން އެނގުނު ކަމަކީ، މިފަދަ "މެމޮރެންޑަމް އޮފް އެންޑަސްޓޭންޑިންގ" އެއްގައި ކޮންމެ އެއްޗެއް ލިޔެފައި އޮތް ނަމަވެސް، އެއްވެސް ކަމެއްގައި ޔަގީންކަމެއް ނެތް ކަމެވެ.

މިކަން ހާމަވެގެންދަނީ އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލުން އާދީއްތަ ދުވަހު ނެރުނު ބަޔާނުންނެވެ. އެ ބަޔާނުގައި ބުނެފައިވަނީ "އެންމެ ފަހުގެ މަޝްވަރާތައް ކުރިއަށްދާނީ، އެއްބަސްވުމުގެ ދަށުން އަނެއް ފަރާތުން (އެމެރިކާއިން) ފުރިހަމަކުރަންޖެހޭ ކަންކަން ފުރިހަމަކުރުމުން" ކަމަށެވެ.

އެމެރިކާއިން ފުރިހަމަކުރަންޖެހޭ ކަންކަމަކީ ކޮބައިކަމާއި، އީރާނުން އެކަންކަން މާނަކުރާ ގޮތެއްގެ މައްޗަށް މި އެއްބަސްވުން ދެމިއޮތުން ބިނާވެގެންވެއެވެ.

ހަކަތައިގެ ބާޒާރުގެ މާހިރުން އިންޒާރު ދޭ ގޮތުގައި، ހުރްމުޒް ކަނޑުއޮޅިން ތެޔޮ އުފުލުން ހަނގުރާމައިގެ ކުރިން އޮތް ހާލަތަށް ވަގުތުން ރުޖޫއައެއް ނުވާނެއެވެ. ތެޔޮ ޓޭންކަރުތަކުގެ ކިއުތައް ކުޑަކުރުމާއި، ކަނޑުގައި ވަޅުލާފައިވާ މައިންތައް ނެގުމާއި، ތެޔޮ އުފެއްދުމާއި އުފުލުން އާންމު ހާލަތަށް ގެނައުމަށް އެތައް ހަފުތާއެއް ނަގާނެއެވެ.

އެއްބަސްވުމުގައި ރަސްމީކޮށް ސޮއިކުރުމަށް އަދި ދުވަސްކޮޅެއް އޮތްއިރު، އީރާނާއި އެމެރިކާއަށް މުހިންމު ތަފުސީލުތައް ނިންމުމަށް ފުރުސަތު އެބައޮތެވެ. ނަމަވެސް ހަމަ އެހެންމެ، މި އެއްބަސްވުން ރޫޅިގެން ދިއުމުގެ ފުރުސަތުވެސް އެބައޮތެވެ.

މި މައްސަލައިގައި ދެން އޮތް އެންމެ ބޮޑު ނުތަނަވަސްކަމަކީ އިޒްރޭލެވެ.

މިއީ އަބަދުވެސް ތިން ފަރާތެއް ހިމެނޭ ހަނގުރާމައެކެވެ. ޓްރަމްޕް އާދީއްތަ ދުވަހު ވޯލް ސްޓްރީޓް ޖާނަލްއަށް ވިދާޅުވީ، މި ހަފުތާ ބަންދުގައި ލުބުނާނަށް ހަމަލާދިނުމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަމުރުކުރެއްވުމުން ވަރަށް ބޮޑަށް ކޯފާވި ކަމަށެވެ. އެއީ އެ ހަމަލާތަކުގެ ސަބަބުން އީރާނާއެކު ވެވޭ އެއްބަސްވުމަށް ހުރަސް އެޅިދާނެތީއެވެ.

މިހާތަނަށް އެއްބަސްވުން ދެމިއޮތީ ހަމައެކަނި އެކަން އާންމުކޮށް އިޢުލާނުކުރެވޭ ވަރަށެވެ. ނަމަވެސް އިޒްރޭލުން ލުބުނާނުގައި އާ އަސްކަރީ އޮޕަރޭޝަންތަކެއް ފަށައިފިނަމަ، އީރާނުން އަލުން ހުރްމުޒް ކަނޑުއޮޅި ބަންދުކޮށް، ދުނިޔޭގެ އިގްތިސާދު އަނެއްކާވެސް ނުރައްކަލުގެ ތެރެއަށް ވައްޓާލަފާނެއެވެ.

ނައިބު ރައީސް ވޭންސްގެ ވާހަކަފުޅުގައި، ހަކަތައިގެ އަގު ބޮޑުވުމުގެ ސަބަބުން އެމެރިކާގެ ގިނަ ރައްޔިތުންނަށް އުފުލަންޖެހުނު ތަކުލީފުތައް ގަބޫލުކުރެއްވިއެވެ.

"އެމެރިކާގެ ރައްޔިތުންނަށް އަޅުގަނޑު ބުނަން އޮތް މައިގަނޑު ވާހަކައަކީ ޝުކުރިއްޔާއޭ،" ހަކަތައިގެ އަގުތައް ދަށްވާން ފަށާނެ ކަމުގެ ވައުދުވަމުން އޭނާ ވިދާޅުވިއެވެ.

އަގުތައް ދަށްވާ މިންވަރާއި، އޭގެ ސަބަބުން އާންމު ރައްޔިތުންގެ ދިރިއުޅުމުގެ ޚަރަދުތަކަށް ކުރާ ހެޔޮ އަސަރުގެ މައްޗަށް، ނޮވެމްބަރު މަހު އޮންނަ މިޑްޓާމް އިންތިޚާބުގެ ކުރިން ރިޕަބްލިކަން ޕާޓީއަށް އޮތް ސިޔާސީ ފިއްތުންތައް ކުޑަވާނެތޯ ނުވަތަ ނޫންތޯ ބިނާވެގެންވެއެވެ.

ފަހުގެ ސާވޭތަކުން ދައްކާގޮތުގައި، ޓްރަމްޕާއި އޭނާގެ ޕާޓީއަށް އާންމުންގެ ނުރުހުން ވަނީ އިތުރުވެފައެވެ. ޔޫގަވް (YouGov) އިން ކުރި ސާވޭއަކުން ދައްކާގޮތުގައި 63 އިންސައްތަ އެމެރިކާ ރައްޔިތުން ޓްރަމްޕްގެ އިގްތިސާދީ ސިޔާސަތުތަކާ މެދު ހިތްހަމަނުޖެހެއެވެ. އަދި 57 އިންސައްތަ މީހުން ގަބޫލުކުރާ ގޮތުގައި އިގްތިސާދު ދަނީ ދަށަށެވެ.

ކޮންމެއަކަސް، އާދީއްތަ ދުވަހުގެ އެއްބަސްވުމުގެ ސަބަބުން، ހިނގަމުންދާ ހަނގުރާމައިގެ ސަބަބުން ކުރިމަތިވެފައިވާ އިގްތިސާދީ ދަތިތަކަށް ކޮންމެވެސް ވަރެއްގެ ލުޔެއް ލިބޭނެއެވެ. ޕެޓްރޯލްގެ އަގު ހަގީގަތުގައިވެސް ދަށްވާން ފަށައިފިނަމަ، އެއީ ހާލަތު ރަނގަޅުވަމުންދާކަމުގެ ފެންނަން އޮތް ހެއްކަކަށް އެމެރިކާ ރައްޔިތުންނަށް ވާނެއެވެ.

ޓްރަމްޕްގެ ބޮޑެތި އަމާޒުތައް އަދި ހާސިލުނުވި ނަމަވެސް، އަދި ގައުމުގެ އެތެރޭގެ ސިޔާސީ މަސްރަހުގައި ނުރައްކާތަކެއް ހުރި ނަމަވެސް، މިއީ ހަނގުރާމައިގެ ކުރިން އޮތް ހާލަތަށް ރުޖޫއަވުމަށް އެޅުނު މުހިންމު ފިޔަވަޅެކެވެ.