ހަމަލާތައް ހުއްޓާލާ މަތިން ޔޫއޭއީން އީރާނަށް ފައިސާ ފޮނުވި ވާހަކަތައް ދޮގުކޮށްފި

ޔޫއޭއީއަށް އަމާޒުކޮށް ދެމުންދާ ހަމަލާތައް ހުއްޓާލުމުގެ އެއްބަސްވުމެއްގެ ދަށުން، އެ ގައުމުން އީރާނަށް ފައިސާ ފޮނުވި ކަމަށް ދެކެވޭ ވާހަކަތައް ޔުނައިޓެޑް އަރަބް އެމިރޭޓްސް (ޔޫއޭއީ) އިން ވަރަށް ބޮޑަށް ދޮގުކޮށްފިއެވެ.

ޔޫއޭއީން އީރާނަށް މަދުވެގެން 3 ބިލިއަން އެމެރިކާ ޑޮލަރު ފޮނުވި ކަމަށް ބުނާ ރިޕޯޓްތަކެއް ފެންމަތިވެފައިވަނީ މިދިޔަ ހުކުރު ދުވަހުއެވެ.

މިކަމާ ގުޅިގެން އެމިރޭޓްސްގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އެއީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. އަދި އީރާނުގެ ހިފަހައްޓާފައިވާ އެއްވެސް ފައިސާއެއް ޔޫއޭއީ މެދުވެރިކޮށް ދޫކޮށްފައި ނުވާނެ ކަމަށާއި، އެފަދަ ފައިސާއެއް ބަދަލުކުރުމަށް އެއްވެސް މަގަކުން އެހީތެރިވެދީފައި ނުވާނެ ކަމަށްވެސް އެ މިނިސްޓްރީން ވަނީ ބުނެފައެވެ.

މީގެ އިތުރުން، ޚަބަރު ފަތުރާ ވަސީލަތްތަކުން މައުލޫމާތުގެ ސައްހަކަން ކަށަވަރުކުރުމަށާއި، ރަސްމީ މަސްދަރުތަކަށް ބަރޯސާވުމަށް އެ މިނިސްޓްރީން ވަނީ ގޮވާލާފައެވެ. އަދި ކަށަވަރު ނުކުރެވޭ މައުލޫމާތާއި އަސާސެއް ނެތް ތުހުމަތުތައް ފެތުރުމުން ދުރުހެލިވުމަށްވެސް އިލްތިމާސްކޮށްފައިވެއެވެ.

ސަރަހައްދީ ދެ މަސްދަރަކާ ހަވާލާދީ ރޮއިޓާސްއިން ކުރިން ރިޕޯޓްކޮށްފައިވާ ގޮތުގައި، ޖުމްލަ 10 ބިލިއަން ޑޮލަރު އީރާނަށް ދޫކުރުމަށް ޔޫއޭއީން ވަނީ އެއްބަސްވެފައެވެ. ނަމަވެސް އެހެން ދެ މަސްދަރަކުން ރޮއިޓާސްއަށް މައުލޫމާތު ދީފައިވާ ގޮތުގައި، މި މުއާމަލާތުގައި ހިމެނޭ ފައިސާގެ ޖުމްލަ އަދަދު އުޅެނީ 20 ބިލިއަން ޑޮލަރާ ގާތްކުރާ މިންވަރެއްގައެވެ.

މި އެއްބަސްވުމުގެ މައުލޫމާތު އެނގޭ މަސްދަރަކުން ރޮއިޓާސްއަށް ބުނެފައިވަނީ، ޔޫއޭއީން މި ފައިސާ ދޫކުރުމުން، އޭގެ ބަދަލެއްގެ ގޮތުން އީރާނުން ޔޫއޭއީއަށް އަމާޒުކޮށް ފޮނުވާ މިސައިލާއި ޑްރޯން ހަމަލާތައް ހުއްޓާލާނެ ކަމަށެވެ.

މި ހަފުތާގެ ކުރީކޮޅު ފެތުރުނު ރިޕޯޓްތައް ބުނާގޮތުން، އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) ގެ އޮފިޝަލުންތަކެއް ޔޫއޭއީއަށް ކުރެއްވި ޒިޔާރަތަކަށްފަހު، މިކަމާ ގުޅޭ އިންތިޒާމުތަކާ ބެހޭގޮތުން މަޝްވަރާކުރުމަށް ޔޫއޭއީގެ އޮފިޝަލުންތަކެއް ވެސް ވަނީ އީރާނަށް ދަތުރުކުރައްވާފައެވެ.