އެމެރިކާ އީރާން ސުލްހައިގެ އެންމެ ފަހުގެ ދެލިކޮޕީއަށް އެއްބަސްވެއްޖެ: ޕާކިސްތާން
އެމެރިކާއާއި އީރާނާ ދެމެދު ސުލްހަ ގާއިމުކުރުމަށް ޕާކިސްތާނުން މެދުވެރިއެއްގެ ދައުރު އަދާކުރަމުންދާއިރު، މި އެއްބަސްވުމުގެ އެންމެ ފަހުގެ މަރުހަލާތައް ނިންމުމަށް އެ ގައުމުން ދަނީ ދެ ފަރާތާ އެކު ގާތުން މަސައްކަތް ކުރަމުން. އީރާނުގެ ޚާރިޖީ ވަޒީރު ވެސް މިކަމަށް މި މޭރުމުން ވާހަކަފުޅު ދައްކަވާފައިވާއިރު، ބޮޑުވަޒީރު ޝެހްބާޒް ޝަރީފް ވަނީ ސުލްހައިގެ މަސައްކަތްތަކަށް ހުރަސްއެޅުމަށް ބައެއް ފަރާތްތަކުން ދޮގު މައުލޫމާތު ފަތުރަމުންދާކަމަށް ވިދާޅުވެ ކަންބޮޑުވުން ފާޅުކުރައްވާފައި. އެހެންނަމަވެސް، މިއީ މެދުއިރުމަތީގެ ހަނގުރާމަ ހުއްޓާލުމަށް އެމެރިކާއާއެކު އެއްބަސްވުމަކަށް އާދެވުނު އެންމެ ގާތް ފުރުސަތުކަން ދެ ގައުމުން ވެސް ފާހަގަކުރޭ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފް. | އޭޕީ
އެމެރިކާއާއި އީރާނާ ދެމެދު ގާއިމުކުރާ ސުލްހައިގެ އެއްބަސްވުމުގެ އެންމެ ފަހުގެ ދެލިކޮޕީއަށް ދެ ގައުމުން އެއްބަސްވެފައިވާ ކަމަށް ޕާކިސްތާނުގެ ބޮޑުވަޒީރު ޝެހްބާޒް ޝަރީފް ހުކުރު ދުވަހު ވިދާޅުވެއްޖެއެވެ.
"ސުލްހައިގެ އެއްބަސްވުމުގެ އެންމެ ފަހުގެ ދެލިކޮޕީއަށް ދެ ފަރާތުން އެއްބަސްވެފައިވާކަން އަޅުގަނޑުމެންނަށް ކަށަވަރުކޮށްދޭނަން. އަދި މި އެއްބަސްވުމުގެ ކުރިއަށް ހުރި މަރުހަލާތައް ނިންމުމަށްޓަކައި ޕާކިސްތާނުން މިހާރު ދަނީ ދެ ގައުމާ އެކު ގާތުން މަސައްކަތް ކުރަމުން،" އެކްސްގައި ކުރެއްވި ޕޯސްޓެއްގައި ޝަރީފް ވިދާޅުވިއެވެ.
ބޮޑުވަޒީރު ޝަރީފް ކުރެއްވި މި ޕޯސްޓުގައި އެމެރިކާގެ ރައީސާއި އީރާނުގެ ރައީސްގެ އިތުރުން ދެ ގައުމުގެ އެހެން އިސްވެރިން ޓެގް ކުރައްވާފައިވެއެވެ. ޕާކިސްތާނުން ދަނީ މި ދެ ގައުމުގެ ދެމެދުގައި މެދުވެރިއެއްގެ ދައުރު އަދާކުރާތާ މަސްތަކެއް ވެފައެވެ.
"ސުލްހަ ގާއިމުވުމާ މިހާ ގާތަށް މީގެ ކުރިން ދުވަހަކުވެސް އާދެވިފައެއް ނުވޭ،" ޝަރީފް ވިދާޅުވިއެވެ.
އީރާނުން މަޝްވަރާތައް ކުރިއަށްގެންދަނީ އިޚުލާސްތެރިކަމެއް ނެތި ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ވަރަށް ބޮޑަށް ކޯފާވެ ތުހުމަތުތަކެއް ކުރައްވާފައި ވަނިކޮށް، މެދުއިރުމަތީގެ ހަނގުރާމަ ހުއްޓާލުމަށް އެމެރިކާއާ އެކު ވެވޭ އެއްބަސްވުމާ މިހާ ގާތަށް ދުވަހަކުވެސް އާދެވިފައި ނުވާ ކަމަށް އީރާނުގެ ޚާރިޖީ ވަޒީރު އައްބާސް އަރާގްޗީ ވެސް ހުކުރު ދުވަހު ވަނީ ވިދާޅުވެފައެވެ.
"ޕާކިސްތާނުން މެދުވެރިއެއްގެ ދައުރު އަދާކޮށްގެން ކުރިއަށްގެންދާ ބޮޑު މަސައްކަތްތަކާ އެކުވެސް، މި ސުލްހައިގެ އެއްބަސްވުމަށް ހުރަސްއަޅަން ބޭނުންވާ ފަރާތްތަކުން ހުއްޓުމެއް ނެތި ދޮގު މައުލޫމާތު ފަތުރަމުންދާކަން އަޅުގަނޑުމެންނަށް ވަރަށް ރަނގަޅަށް އެނގޭ،" ޝަރީފް އިތުރަށް ވިދާޅުވިއެވެ.
