ޓްރަމްޕްގެ ނުރުހުމާ އެކު ވެސް އިޒްރޭލުން އަނެއްކާވެސް ލުބުނާނަށް ވަރުގަދަ ހަމަލާތަކެއް ދީފި

އިޒްރޭލުގެ އަމަލުތަކާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް އަލުން ފާޑުވިދާޅުވެފައި ވަނިކޮށް، އިޒްރޭލު ސިފައިން ލުބުނާނުގެ ދެކުނަށް އަނެއްކާވެސް އާ ހަމަލާތަކެއް ދީފި ކަމަށް ރިޕޯޓްތައް ބުނެފިއެވެ.

ލުބުނާނުގެ ދައުލަތުގެ މީޑިއާ، ނޭޝަނަލް ނިއުސް އެޖެންސީ (އެން.އެން.އޭ) އިން ބުނި ގޮތުގައި ބުދަ ދުވަހު އިޒްރޭލުގެ ހަނގުރާމަމަތީ ބޯޓުތަކުން ވަނީ އެ ގައުމުގެ ނަބަތިއާ އަލް-ފައުގާ ސަރަހައްދަށާއި އަދި އަވަށްޓެރި ކްފާރް ތެބްނިތުގެ ބޭރު ސަރަހައްދުތަކަށް ހަމަލާދީފައެވެ. މި ހަމަލާތަކާ ގުޅޭގޮތުން އިޒްރޭލު ސިފައިން އަދި ވަކި އެއްޗެއް ބުނެފައި ނުވި ނަމަވެސް، މީގެ ކުރިން އެ ގައުމުން ބުނަމުން އައީ ހަމަލާތައް އަމާޒުކުރަނީ އީރާނުގެ މަދަދުލިބޭ ހިޒްބުالله ޖަމާއަތަށް ކަމަށެވެ.

ހަނގުރާމަ ހުއްޓާލުމަށްޓަކައި އެމެރިކާއާއި އީރާނާ ދެމެދު އެކުލަވާލާފައިވާ އެއްބަސްވުމުގެ ތަފްސީލު އަދި އާންމުކޮށްފައި ނުވި ނަމަވެސް، މި މުއާމަލާތުގައި މެދުވެރިއެއްގެ ދައުރު އަދާކުރާ ޕާކިސްތާނުން ބުނެފައިވަނީ އެ އެއްބަސްވުމުގައި ލުބުނާނުވެސް ހިމެނޭ ކަމަށެވެ.

އަންގާރަ ދުވަހު ވާހަކަދައްކަވަމުން ރައީސް ޓްރަމްޕް ވިދާޅުވީ، ލުބުނާނުގެ މައްސަލައިގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ މިއަށްވުރެ ޒިންމާދާރުވާން ޖެހޭ ކަމަށެވެ.

ފްރާންސްގައި ބޭއްވި ޖީ7 ސަމިޓުގައި ވާހަކަދައްކަވަމުން ޓްރަމްޕް އިތުރަށް ވިދާޅުވީ، އިޒްރޭލުން ހިޒްބުالله އާ ހަނގުރާމަކުރާތާ "މާ ގިނަ ދުވަސް" ވެއްޖެ ކަމަށާއި، މި ހަނގުރާމައިގައި "މާ ގިނަ ބަޔަކު މަރުވަމުންދާ" ކަމަށެވެ.

އާދީއްތަ ދުވަހުގެ ރޭ އެމެރިކާއާއި އީރާނުގެ އެއްބަސްވުން އިއުލާނުކުރި ފަހުންވެސް، އިޒްރޭލާއި ހިޒްބުالله އިން ދަނީ އެއްބަޔަކު އަނެއްބަޔަކަށް ހަމަލާތައް ބަދަލުކުރަމުންނެވެ.

އެ ދުވަހުގެ ކުރީކޮޅު، ހިޒްބުالله އިން ބޯޑަރު ހުރަސްކޮށް ދިން ރޮކެޓް ހަމަލާތަކަށް ރައްދު ދިނުމުގެ ގޮތުން އިޒްރޭލުން ބެއިރޫތަށް ދިން ވައިގެ ހަމަލާގެ ސަބަބުން، އެއްބަސްވުން ނިންމުމަށް ކުރަމުންދިޔަ މަސައްކަތްތަކަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

ޖީ7 ސަމިޓުގައި ޓްރަމްޕް ވިދާޅުވީ ނަތަންޔާހޫއާ އެކު "ގާތް ގުޅުމެއް" އޮންނަ ކަމަށެވެ. ނަމަވެސް އިޒްރޭލުން ދިން ހަމަލާއަކީ "މާ ބޮޑުވަރުގެ" ހަމަލާއެއް ކަމަށާއި، އެކަމާ ހިތްހަމަނުޖެހޭ ކަމަށް އޭނާ ވިދާޅުވިއެވެ.

ޓްރަމްޕް އިތުރަށް ވިދާޅުވީ، "އެމެރިކާއާ ނުލައި އިޒްރޭލެއް ނޯންނާނެ" ކަމަށެވެ. އަދި އެހެން އެއްވެސް ރައީސަކަށް ކުރަން ނުކެރުނު ކަންތައްތައް އޭނާ ކޮށްދީފައިވާތީ، އޭނާއާ ނުލައިވެސް އިޒްރޭލެއް ނޯންނާނެ ކަމަށް ޓްރަމްޕް ވިދާޅުވިއެވެ.

ބޮޑުވަޒީރު ނަތަންޔާހޫ ހޯމަ ދުވަހު ވިދާޅުވީ، ބޭނުންވާ މިންވަރަށް ލުބުނާނުގައި އިޒްރޭލު ސިފައިން ތިބޭނެ ކަމަށެވެ.

އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ ލުބުނާނަށް އިޒްރޭލުން ދޭ ކޮންމެ ހަމަލާއެއް ނުވަތަ ލުބުނާނުގެ ބިމުގައި އިޒްރޭލު ސިފައިން ތިބޭ ތިބުމަކީ، އެމެރިކާއާއެކު ވެފައިވާ ވަގުތީ އެއްބަސްވުމާ ޚިލާފުވުން ކަމަށް ބަލާނެ ކަމަށެވެ.

'މެމޮރެންޑަމް އޮފް އަންޑަސްޓޭންޑިންގ' އެއްގެ ގޮތުގައި ނަންދީފައިވާ މި އެއްބަސްވުމުގެ ތަފްސީލުތައް ރަސްމީކޮށް އަދި ހާމަކޮށްފައެއް ނުވެއެވެ.

ސްވިޒަލޭންޑުގެ ފޮރިން މިނިސްޓްރީން 'ޝްވައިޒް ހިއުޓޭ' ނޫހަށް މައުލޫމާތު ދިން ގޮތުގައި، ދެ ފަރާތުންވެސް މި އެއްބަސްވުމުގައި ސޮއިކުރާނީ އަންނަ ހުކުރު ދުވަހު ސްވިޒަލޭންޑުގެ ބާގަންސްޓޮކް ރިސޯޓުގައެވެ.

ރައީސް ޓްރަމްޕް ވިދާޅުވީ، އެމެރިކާއާއި އީރާނާ ދެމެދު ވެފައިވާ އެއްބަސްވުން އަކުރުން އަކުރަށް ކިޔައިދިނުމަށްޓަކައި ނޫސްވެރިންގެ ބައްދަލުވުމެއް ބާއްވަވާނެ ކަމަށެވެ.

މީގެ އިތުރުން، މި އެއްބަސްވުމުގެ ސަބަބުން އީރާނަށް ދުވަހަކުވެސް ނިއުކްލިއާ ހަތިޔާރެއް ނުލިބޭނެ ކަމަށާއި، ގަލްފުގެ މުހިންމު ކަނޑުއޮޅިއެއް ކަމަށްވާ ހުރުމުޒް ކަނޑުއޮޅި އަލުން ހުޅުވި، އެއްވެސް ފީއަކާ ނުލައި ދަތުރުކުރެވޭނެ ކަމަށްވެސް ޓްރަމްޕް ވިދާޅުވިއެވެ.

ޓްރަމްޕް ވަނީ ބަރަކް އޮބާމާގެ ރައީސްކަމުގައި ވެފައިވާ އެއްބަސްވުމަށްވުރެ މި އެއްބަސްވުން މާ ރަނގަޅުވާނެ ކަމަށް ވިދާޅުވެފައެވެ.

"އޮބާމާ ކުރެއްވި ގޮތަށް އަހަރެމެން މީގެ ބަދަލުގައި ފައިސާއެއް ނުދެން. އޭނާ ބިލިއަނުން ފައިސާ ދެއްވި،" އަންގާރަ ދުވަހު ޓްރަމްޕް ވިދާޅުވިއެވެ.

2015 ވަނަ އަހަރު އެމެރިކާއާއި ދުނިޔޭގެ ބާރުގަދަ ފަސް ގައުމަކާއެކު ވެފައިވާ 'ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން' (ޖޭ.ސީ.ޕީ.އޯ.އޭ) ގެ ދަށުން، އީރާނުން އެއްބަސްވީ އެ ގައުމުގެ ނިއުކްލިއާ ހަރަކާތްތައް މަދުކުރުމަށާއި ބައިނަލްއަގުވާމީ އިންސްޕެކްޓަރުންނަށް ފުރުސަތު ދިނުމަށެވެ. އޭގެ ބަދަލުގައި އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދީ، ހިފަހައްޓާފައިވާ ފައިސާ ދޫކޮށްލުމަށް ވަނީ ނިންމާފައެވެ.