ޓްރަމްޕްގެ ހަނގުރާމައިގެ ބާރުތައް ހަނިކުރުމަށް ކޮންގްރެސް އިން ކުރި މަސައްކަތް އަނެއްކާވެސް ނާކާމިޔާބު ކޮށްލައިފި
އީރާނާ ދެކޮޅަށް ކުރާ ހަނގުރާމަ ހުއްޓާލުމަށް އެމެރިކާގެ ސެނެޓަށް ހުށަހެޅި ގަރާރު 48 ވޯޓުގެ އަގުލަބިއްޔަތުން ވަނީ ބޭރުކޮށްލާފައި. މި ވޯޓު ނަގާފައިވަނީ ހަނގުރާމަ ހުއްޓާލުމުގެ އެއްބަސްވުމެއް އިއުލާންކޮށްފައި ވަނިކޮށް ކަމަށްވާއިރު، ގިނަ މެންބަރުން ވޯޓު ދެއްވީ އެ ބޭފުޅަކު ނިސްބަތްވާ ޕާޓީގެ ސިޔާސަތާ އެއްގޮތަށް.
ރަސަލް ސެނެޓް އޮފީސް ބިލްޑިންގް އިން އެމެރިކާގެ ކެޕިޓޮލް އިމާރާތް ފެންނަ މަންޒަރެއް. | ރޮއިޓާސް
އިޒްރޭލާއި އެމެރިކާއިން ފެބްރުއަރީ މަހު އީރާނަށް ވައިގެ ހަމަލާތައް ދޭން ފެށި ފަހުން، ކޮންގްރެސްގެ ހުއްދަ ނެތި ކުރިއަށްގެންދާ އީރާން ހަނގުރާމަ ހުއްޓުވުމަށް ކެޕިޓަލް ހިލްއިން ކުރި ނުވަވަނަ މަސައްކަތް، އަންގާރަ ދުވަހު އެމެރިކާގެ ސެނެޓުން ހަނި ތަފާތަކުން ނާކާމިޔާބުކޮށްލައިފިއެވެ.
ހަނގުރާމައިގެ ބާރުތަކާ ބެހޭ ގާނޫނުގެ ދަށުން ހުށަހެޅި މި ގަރާރާ އެއްކޮޅަށް 47 ވޯޓު ދިން އިރު ގަރާރު ބޭރުކޮށްލުމަށް ލިބުނީ 48 ވޯޓެވެ. މި ވޯޓު ނަގާފައިވަނީ ހަނގުރާމަ ހުއްޓާލުމަށާއި މަޝްވަރާތައް ކުރިއަށް ގެންދިއުމަށް ވައިޓް ހައުސްއާއި ތެހެރާނުން މި ހަފުތާގައި އެއްބަސްވުމެއް އިއުލާންކޮށްފައި ވަނިކޮށެވެ.
މި ވޯޓުގައި މެންބަރުން އަމަލުކޮށްފައިވަނީ ބޮޑަށް އެ ބޭފުޅަކު ނިސްބަތްވާ ޕާޓީގެ ސިޔާސަތާ އެއްގޮތަށެވެ. އެގޮތުން ރިޕަބްލިކަން ޕާޓީގެ ލޫސިއާނާގެ ބިލް ކެސިޑީ، މެއިންގެ ސޫޒަން ކޮލިންސް، އެލަސްކާގެ ލީސާ މާކޯވްސްކީ އަދި ކެންޓަކީގެ ރޭންޑް ޕޯލް ވަނީ ގިނަ ޑިމޮކްރެޓުންނާއެކު މި ގަރާރަށް ތާއީދުކޮށް ވޯޓު ދެއްވާފައެވެ. ނަމަވެސް ޕެންސިލްވޭނިއާގެ ޑިމޮކްރެޓިކް ސެނެޓަރު ޖޯން ފެޓަރމަން ވަނީ ގިނަ ރިޕަބްލިކަނުންނާއެކު މި ގަރާރާ ދެކޮޅަށް ވޯޓު ދެއްވާފައެވެ.
މި ވޯޓުގައި ފަސް ސެނެޓަރަކު ބައިވެރިވެވަޑައެއް ނުގަންނަވައެވެ. އެއީ ރިޕަބްލިކަން ޕާޓީގެ ކެންޓަކީގެ މިޗް މެކޮނެލް އާއި މިސޫރީގެ ޖޯޝް ހޯލީގެ އިތުރުން، ޑިމޮކްރެޓިކް ޕާޓީގެ ކޮލޮރާޑޯގެ މައިކަލް ބެނެޓް އާއި ނިއު ޖާޒީގެ ކޮރީ ބުކަރ އަދި މިނިވަން މެންބަރެއްގެ ގޮތުގައި ހުންނެވި ވާމަންޓްގެ ބާނީ ސޭންޑާސްއެވެ.
މި ވޯޓު ނަގާފައިވަނީ، ހަނގުރާމަ ނިންމުމަށް ރައީސް ޑޮނަލްޑް ޓްރަމްޕް އާދިއްތަ ދުވަހު އިއުލާންކުރެއްވި ފަހުމުނާމާއާ ގުޅޭ ތަފުސީލުތައް ޓްރަމްޕްގެ ސަރުކާރުން ހިއްސާކުރާނެ ވަގުތަކަށް ގާނޫނު ހަދާ މަޖިލީހުގެ މެންބަރުން އިންތިޒާރު ކުރަމުންދާ ދަނޑިވަޅެއްގައެވެ.
ޑިމޮކްރެޓުންނާއި ޓްރަމްޕް ނިސްބަތްވާ ރިޕަބްލިކަން ޕާޓީގެ ބައެއް މެންބަރުން ވެސް ދަނީ އެ މަޝްރޫއުގެ ތަފުސީލުތައް ހާމަކުރުމަށް ސަރުކާރަށް ގޮވާލަމުންނެވެ.
އެމެރިކާގެ ސެނެޓާއި ހައުސް އޮފް ރެޕްރެޒެންޓެޓިވްސްގެ މެޖޯރިޓީ މިވަގުތު އޮތީ ރިޕަބްލިކަން ޕާޓީގެ އަތުގައެވެ. ހައުސް އޮފް ރެޕްރެޒެންޓެޓިވްސްއިން ވެސް ދާދިފަހުން ވަނީ އީރާން ހަނގުރާމަ ނިންމުމަށް ގޮވާލާ ގަރާރަކަށް ތާއީދުކޮށްފައެވެ.
