އެމްބާޕޭގެ ދެ ލަނޑާ އެކު، ފްރާންސް އަށް ތާރީޚީ މޮޅެއް

މިހާރު ކުރިއަށްދާ ފީފާ ވޯލްޑް ކަޕް ގުރޫޕް އައިގައި ސެނެގާާލްއާ ދެކޮޅަށް ކުޅުނު މެޗުން މޮޅުވެ، ފްރާންސް އިން ތާރީޚީ މޮޅެއް ހޯދައިފި އެވެ.

އެމެރިކާގެ ނިއު ޔޯކް ނިއު ޖާޒީ ސްޓޭޑިއަމްގައި އަންގާރަ ދުވަހުގެ ރޭ ދަންވަރު ކުޅުނު މެޗު ފްރާންސް އިން ކާމިޔާބު ކުރީ 3-1 އިންނެވެ. މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގައި އެވެ. 

މެޗު ފަށައިގެން ފްރާންސް އިން ވަނީ ރަނގަޅަށް ކުޅެ ލަނޑު ޖަހަން ފުރުސަތު ހޯދައިފަ އެވެ. މެޗުގެ ފުރަތަމަ ހާފުގައި ވެސް ފްރާންސްގެ ކެޕްޓަން ކީލިއަން އެމްބާޕޭ އަށް ވަނީ ލަނޑު ޖަހަން ފުރުސަތު ލިބިފައި އެވެ.

މެޗުގެ ދެ ވަނަ ހާފުގެ 66 ވަނަ މިނެޓުގައި އެމްބާޕޭ ވަނީ ލަނޑު ޖަހައި ފްރާންސް އަށް ލީޑު ނަގައިދީފައި އެވެ. އެ ލަނޑު ޖަހަން އެމްބާޕޭ އަށް ފުރުސަތު ތަނަވަސްކޮށްދިނީ މައިކަލް އޮލައިސޭ އެވެ. އޭގެ ފަހުން 82 ވަނަ މިނެޓުގައި ބްރާޑްލޭ ބާކޮލާ ވަނީ ފްރާންސްގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެއީ އެޑްރިއަން ރަބިއޮޓް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ސެނެގާލްގެ ހަމައެކަނި ލަނޑު ޖެހީ އިބްރާހިމް އެމްބާއޭ އެވެ. ނަމަވެސް، އޭގެ އިރުކޮޅެއް ފަހުން އެމްބާޕޭ ވަނީ ފްރާންސްގެ ތިން ވަނަ ލަނޑު ޖަހައިފަ އެވެ. އެ ލަނޑާ އެކު އެމްބާޕޭ ވެގެން ގޮސްފައި ވަނީ ފްރާންސް ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާާ އެވެ. އެގޮތުން ޤައުމީ ޓީމަށް އެމްބާޕޭ 58 ލަނޑު ޖަހައިދީފައިވާއިރު، ދެ ވަނައިގައި އޮތް އޮލީވިއޭ ޖިރޫޑް ޖަހާފައި ވަނީ 57 ލަނޑެވެ.

އަނެއްކޮޅުން މިއީ 24 އަހަރު ފަހުން ފްރާންސް އާއި ސެނެގާލް ވޯލްޑް ކަޕްގައި ބައްދަލު ކުރި ފުރަތަމަ ފަހަރެވެ. 2002 ވަނަ އަހަރުގެ ވޯލްޑް ކަޕްގައި ސެނެގާލްއާ ދެކޮޅަށް ކުޅެ ފްރާންސް ވަނީ ބަލިވެފައި އެވެ. އެހެންކަމުން 24 އަހަރަށް ފަހު ފްރާންސް އިން މި ވަނީ ސެނެގާލް އަތުން މޮޅުވެ، ބަދަލު ހިފައިފަ އެވެ.