މިޞްރާއި ބެލްޖިއަމް އެއްވަރު، މެޗު ޚާއްސަވީ ޞަލާޙު އަށް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ޖީގައި ބެލްޖިއަމް އާއި މިޞްރު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.

އެމެރިކާގެ ސީޓަލް ސްޓޭޑިއަމްގައި ހޯމަ ދުވަހުގެ ރޭ ދަަންވަރު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މިޞްރުންނެވެ. ނަމަވެސް، ބެލްޖިއަމް އިން ވަނީ ފަހަތުން އަރައި ނަތީޖާ ހަމަހަމަ ކޮށްފައި އެވެ.

މެޗު ފަށައިގެން 19 ވަނަ މިނެޓުގައި މިޞްރުން ވަނީ ބެލްޖިއަމް ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު މިޞްރަށް ޖަހައިދިނީ އިމާމް އާޝޫރު އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މިޞްރުގެ ކެޕްޓަން މުޙައްމަދު ޞަލާޙު އެވެ. 

މެޗުގައި ބެލްޖިއަމް އިން ވަނީ ކުރިއަށް ޖެހިގެން ލަނޑު ޖަހަން މަސައްކަތް ކޮށްފައި އެވެ. އެ ޓީމަށް މެޗުގެ ނަތީޖާ ހަމަހަމަވީ ދެ ވަނަ ހާފުގައި އެވެ. އެގޮތުން މެޗުގެ 66 ވަނަ މިނެޓުގައި ބެލްޖިއަމް އަށް ނަތީޖާ ހަމަހަމަވީ، މިޞްރުގެ މުހައްމަދު ހާނީ އަތުން ބައި ކޮޅަށް ވަތް ލަނޑުންނެވެ.

މެޗު އެއްވަރުވެގެން ނިމުނުއިރު، މިޞްރުގެ މި މެޗު ޚާއްސަވީ އެ ޓީމުގެ ޞަލާޙު އަށެވެ. އެގޮތުން އެ މެޗު ކުޅުނު ދުވަހަކީ ޞަލާޙުގެ އުމުރުން 34 ވަނަ އުފަން ދުވަހެވެ. އޭނާ އަކީ މިޞްރުގެ ޓީމުގައި ހިމެނޭ އެންމެ މުހިންމު ކުޅުންތެރިޔާ އެވެ. މުބާރާތުގެ ގުރޫޕު ސްޓޭޖުގައި މިޞްރުގެ ދެ ވަނަ މެޗުގައި ނިކުންނާނީ ނިއުޒިލެންޑްއާ ދެކޮޅަށެވެ. އަދި ފަހު މެޗުގައި ނިކުންނާނީ އީރާންއާ ދެކޮޅަށެވެ.

ބެލްޖިއަމްގެ ދެ ވަނަ މެޗުގައި އީރާންއާ ދެކޮޅަށް ކުޅޭއިރު، ފަހު މެޗުގައި ކުޅޭނީ ނިއުޒިލެންޑްއާ ދެކޮޅަށެވެ.