އުރުގުއޭ ކައިރިން ސައުދީ އިން ޕޮއިންޓެއް ހޯދައިފި

ފީފާ ވޯލްޑް ކަޕްގެ ގުރޫޕު އެޗްގައި އުރުގުއޭއާ ދެކޮޅަށް ކުޅުނު މެޗުން އެއްވަރުކޮށް، ސައުދީ އަރަބިއްޔާ އިން ޕޮއިންޓެއް ހޯދައިފި އެވެ.

އެމެރިކާގެ މިއާމީ ސްޓޭޑިއަމްގައި އަންގާރަ ދުވަހުގެ ފަތިހު ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ސައުދީ އިން ލަނޑު ޖަހައި ކުރި ހޯދާފައި ވަނިކޮށް، އުރުގުއޭ އިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފައި އެވެ.

މެޗު ފަށައިގެން ދެ ޓީމުގެ ފަރާތުން ވާދަވެރި ކުޅުމެއް ފެނުނުއިރު، ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް ސައުދީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސައުދީ އަށް ޖަހައިދިނީ އަބްދުﷲ އަލް އަމްރީ އެވެ. 

ދެ ވަނަ ހާފަށް ނިކުމެ އުރުގުއޭ އިން ވަނީ ކުރިއަށް ޖެހި، ލަނޑު ޖަހަން ގިނަ މަސައްކަތް ތަކެއް ކޮށްފައި އެވެ. އުރުގުއޭ އިން ވަނީ މެޗުގެ 80 ވަނަ މިނެޓުގައި ނަތީޖާ ހަމަހަމަ ކޮށްފައި އެވެ. އެއީ ސައުދީގެ ކީޕަރުގެ އަތުގައި ޖެހި ރީބައުންސް އަށް އައި ބޯޅަ ގޯލަށް ވައްދާލައިގެން ރޮނާލްޑް އަރައުހޯ ޖެހި ލަނޑެކެވެ. 

ސައުދީ އާއި އުރުގުއޭގެ ކުރިމަތިލުން އެއްވަރުވީއިރު، މި ގުރޫޕުގައި ސްޕެއިން އާއި ކޭޕް ވާޑްގެ ކުރިމަތިލުން ނިމުނީ އެއްވެސް ޓީމަކަށް ލަނޑެއް ނުޖެހި އެވެ. ސައުދީގެ ދެ ވަނަ މެޗުގައި ސްޕެއިންއާ ދެކޮޅަށް ކުޅޭއިރު، ފަހު މެޗުގައި ކުޅޭނީ ކޭޕް ވާޑްއާ ދެކޮޅަށެވެ. އުރުގުއޭގެ ދެ ވަނަ މެޗުގައި ކޭޕް ވާޑްއާ ދެކޮޅަށް ކުޅުމަށް ފަހު، ފަހު މެޗުގައި ކުޅޭނީ ސްޕެއިންއާ ދެކޮޅަށެވެ.