ފަސް ލަނޑުގެ މޮޅާ އެކު، ސްވިޑަން އަށް ވެސް ވަރުގަދަ ފެށުމެއް

ފީފާ ވޯލްޑް ކަޕްގެ ގުރޫޕު އެފްގައި ޓިއުނީޝިއާއާ ދެކޮޅަށް ކުޅުނު މެޗުން މޮޅުވެ، ސްވިޑަން އިން މުބާރާތުގައި ވަރުގަދަ ފެށުމެއް ހޯދައިފި އެވެ.

މެކްސިކޯގައި ހޯމަ ދުވަހުގެ ހެނދުނު ކުޅުނު މެޗު ސްވިޑަން އިން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ސްވިޑަން އިން ދެ ލަނޑު ޖެހިއިރު، ޓިއުނީޝިއާ އިން ލަނޑެއް ޖެހި އެވެ. ސްވިޑަން އިން އަނެއް ތިން ލަނޑު ޖެހީ މެޗުގެ ދެ ވަނަ ހާފުގައި އެވެ.

މެޗު ފަށައިގެން ހަތް ވަނަ މިނެޓުގައި ސްވިޑަން އަށް ލީޑު ނަގައިދިނީ ޔާސީން އަޔާރީ އެވެ. އޭގެ ފަހުން މެޗުގެ 30 ވަނަ މިނެޓުގައި އެލެގްޒެންޑާ އިސާކް ވަނީ ސްވިޑަންގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. އެ ލަނޑު ޖަހަން އިސާކް އަށް ފުރުސަތު ތަނަވަސްކޮށްދިނީ، ވިކްޓަ ޔޮކަރޭޝް އެވެ. އޭގެ ފަހުން ފުރަތަމަ ހާފުގެ ފަހު ވަގުތުގައި ޓިއުނީޝިއާގެ ހަމައެކަނި ލަނޑު ޖެހީ އޮމާރް ރެކިކް އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ޔޮކަރޭޝް ވަނީ ސްވިޑަންގެ ތިން ވަނަ ލަނޑު ޖަހައިފަ އެވެ. އެ ލަނޑު ޖަހަން ޔޮކަރޭޝް އަށް ފުރުސަތު ތަނަވަސްކޮށްދިނީ އިސާކް އެވެ. އޭގެ ފަހުން މެޗުގެ 84 ވަނަ މިނެޓުގައި ސްވިޑަންގެ ހަތަރު ވަނަ ލަނޑު ޖެހީ މަޓިއަސް ސްވެންބާގް އެވެ. އެއީ ވެސް އިސާކް ތަނަވަސްކޮށްދިން ފުރުސަތެއްގައި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ސްވިޑަންގެ ފަހު ލަނޑު ޖެހީ އަޔާރީ އެވެ. 

މޮޅާ އެކު ސްވިޑަން އިން މުބާރާތް ފެށިއިރު، އެ ޓީމުގެ ދެ ވަނަ މެޗުގައި ނިކުންނާނީ ނެދަލެންޑްސްއާ ދެކޮޅަށެވެ. އަދި ފަހު މެޗުގައި ނިކުންނާނީ ޖަޕާންއާ ދެކޮޅަށެވެ. އެންމެ ފަހުން 2022 ވަނަ އަހަރު ޤަތަރުގައި އޮތް ވޯލްޑް ކަޕަށް ސްވިޑަން ކޮލިފައި ނުވެ އެވެ.