ޖަޕާން އިން ނެދަލެންޑްސް ހުއްޓުވައިފި
ފުރަތަމަ މެޗުގައި ޖަޕާންއާ އެއްވަރުވެފައިވާއިރު، ދެ ވަނަ މެޗުގައި ނެދަލެންޑްސް ނިކުންނާނީ ސްވެޑެންއާ ދެކޮޅަށް. އަދި ޖަޕާން ނިކުންނާނީ ޓިއުނީސިއާއާ ދެކޮޅަށް.
މެޗުގައި ލަނޑު ޖެހުމަށް ފަހު ޖަޕާންގެ ކުޅުންތެރިން އުފާ ފާޅު ކުރަނީ. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެފްގައި ނެދަލެންޑްސްއާ ދެކޮޅަށް ކުޅުނު މެޗު ޖަޕާން އިން އެއްވަރު ކޮށްފި އެވެ.
އާދީއްތަ ދުވަހުގެ ރޭ ދަންވަރު ކުޅުނު މެޗު ނިމުނީ 2-2 އިން އެއްވަރު ވެގެންނެވެ. މެޗުގައި ނެދަލެންޑްސް އިން ދެ ފަހަރެއްގެ މަތިން ލަނޑު ޖަހައި ލީޑު ނެގިއިރު ވެސް، ޖަޕާން އިން ވަނީ ފަހަތުން އަރައި ނަތީޖާ ހަމަހަމަ ކޮށްފައި އެވެ. މެޗުގެ ލަނޑުތައް ފެނުނީ ވެސް ދެ ވަނަ ހާފުގައި އެވެ.
މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި ނެދަލެންޑްސް އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ ކެޕްޓަން ވާޖިލް ވެން ޑައިކް އެވެ. އެއީ ރަޔަން ގްރެވެންބާކް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. ނަމަވެސް، އޭގެ ހަ މިނެޓު ފަހުން ޖަޕާންގެ ކެއިޓޯ ނަަކަމޫރާ ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ.
ދެ ވަނަ ފަހަރަށް ނެދަލެންޑްސް އިން ލީޑު ނެގީ މެޗުގެ 64 ވަނަ މިނެޓުގައި އެވެ. އެއީ ކްރައިސެންސިއޯ ސަމާވިލް ޖެހި ލަނޑުންނެވެ. އެ ލަނޑު ޖަހަން ސަމާވިލް އަށް ވެސް ފުރުސަތު ތަނަވަސްކޮށްދިނީ ގްރެވެންބާކް އެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ޖަޕާންގެ ޑައީޗީ ކަމާޑާ ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ.
ފުރަތަމަ މެޗުގައި ޖަޕާންއާ އެއްވަރުވެފައިވާއިރު، ދެ ވަނަ މެޗުގައި ނެދަލެންޑްސް ނިކުންނާނީ ސްވެޑެންއާ ދެކޮޅަށެވެ. އަދި ޖަޕާން ނިކުންނާނީ ޓިއުނީސިއާއާ ދެކޮޅަށެވެ. ފަހު މެޗުގައި ނެދަލެންޑްސް އިން ޓިއުނީސިއާ ދެކޮޅަށް ކުޅޭއިރު، ޖަޕާން ކުޅޭނީ ސްވެޑެންއާ ދެކޮޅަށެވެ.
