އީރާންގެ އެންމެ ފަހުގެ ރަސްކަލުން ރަމްޒު ކޮށްދޭ ދިދަ ވޯލްޑް ކަޕްގައި ބޭނުން ނުކުރެވޭނެ ކަމަށް ކޯޓުން ވެސް ނިންމައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ހިންގާ ހަނގުރާމައިގެ ސިޔާސީ ހަމަނުޖެހުންތައް ފީފާ ވޯލްޑް ކަޕަށް އަސަރު ކުރަމުން އަންނައިރު، އީރާނުގެ ކުރީގެ ރަސްކަލުންގެ ސަރުކާރާ ގުޅުންހުރި ދިދައެއް މަނާ ކުރުމަށް ފީފާ އިން ނިންމި ނިންމުމަށް ލޮސް އެންޖަލިސްގެ ކޯޓަކުން ތާއީދު ކޮށްފި އެވެ.

މި ދިދަ އަކީ އީރާންގެ ރަސްމީ ތިން ކުލައިގެ ދިދައާ އެއްގޮތަށް ހަދާފައިވާ ދިދަ އަކަށް ވީ ނަމަވެސް، މިއީ 1979 ވަނަ އަހަރުގެ އިސްލާމީ އިންގިލާބުގައި ވައްޓާލި ކުރީގެ ރަސްކަލުންގެ ސަރުކާރާ ގުޅުންހުރި އިރުގެ ނިޝާން ހިމެނޭ ދިދަ އެކެވެ.

މި ދިދަ ބޭނުން ކުރަނީ ރަސްކަލުންގެ ގޮތުގައި ހުންނެވި މުހައްމަދު ރިޒާ ޕަހްލަވީގެ ދަރިކަލުން ރިޒާ ޕަހްލަވީ އަށް ތާއީދު ކުރާ މީހުންނެވެ. އޭނާ އަކީ މިހާރު ވެސް އީރާންގެ ވެރިކަން ހޯދުމަށް މަސައްކަތް ކުރަމުން އަންނަ މީހެއް ކަމަށް ވަނީ ފާހަގަ ކުރެވިފައި އެވެ. 

މި ދިދަ ބޭނުން ކުރުން މަނާ ކުރުމަށް ފީފާ އިން ނިންމުމުން، އިންސްޓިޓިއުޓް ފޯ ވޮއިސް ފޯ ލިބާޓީ އާއި ޕަހްލަވީގެ ބައެއް ސަޕޯޓަރުން ވަނީ ލޮސް އެންޖަލިސް ކައުންޓީގެ ސުޕީރިއާ ކޯޓަށް މިދިޔަ ބުރާސްފަތި ދުވަހު މައްސަލަ ހުށަހަޅައިފަ އެވެ. މި މައްސަލަ ނިންމާފައި ވަނީ އަންގާރަ ދުވަހުގެ ހެނދުނު އީރާން އާއި ނިއުޒިލެންޑް ބައްދަލު ކުރި މެޗުގެ ކުރިންނެވެ. 

މައްސަލަ ބެއްލެވި ގާޒީ ކާޓިސް އޭ ކިން ވިދާޅުވީ، އެ ދިދަ މަނާ ކުރުމަށް ފީފާ އިން ނިންމާފައިވާ ނިންމުމަށް ތާއީދު ކުރާ ކަމަށާއި، އެ ނިންމުން ދެމެހެއްޓޭނެ ކަމަށެވެ. ގާޒީ ވިދާޅުވީ މިނިވަން ވާހަކަ ދެއްކުމަކީ ވަރަށް މުހިންމު ކަމެއް ކަމަށާއި، އެއީ މުޖުތަމައުގެ އަސާސީ ބިންގަލެއް ކަމަށެވެ. ނަމަވެސް، އަކަމަށް ބައެއް ހައްދު ތަކެއް ހުންނާނެ ކަމަށް ގާޒީ ފާހަގަ ކުރެއްވި އެވެ. 

މި މައްސަލަ ފެންމަތި ވެފައި ވަނީ އެމެރިކާ އާއި އީރާންއާ ދެމެދު އޮތް ސިޔާސީ ހަމަނުޖެހުން ކުޅިވަރާ ގުޅިފައިވާ ދަނޑިވަޅެއްގައި އެވެ. ފީފާ އިން މި ދިދަ މަނާ ކުރީ ސްޓޭޑިއަމް ތަކުގައި ސިޔާސީ މެސެޖުތައް ދެއްކުން މަނާ ކުރާ ގަވާއިދު ތަކުގެ ދަށުންނެވެ.