އަލަށް ވާދަ ކުރާ ކޭޕް ވާޑް އަތުން ސްޕެއިން އަށް މޮޅު ނުވެވުނު

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އެޗްގައި ކޭޕް ވާޑްއާ ދެކޮޅަށް ކުޅުނު މެޗުން ސްޕެއިން އެއްވަރު ވެއްޖެ އެވެ.

އެމެރިކާގެ އެޓްލަންޓާ ސްޓޭޑިއަމްގައި ހޯމަ ދުވަހުގެ ރޭ ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.

މެޗު ފަށައިގެން ސްޕެއިން އިން ވަނީ ރަނގަޅަށް ކުޅެ، ލަނޑު ޖަހަން މަސައްކަތް ކޮށްފައި އެވެ. އެގޮތުން ސްޕެއިންގެ ފެރާމް ޓޮރޭސް އާއި، ޕެޑްރީ އަށް ލިބުނު ފުރުސަތު ތަކުގައި ލަނޑު ޖަހަން މަސައްކަތް ކުރި ނަމަވެސް، އެކަން ކާމިޔާބު ވެފައި ނުވެ އެވެ.

އޭގެ ފަހުން ސްޕެއިން އިން ވަނީ ޒުވާން ކުޅުންތެރިޔާ ޔަމީން ޔަމާލް ވެސް ކުޅެން އަރުވައިފަ އެވެ. އަނިޔާގެ ސަބަބުން މެޗުގެ ފުރަތަމަ 11 އިން ފުރުސަތު ނުދިން ނަމަވެސް، ޔަމާލް އަށް ވަނީ ބަދަލަކަށް އަރައި ކުޅެން ފުރުސަތު ދީފައި އެވެ. ސްޕެއިން އިން މެޗުގައި ލަނޑު ޖަހަން ގިނަ ހަމަލާ ތަކެއް ފޮނުވާލިއިރު، ކޭޕް ވާޑްގެ ގޯލު ކީޕަރު ވަނީ އެ ހަމަލާތައް ހުއްޓުވައިފި އެވެ.

ސްޕެއިން އަކީ މިފަހަރުގެ ވޯލްޑް ކަޕް ކާމިޔާބު ކުރާނެ ކަމަށް ބެލެވޭ ޓީމު ތަކުގެ ތެރޭގައި ވެސް ހިމެނޭ ޓީމެކެވެ. 2024 ވަނަ އަހަރުގެ ޔޫރޯ ފުޓުބޯޅަ މުބާރާތް ވެސް ކާމިޔާބު ކޮށްފައިވާ ސްޕެއިންގައި ހުނަރުވެރި ގިނަ ކުޅުންތެރިން ތަކެއް އެބަ ތިއްބެވެ. މުބާރާތުގެ ގުރޫޕު ސްޓޭޖުގައި ސްޕެއިންގެ ދެ ވަނަ މެޗުގައި ނިކުންނާނީ ސައުދީ އަރަބިއްޔާއާ ދެކޮޅަށެވެ. އަދި ފަހު މެޗުގައި ނިކުންނާނީ އުރުގުއޭއާ ދެކޮޅަށެވެ.