ފަހު ވަގުތު އައިވަރީ ކޯސްޓް އިން އެކުއެޑޯ ބަލިކޮށްފި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕް އީގައި އެކުއެޑޯއާ ދެކޮޅަށް ކުޅުނު މެޗުން، ފަހު ވަގުތު އައިވަރީ ކޯސްޓު މޮޅުވެއްޖެ އެވެ.

ހޯމަ ދުވަހުގެ ފަތިހު ކުޅުނު މެޗު އައިވަރީ ކޯސްޓް އިން ކާމިޔާބު ކުރީ 1-0 އިންނެވެ. މެޗުގައި އެ ޓީމުން ލަނޑު ޖެހީ ވެސް މެޗުގެ އެންމެ ފަހު ވަގުތުގެ ތެރޭގައި އެވެ.

މެޗު ފަށައިގެން އެކުއެޑޯ އިން ވަނީ ރަނގަޅަށް ކުޅެން މަސައްކަތް ކޮށްފަ އެވެ. އެގޮތުން އެ ޓީމުން ވަނީ ލަނޑު ޖަހަން ވެސް ފުރުސަތު ތަކެއް ހޯދައިފަ އެވެ. ނަމަވެސް އެ ޓީމަށް ލިބުނު ފުރުސަތު ތަކުގެ ބޭނުން ކުރެވޭ ގޮތެއް ނުވި އެވެ. އައިވަރީ ކޯސްޓް އިން ވެސް ވަނީ އެ ޓީމަށް ލިބެމުން ދިޔަ ފުރުސަތު ތަކުގެ ބޭނުން ހިފަން މަސައްކަތް ކޮށްފަ އެވެ.

މެޗު އެއްވަރުވާން ދަނިކޮށް، މެޗުގެ 90 ވަނަ މިނެޓުގައި އައިވަރީ ކޯސްޓް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަމަދު ޑިއާލޯ އެވެ. އެ ލަނޑު ޖަހަން އަމަދު އަށް ފުރުސަތު ތަނަވަސްކޮށްދިނީ ވިލްފްރިޑް ސިންގޯ އެވެ.

މިއީ ދެ ފަހަރުގެ ވޯލްޑް ކަޕަށް ފަހު، އައިވަރީ ކޯސްޓް އިން ވޯލްޑް ކަޕްގައި ކުޅޭ ފުރަތަމަ ފަހަރެވެ. އެންމެ ފަހުން 2014 ވަނަ އަހަރުގެ ވޯލްޑް ކަޕްގައި އައިވަރީ ކޯސްޓް އިން ކުޅުނުއިރު، 2018 ވަނަ އަހަރާއި 2022 ވަނަ އަހަރުގެ ވޯލްޑް ކަޕަށް ކޮލިފައިވެފައި ނުވެ އެވެ. މިހާތަނަށް އައިވަރީ ކޯސްޓް އަށް ވޯލްޑް ކަޕްގެ ގުރޫޕް ސްޓޭޖު ފަހަނަ އަޅާ ދެވޭ ގޮތެއް ނުވެ އެވެ.