އެތައް ގޮންޖެހުންތަކާ އެކު ވޯލްޑް ކަޕަށް ނިކުތް އީރާން އިން، ނިއުޒިލެންޑްއާ އެއްވަރު ކޮށްފި

ފީފާ ވޯލްޑް ކަޕްގެ ގުރޫޕު ޖީގައި ނިއުޒިލެންޑްއާ ދެކޮޅަށް ކުޅުނު މެޗު، އީރާން އިން އެއްވަރު ކޮށްފި އެވެ.

އެމެރިކާގެ ލޮސް އެންޖަލިސް ސްޓޭޑިއަމްގައި އަންގާރަ ދުވަހުގެ ހެނދުނު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ނިއުޒިލެންޑް އިން ދެ ފަހަރެއްގެ މަތިން ލީޑު ނެގިއިރު ވެސް، އީރާން އިން ވަނީ ނަތީޖާ ހަމަހަމަ ކޮށްފައި އެވެ. 

މެޗު ފަށައިގެން ކުރީ ކޮޅު ނިއުޒިލެންޑް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެލިޖާ ޖަސްޓް އެވެ.  އޭގެ ފަހުން އީރާން އިން ވަނީ ލަނޑު ޖަހައި ނަތީޖާ ހަމަހަމަ ކުރުމަށް މަސައްކަތް ކޮށްފައި އެވެ. ލަނޑު ޖަހަން ލިބުނު ދެ ފުރުސަތެއްގައި އީރާން އިން ފޮނުވާލި ހަމަލާ ގޯލާ އަމާޒުވާ ގޮތެއް ނުވި އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި އީރާން އިން ވަނީ ލަނޑު ޖަހައި ނަތީޖާ ހަމަހަމަ ކޮށްފައި އެވެ. ނިއުޒިލެންޑްގެ އޭރިޔާ ތެރެއިން ލިބުނު ބޯޅަ ގޯލަށް ފޮނުވާލައިގެން އީރާން އަށް ނަތީޖާ ހަމަހަމަ ކޮށްދިނީ ރާމިން ރެޒައީން އެވެ. އެއާއެކު މެޗުގެ ފުރަތަމަ ހާފު ނިމުނީ ދެ ޓީމު އެއްވަރު ވެގެންނެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ދެ ވަނަ ފަހަރަށް ނިއުޒިލެންޑް އަށް ލީޑު ނަގައިދިނީ ޖަސްޓް އެވެ. ނަމަވެސް، އެ ޓީމަށް ލީޑުގައި އޮވުނީ ދިހަ މިނެޓު އެވެ. މެޗުގެ 64 ވަނަ މިނެޓުގައި މުހައްމަދު މުޒެއްބީ ވަނީ ލަނޑު ޖަހައި ދެ ވަނަ ފަހަރަށް އީރާން އަށް ނަތީޖާ ހަމަހަމަ ކޮށްދީފައި އެވެ.

މެޗު އެއްވަރުވީއިރު، އީރާން އަކީ މިފަހަރުގެ ވޯލްޑް ކަޕްގައި އެންމެ ގިނަ ގޮން ޖެހުންތަކާ ކުރިމަތިލާން ޖެހުނު ޓީމެވެ. ޚާއްސަކޮށް އެމެރިކާ އާއެކު އޮތް ނުތަނަވަސްކަމުގެ ސަބަބުން، އީރާންގެ ޓީމަށް ވަނީ ވިސާގެ މައްސަލަތަކާ ކުރިމަތިލާން ޖެހިފައި އެވެ. މުބާރާތުގައި އީރާންގެ ދެ ވަނަ މެޗުގައި ނިކުންނާނީ ބެލްޖިއަމްއާ ދެކޮޅަށެވެ. އަދި ފަހު މެޗުގައި ނިކުންނާނީ މިޞްރާ ދެކޮޅަށެވެ.