އިޒްރޭލް އާއި ފަލަސްޠީންއާ ދެމެދު މެޗެއް ކުޅުމަށް ފީފާގެ ރައީސް އިންފަންޓީނޯ ހުށަހަޅުއްވައިފި

ފީފާ އިން މި އަހަރުގެ ފަހުކޮޅު އެމެރިކާގައި ބާއްވާ ފަނަރަ އަހަރުން ދަށުގެ ފުޓުބޯޅަ ފެސްޓިވަލް ފެށުމުގެ ގޮތުން އިޒްރޭލް އާއި ފަލަސްޠީންއާ ދެމެދު މެޗެއް ކުޅުމަށް ފީފާގެ ރައީސް ޖިއާނީ އިންފަންޓީނޯ ހުށަަހަޅުއްވައިފި އެވެ. 

ނިއު ޔޯކް ޓައިމްސްގެ ދަށުން ހިނގާ ކުޅިވަރު ނޫސް ތަކުގެ ވެބްސައިޓް ދަ އެތުލެޓިކް އިން ބުނި ގޮތުގައި ފީފާ އިން ހުށަހަޅަމުން އަންނަނީ އައު ޔޫތު މުބާރާތުގެ ފުރަތަމަ މެޗު އިޒްރޭލް އާއި ފަލަސްޠީނުގެ ފަނަރަ އަހަރުން ދަށުގެ ޓީމު ތަކުން ކުޅެން ފެށުމަށް ކަމަށެވެ. ނަމަވެސް، މި ވިސްނުން މަޑު މަޑުން ކުރިއަށް ދާއިރު އެއްވެސް ފަރާތަކުން މި މެޗަށް އެއްބަސް ވާނެކަން ކަށަވަރު ވެފައި ނުވެ އެވެ. 

ފީފާގެ ރައީސް އިންފަންޓީނޯގެ މި ހުށަހެޅުމަކީ ވަރަށް ބޮޑު އަސަރެއް ކުރާނެ އަދި ދެބަސްވުން ތަކަށް މަގު ފަހިވާނެ ފިޔަވަޅެކެވެ. މިދިޔަ އޭޕްރީލް މަހު ވެންކޫވާގައި ބޭއްވި ފީފާގެ އަހަރީ ކޮންގްރެސްގައި ފަލަސްޠީން ފުޓުބޯޅަ އެސޯސިއޭޝަންގެ ރައީސް ޖިބްރީލް ރަޖޫބް އާއި އިޒްރޭލް ފުޓުބޯޅަ އެސޯސިއޭޝަންގެ ނައިބު ރައީސް ބަސީމް ޝައިހް ސުލައިމާންއާ ސަލާމް ކުރުވުމަށް ފީފާާގެ ރައީސް އިންފަންޓީނޯ މަސައްކަތް ކުރެއްވި ނަމަވެސް، އެކަން ކާމިޔާބުވެފައި ނުވެ އެވެ.

އިންފަންޓީނޯ ވިދާޅުވެފައި ވަނީ ފަނަރަ އަހަރުން ދަށުގެ ޔޫތު މުބާރާތެއް އޮންނާނެ ކަމަށާއި، އެ މުބާރާތުގައި 211 ޤައުމުން ބައިވެރިވުމަށް ދައުވަތު ދޭނެ ކަމަށެވެ. އަދި އެކުގައި މަސައްކަތް ކުރުމަށް ގޮވާލައްވައި، އެކަމަަށް ފީފާގެ އެހީތެރިކަން ލިބޭނެ ކަމަށް ވެސް އިންފަންޓީނޯ ވަނީ ވިދާޅުވެފައި އެވެ. 

ދަ އެތުލެޓިކް އިން ބުނި ގޮތުގައި ފީފާގެ ހުށަހެޅުމަކީ ސުލްހަ ގާއިމު ކުރުމަށް ކުރާ އިތުރު މަސައްކަތެއްގެ ގޮތުން، އިޒްރޭލް އާއި ފަލަސްޠީނުގެ ފަނަރަ އަހަރުން ދަށުގެ ޓީމު ބައްދަލު ކުރަން ބޭނުންވާ ކަމަށެވެ. ނަމަވެސް، ފަލަސްޠީނުގެ ފުޓުބޯޅަ ކުޅުންތެރިންނާއި، ކުޅިވަރު ތަންތަނަށް އިޒްރޭލް އިން ދިން ގެއްލުންތަކާ ގުޅިގެން ފީފާ އިން އިޒްރޭލް އަށް ފިޔަވަޅު ނާޅާ ކަމަށް ބުނެ، ފަލަސްޠީނުގެ އެތައް ބަޔަކު އަންނަނީ ފީފާ އަށް ފާޑު ކިޔަމުންނެވެ. 

މިއަހަރުގެ ސެޕްޓެމްބަރު މަހު އެމެރިކާގައި އޮންނަ މި މުބާރާތުގައި ފީފާގެ މެމްބަރު ހުރިހާ ޤައުމު ތަކަކުން ބައިވެރިވުމަށް ބާރު އަޅަމުން އަންނައިރު، މި މުބާރާތުގައި ރަޝިޔާ އިން ވެސް ބައިވެރި ވާނެ ކަމަށް ވަނީ ބުނެފައި އެވެ. ރަޝިޔާ އިން ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމައިގެ ސަބަބުން، ފީފާ އިން ވަނީ 2022 ވަނަ އަހަރު ރަޝިޔާ ފުޓުބޯޅަ އިން ސަސްޕެންޑު ކޮށްފައި އެވެ. 

މިކަމުގެ ސަބަބުން، އިޒްރޭލްގެ މައްސަލައިގައި ރަޝިޔާ އިން އަމަލު ކުރަމުން އަންނަ ގޮތުން އެތައް ބަޔަކު އަންނަނީ ފީފާ އާއި އިންފަންޓީނޯ އަށް ވެސް ފާޑު ކިޔުން އަމާޒު ކުރަމުންނެވެ. އެގޮތުން ޔޫކްރެއިންއާ ދެކޮޅަށް ކުރާ ހަނގުރާމައިގެ ސަބަބުން ރަޝިޔާ އަށް ފިޔަވަޅު އަޅާފައިވާއިރު، ޣައްޒާގައި ނަސްލު ނައްތާލުމަށް އިޒްރޭލް އިން ހިންގާ ޖަރީމާތަކާ އެކު ވެސް ފީފާ އިން އެ ޤައުމާ ދެކޮޅަށް އެއްވެސް ފިޔަވަޅެއް އަޅާފައި ނުވާތީ އެތައް ބައެއްގެ ނުރުހުން ފީފާ އަށް އަމާޒުވެފައިވެ އެވެ.