ވޯލްޑް ކަޕްގެ ކާމިޔާބީ ހޯދުމަށް ބްރެޒިލުން 'ސްމާޓް ވެސްޓް' ބޭނުންކުރަނީ

ދުނިޔޭގެ އެހެން އެއްވެސް ގައުމަކަށްވުރެ ގިނައިން ފީފާ ވޯލްޑް ކަޕް ކާމިޔާބުކޮށްފައިވަނީ ބްރެޒިލުންނެވެ.

ފާއިތުވި އަހަރުތަކުގައި ހޯދާފައިވާ ފަސް ތަށީގެ ކާމިޔާބީއާއި، ފުޓްބޯޅައިގެ ލެޖެންޑުންގެ އެތައް ޖީލެއްގެ ސަބަބުން، ކޮންމެ ހަތަރު އަހަރަކުން އެއްފަހަރު ބާއްވާ ފީފާ ވޯލްޑް ކަޕްގައި ބްރެޒިލް ވެފައިވަނީ ބަލިކުރަން އެންމެ އުނދަގޫ އެއް ޓީމަށެވެ.

ނަމަވެސް، އެންމެ ފަހުން ބޭއްވި ފަސް މުބާރާތުގައި ކުރިމަތިވި ނާކާމިޔާބީއަށްފަހު، 2026 ވަނަ އަހަރުގެ މުބާރާތުގައި ކުރިހޯދުމަށްޓަކައި ބްރެޒިލްގެ ޓީމުން މިހާރު ވަނީ އިތުރު ޓެކްނިކަލް އެހީތެރިކަން ހޯދަން ފަށާފައެވެ.

މި މަސައްކަތުގެ ފަހަތުގައި، ކުޅިވަރުގެ ސައިންސްވެރިން ދަނީ ކުޅުންތެރިންގެ ހަށިގަނޑުގައި ހަރުކުރެވޭ ޓެކްނޮލޮޖީ ބޭނުންކޮށްގެން، ކުޅުންތެރިން ދުވާ ބާރުމިނާއި، ހިތުގެ ވިންދާއި، ވަރުބަލިވާ މިންވަރުގެ އިތުރުން އަނިޔާއިން ރަނގަޅުވަމުންދާ މިންވަރު ދެނެގަންނަމުންނެވެ.

މީގެ ބޭނުމަކީ ވަރަށް ސާދާ ކަމެކެވެ. އެއީ ބްރެޒިލްގެ ހެޑް ކޯޗު ކާލޯ އަންޗެލޮޓީއާއި އޭނާގެ ޓީމުން ވޯލްޑް ކަޕްގެ މުހިންމު ނިންމުންތައް ނިންމުމުގެ ކުރިން، ވީހާވެސް ގިނަ މައުލޫމާތު ފޯރުކޮށްދިނުމެވެ. 2026 ވަނަ އަހަރުގެ ވޯލްޑް ކަޕްގައި ބްރެޒިލް ކުޅުނު ފުރަތަމަ މެޗުގައި ޖޫން މަހުގެ 23 ވާ ހޮނިހިރު ދުވަހު މޮރޮކޯއާ ދެކޮޅަށް ނުކުތް އިރު، މި މައުލޫމާތުތަކުގެ އެހީގައި ޓީމު ތައްޔާރުވަމުންދާ ގޮތަށް ބަލާލަމާ ހިނގާށެވެ.

ޓްރެކިންގ ވެސްޓް

ބްރެޒިލްގެ ގިނަ ޕްރޮފެޝަނަލް ކުޅުންތެރިން، މެޗު ކުޅޭއިރު ބޭނުންކުރާ ޖާޒީގެ އެތެރެއިން، ސެންސަރުތައް ހަރުކޮށްފައިވާ "ސްމާޓް ވެސްޓް" އެއް ބޭނުންކުރެއެވެ. ސީޒަނުގެ ތެރޭގައި ކްލަބްތަކުގައި ފަރިތަކުރުންތަކާއި މެޗުތަކުގައި މި ވެސްޓް ބޭނުންކުރުމުން، ކުޅުންތެރިން ހަރަކާތްތެރިވާ ގޮތާއި، ކުރާ މަސައްކަތުގެ ބުރަދަނާއި، ވަރުބަލިކަން ފިލާ މިންވަރުގެ ތަފްސީލީ މައުލޫމާތު ލިބެއެވެ.

މިފަދަ ޓްރެކިންގ ޓެކްނޮލޮޖީ ފާއިތުވި ދިހަ އަހަރު ތެރޭގައި ވަރަށް ބޮޑަށް ކުރިއަރާފައިވާއިރު، ވޯލްޑް ކަޕްގައި ވާދަކުރާ ގިނަ ޓީމުތަކުން މިހާރު މިފަދަ އިލެކްޓްރޯނިކް ޕާފޯމަންސް އެންޑް ޓްރެކިންގ ސިސްޓަމްތައް ބޭނުންކުރެއެވެ. ނަމަވެސް، ބްރެޒިލުން ވަނީ އެ ގައުމުގެ ފިރިހެން، އަންހެން އަދި ޒުވާން ހުރިހާ ލީގުތަކެއްގައި މި ނިޒާމު ފުޅާދާއިރާއެއްގައި ގާއިމުކޮށްފައެވެ.

ވަކިވަކި ކްލަބްތަކުން އެއްކުރާ މި މައުލޫމާތުތައް ގައުމީ ޓީމުގެ ސްޕޯޓްސް ސައިންސް ޑިޕާޓްމަންޓާ ހިއްސާކުރެއެވެ. މީގެ ސަބަބުން، ގައުމީ ޓީމުގެ ޒިންމާއާ ހަވާލުވުމުގެ ކުރިން، މުޅި ސީޒަނުގައި ކުޅުންތެރިންގެ ހާލަތު ބަލަމުން ގެންދިއުމުގެ ފުރުސަތު ކޯޗުންނަށް ލިބެއެވެ.

"ކުޅުންތެރިން އަހަރެމެންނާ އެކު ނޫޅޭ ވަގުތުތަކުގައިވެސް، ކޮންމެ ދުވަހަކު ކްލަބްތަކާ މުއާމަލާތްކޮށް، ޓްރެކިންގ ސިސްޓަމުން ލިބޭ މައުލޫމާތު ހޯދަން،" ބްރެޒިލް ގައުމީ ޓީމުގެ ހެޑް އޮފް ސްޕޯޓްސް ސައިންސް ގިލްހާމް ޕާސޯސް ބުންޏެވެ. "އޭރުން އަހަރެމެންގެ ޑޭޓާބޭސްއަށް އެ މައުލޫމާތު އިތުރުކޮށް، ކުޅުންތެރިން އަހަރެމެންގެ ކައިރީގައި ނެތް ނަމަވެސް އެމީހުންގެ ހާލަތު ދެނެގަތުން ފަސޭހަވޭ."

ގައުމީ ޓީމަކަށް ބަލާއިރު، މިއީ ކުރިމަތިވާ ތަފާތު ގޮންޖެހުމަކަށް ލިބޭ ހައްލެކެވެ. ކްލަބް ކޯޗުންނާ ޚިލާފަށް، ގައުމީ ޓީމުގެ މުވައްޒަފުންނަށް ކުޅުންތެރިންނާއެކު ހޭދަކުރަން ލިބެނީ ވަރަށް ކުޑަ ވަގުތުކޮޅެކެވެ. ޓީމުގެ ގިނަ ކުޅުންތެރިން ކުޅެނީ ތަފާތު ލީގުތަކުގައާއި ތަފާތު ބައްރުތަކުގައެވެ. މީގެ ސަބަބުން، ވޯލްޑް ކަޕް ކާމިޔާބުކުރެވޭނެ ފަދަ ވަރުގަދަ ޓީމެއް އެކުލަވާލުމަށްޓަކައި ކުޅުންތެރިންގެ ހުނަރާއި ފެންވަރު އަޅާކިޔުމަކީ އުނދަގޫ ކަމެކެވެ.

ނަމަވެސް، މި ޓްރެކިންގ ޓެކްނޮލޮޖީގެ ސަބަބުން، ކުޅުންތެރިން އެތައް ހާސް މޭލެއް ދުރުގައި ތިބި ނަމަވެސް އެމީހުންގެ ހާލަތު ބެލުމުގެ ގާބިލުކަން ބްރެޒިލްގެ އޮފިޝަލުންނަށް ލިބެއެވެ. "ކުޅުންތެރިންގެ ހާލަތު ބަދަލުވަމުންދާ ގޮތް އަހަރެމެންނަށް ސީދާ އެނގޭ،" ޕާސޯސް ބުންޏެވެ. ބޮޑެތި މުބާރާތްތަކުގެ ކުރިން މިފަދަ މައުލޫމާތު ލިބުމަކީ ބޮޑު ކުރިއެރުމެކެވެ.

ކުޅުންތެރިން ހޮވުން

ކުޅުންތެރިން ހޮވުމާއި، އެމީހުން ކުޅޭނެ މަގާމުތަކާއި ޓެކްޓިކަލް ރޯލުތައް ކަނޑައެޅުމުގައި، އަހަރު ދުވަހުގެ ތެރޭގައި އެއްކުރެވޭ މި މައުލޫމާތުތަކުގެ އެހީތެރިކަން ހޯދައެވެ. ބައެއް ކުޅުންތެރިން ޓީމާ ގުޅެނީ އަނިޔާގައި ތިބެގެން ނުވަތަ ރިހެބިލިޓޭޝަން ފުރިހަމަކުރުމަށްފަހުގައެވެ. އަނެއްބައި ކުޅުންތެރިންނަކީ ކްލަބް ލެވެލްގައި އާދަޔާ ޚިލާފަށް ގިނަ މެޗުތަކެއް ކުޅެފައިވާ ކުޅުންތެރިންނެވެ.

މި ސިސްޓަމްތަކުގެ އެންމެ މުހިންމު އެއް ބޭނުމަކީ، ފުޓްބޯޅައިގައި އާންމުކޮށް ދިމާވާ ހޭމްސްޓްރިންގް އަނިޔާތަކުން ސަލާމަތްވުމަށް ކުރާ މަސައްކަތް ބެލެހެއްޓުމެވެ.

ކުޅުންތެރިން ދުވާ މިންވަރާއި އެހެނިހެން މިންގަނޑުތަކަށް ބަލައިގެން، ކުޅުންތެރިއަކަށް ރައްކާތެރިކަމާއެކު އަނިޔާއިން ސަލާމަތްވެވިދާނެތޯ ސައިންސްވެރިންނަށް ވަޒަންކުރެވޭނެ ކަމަށް ޕާސޯސް ބުންޏެވެ. "ކުޅުންތެރިއަކީ ވަރަށް ބާރަށް ދުވާ ކުޅުންތެރިއެއްނަމަ، އޭނާގެ މަސްތަކަށް އަނިޔާއެއް ނުވާކަން ޔަގީންކުރުމަށްޓަކައި މި މައުލޫމާތުތަކަށް ވަރަށް ބޮޑަށް ސަމާލުކަން ދޭންޖެހޭ."

މި މައުލޫމާތުގެ ސަބަބުން ޓެކްޓިކަލް ނިންމުންތަކަށްވެސް ބަދަލު އާދެއެވެ. ވަރަށް ބާރަށް ދުވާ ކުޅުންތެރިއަކީ ވިންގަރެއްގެ ގޮތުގައި ބޭނުންކުރެވިދާނެ ކުޅުންތެރިއަކަށް ވާއިރު، ވަރުބަލިކަން ފިލާ މިންވަރަށް ބަލައި، ކުޅުންތެރިޔާ މެޗު ފަށާނީތޯ ނުވަތަ ބަދަލު ކުޅުންތެރިއެއްގެ ގޮތުގައި ފަހުން ކުޅެން އަރުވާނީތޯ ނިންމުމަށް އެހީތެރިވެދެއެވެ.

"ވަރަށް ބާރަށް ދުވާ ކުޅުންތެރިއަކު ހުރިނަމަ، ކައުންޓަރ އެޓޭކް ކުރާ ގޮތަށް ކުޅުމަށް ކޯޗު ނިންމަފާނެ،" ޕާސޯސް ބުންޏެވެ.

މިއީ ހަމައެކަނި ތައްޔާރުވުމުގެ މަރުހަލާއެއް ނޫނެވެ. ވޯލްޑް ކަޕްގެ މެޗުތައް ކުޅޭއިރުވެސް މި ޓްރެކިންގ ވެސްޓްތައް ބޭނުންކުރާނެއެވެ. މީގެ ސަބަބުން، މަދު ދުވަސްކޮޅެއްގެ ތެރޭގައި ގިނަ މެޗުތަކެއް ކުޅެންޖެހޭއިރު، ކުޅުންތެރިންގެ ވަރުބަލިކަމާއި އަލުން ތައްޔާރުވެފައިވާ މިންވަރު ބަލައި، ކުޅެން ތައްޔާރަށް ހުރީ ކާކުކަމާއި އިތުރު އަރާމު ބޭނުންވަނީ ކާކަށްކަން ނިންމުމަށް ކޯޗުންނަށް ފަސޭހަވާނެއެވެ.

ބޮސްޓަންގައި ޓެކްނޮލޮޖީ ޓެސްޓްކުރުން

ބްރެޒިލް ހިމެނޭހެން ވޯލްޑް ކަޕްގެ ގިނަ ޓީމުތަކަކާއެކު މަސައްކަތްކުރާ "ކެޓަޕޮލްޓް" ކުންފުނީގެ ޓްރެކިންގ ވެސްޓެއް ފަރުމާކޮށްފައިވާ ގޮތަށް ބަލާއިރު ލުއިކޮށް ފަރުމާކޮށްފައިވާ މި ވެސްޓްގެ ލޭޔަރުތަކުގެ ތެރޭގައި ހިތުގެ ވިންދު ބަލާ އިލެކްޓްރޯޑްތަކާއި، ޖީބެއްގެ ތެރޭގައި ޖީޕީއެސް ޓްރެކިންގ ޑިވައިސްއެއް ހަރުކޮށްފައިވެއެވެ.

ބީބީސީގެ ކުޅިވަރު ރިޕޯޓަރު ޕޯލްގެ ފެންވަރު ބެލުމަށްޓަކައި، އޭނާ ވަނީ އެމެރިކާގެ އަންހެން ލީގުގެ ޓީމެއް ކަމަށްވާ "ބޮސްޓަން ލެގަސީ" ގެ ފަރިތަކުރުންތަކެއްގައި ބައިވެރިވެފައެވެ. އެކި ކަހަލަ ތަމްރީނުތަކާއި ދުވުމުގެ ކަސްރަތުތަކަށްފަހު، ޕޯލްގެ ނަތީޖާ އެނަލައިޒް ކުރެވުނެވެ. އޭނާގެ ހިތުގެ ވިންދު މިނެޓަކު 177 އަށް އެރިއިރު، ލިބުނު ނަތީޖާތަކުން ހައިރާންކަން ލިބުނެވެ.

އެންމެ ފާހަގަކޮށްލެވުނީ "ޕްލޭޔަރ ލޯޑް" ނުވަތަ ކުޅުންތެރިޔާގެ ހަށިގަނޑަށް އައި ބުރަދަނެވެ. މިއިން އެނގުނު ގޮތުގައި، މޮޅު ފުޓްބޯޅަ ކުޅުންތެރިއަކާ އަޅާބަލާއިރު، ޕޯލް ދުވި ރާސްތާއަށް ބަލައި އޭނާގެ ހަށިގަނޑަށް އައި ބުރަދަން މާ ބޮޑެވެ. މާނައަކީ، ޕޯލް މާ ބޮޑަށް މަސައްކަތް ކުރި ނަމަވެސް، އޭނާގެ ހަރަކާތްތަކުގައި އެދެވޭ ނަތީޖާއެއް ނެތެވެ.

މިއާއެކު، ޕްރޮފެޝަނަލް ފުޓްބޯޅަ ކުޅުންތެރިއަކަށް ވުމުގެ ފުރުސަތު ޕޯލްއަށް ނެތްކަން ޔަގީންވިއެވެ. ބޮސްޓަން ލެގަސީގެ ޑައިރެކްޓަރ އޮފް ހެލްތު އެންޑް ޕާފޯމަންސް، ޑޭން ޖޯންސް ބުނި ގޮތުގައި، މި ޓްރެކިންގްގެ ސަބަބުން ކުޅުންތެރިންގެ އެންމެ މަތީ ފެންވަރަށް މަސައްކަތް ކުރުވުމުގެ އިތުރުން، އަނިޔާއިން އެމީހުން ސަލާމަތްކުރުމަށް އެހީތެރިވެދެއެވެ.

"ފަރިތަކުރުންތަކުގެ ތެރޭގައި، އަހަރެމެން ރޭވި މިންވަރަށް ކުޅުންތެރިންގެ ފިޓްނަސް ނުވަތަ މަސައްކަތް ނުލިބޭކަން ފާހަގަވާ ވަގުތުތައް އާދޭ،" އޭނާ ބުންޏެވެ. އެފަދަ ހާލަތްތަކުގައި، ބޭނުންވާ ނަތީޖާ ހާސިލުކުރުމަށްޓަކައި ތަމްރީނުތައް އިތުރުކުރުމަށް ސައިންސްވެރިން ލަފާދެއެވެ.

މި ފަހުން ކުޅުނު މެޗެއްގައި، ބޮސްޓަން ލެގަސީން ދިޔައީ އަނިޔާއިން ސަލާމަތްވެގެން އައި ކުޅުންތެރިއެއްގެ ހާލަތު ބަލަމުންނެވެ. އޭނާގެ ރިހެބިލިޓޭޝަން ޕްލޭންގެ ދަށުން ދުވަންޖެހޭނެ ރައްކާތެރި މިންވަރު އޮފިޝަލުން އޮތީ ހިސާބުކޮށްފައެވެ. މެޗުގެ ތެރޭގައި އެ މައުލޫމާތުތައް ވަގުތުން ބަލަމުންދިޔައެވެ.

"އޭނާ އެ މިންގަނޑަށް ދިއުމާއެކު، އަހަރެމެން ކޯޗުންނާ ވާހަކަދައްކައި، ވަރަށް އަވަހަށް އޭނާ ބަދަލުކުރަން ޖެހޭނެ ކަމަށް ބުނިން،" ކޯޗު ބުންޏެވެ. "އަދި އަހަރެމެން އޭނާ ބަދަލުކުރިން."

ވޯލްޑް ކަޕް ކޯޗުންގެ ފަހު ނިންމުން

ފުޓްބޯޅައިގައި ޓެކްނޮލޮޖީއަށް ބަރޯސާވާ މިންވަރު އިތުރުވަމުން ދިޔަ ނަމަވެސް، ގިނަ މައުލޫމާތު ލިބުމަކީ އޭގެ ޒާތުގައި ރަނގަޅު ނިންމުންތަކެއް ނިންމޭނެ ކަމެއް ކަމަށް ހީކުރުމަކީ ކުށްހީއެކެވެ. ހަގީގަތް މިއަށްވުރެ މާ އޮޅުންބޮލެވެ.

ބްރެޒިލްގެ ޕާސޯސް ބުނި ގޮތުގައި، އޭނާގެ ހަނދާނުން ފޮހެލަން އުނދަގޫ މިސާލެއް އެބައޮތެވެ.

ޓްރެކިންގ ޑޭޓާ ބޭނުންކޮށްގެން އޭނާ ބެލިބެލުމުން، މެޗެއްގެ ތެރޭގައި އެންމެ 6 ކިލޯމީޓަރު ދުވާ ކުޅުންތެރިއަކު ފާހަގަވިއެވެ. އޭނާގެ ޓީމުގެ އެހެން ކުޅުންތެރިން އޭގެ ދެގުނަ ދުވެއެވެ. ހަމައެކަނި ހިސާބުތަކަށް ބަލާއިރު، އެ ކުޅުންތެރިޔާގެ ފެންވަރު ދަށް ކަމަށް ފެނެއެވެ. ނަމަވެސް، ކޯޗުން މެޗުގެ ވީޑިއޯ ބެލުމުން ފެނުނީ މުޅިން ތަފާތު މަންޒަރެކެވެ.

"އެ ކުޅުންތެރިޔާ އަބަދުވެސް ހުންނަނީ ޓެކްޓިކަލް ގޮތުން އެންމެ ރަނގަޅު މަގާމުގައި،" ޕާސޯސް ބުންޏެވެ. "އޭނާއަކީ ވަރަށް ހުޝިޔާރު ކުޅުންތެރިއެއް." ނަމަވެސް، ވޯލްޑް ކަޕްގެ ކުރިން ޓެކްޓިކަލް މައުލޫމާތު ސިއްރުކުރުމުގެ ގޮތުން އޭނާ އެ ކުޅުންތެރިޔާގެ ނަމެއް ހާމައެއް ނުކުރެއެވެ.

މީގެން ލިބޭ ފިލާވަޅަކީ، ކުޅިވަރުގެ ސައިންސްވެރިން މިހާރު ވަރަށް ބޮޑަށް ބާރުއަޅާ ކަމެކެވެ. އެއީ ފުޓްބޯޅައަކީ ދުވުމުގެ މުބާރާތެއް ނޫން ކަމާއި، ގިނައިން ދުވުމަކީ މޮޅަށް ކުޅުން ނޫން ކަމެވެ. ހަށިގަނޑުގެ ފިޓްނަސް ކިތަންމެ ރަނގަޅު ކުޅުންތެރިއަކީވެސް، ވަކި ޓެކްޓިކަލް ނިޒާމަކަށް ނުގުޅޭ ކުޅުންތެރިއަކަށް ވެދާނެއެވެ. ކުޅުންތެރިއެއްގެ ކުރިމަގު ކަނޑައަޅަނީ އޭނާ ހުންނަ މަގާމާއި، ނިންމުންތައް ނިންމާ ގޮތާއި، އަދި ލީޑަރޝިޕް ސިފަތަކުންނެވެ.

މީގެ އިތުރުން، ކުޅިވަރުގެ ނަފްސާނީ ދާއިރާއަށްވެސް ވިސްނަންޖެހެއެވެ. އާޓިފިޝަލް އިންޓެލިޖެންސް (އޭއައި) އާއި ޕާފޯމަންސް އެނަލިޓިކްސް ކުރިއަރަމުންދާ ވަރަކަށް، ކޯޗުންނަށް ލިބޭ މައުލޫމާތު އިތުރުވާނެއެވެ.

މި ފަހަރުގެ ވޯލްޑް ކަޕްގައި، ފީފާއާއި ލެނޯވޯ ގުޅިގެން އުފައްދާފައިވާ އޭއައި އެސިސްޓެންޓެއް ކަމަށްވާ "ފުޓްބޯލް އޭއައި ޕްރޯ" ބޭނުންކޮށްގެން ކޯޗުންނާއި ކުޅުންތެރިންނަށް ވަގުތުން މައުލޫމާތު ފޯރުކޮށްދޭނެއެވެ. މިއީ އެތައް މިލިއަން މައުލޫމާތެއް ދިރާސާކުރުމަށް މެޝިން ލާރނިންގ ބޭނުންކުރާ ނިޒާމެކެވެ.

ނަމަވެސް، ފުޓްބޯޅައަށް އަންނަ މި ޓެކްނޮލޮޖީގެ އިންގިލާބާއެކުވެސް، ބްރެޒިލްގެ ފުޓްބޯޅައިގެ އިސްވެރިން ގަބޫލުކުރާ ގޮތުގައި އެންމެ މުހިންމު ކަމަކީ އިންސާނުންގެ ނިންމުންތަކެވެ. "އެންމެ ބޮޑު ތަފާތަކީ ޓެކްނޮލޮޖީގެ ފަހަތުގައި ތިބެގެން މައުލޫމާތުތައް ދިރާސާކޮށް، އަމަލީ ނިންމުންތަކަށް އެ މައުލޫމާތު ބަދަލުކުރާ ތަޖުރިބާކާރުން،" ޕާސޯސް ބުންޏެވެ.

ދުނިޔޭގެ އެންމެ ކާމިޔާބު ފުޓްބޯޅަ ގައުމަށް، މި ޓެކްނޮލޮޖީގެ ސަބަބުން އެންމެ މޮޅު ޓީމު ދަނޑަށް ނެރުމަށް އެހީތެރިވެދީފާނެއެވެ. ނަމަވެސް، ކާމިޔާބީ ލިބުން ބިނާވެފައި އޮންނާނީ ދަނޑުމަތީގައި ކުޅުންތެރިން ދައްކާ ކުޅުމުގެ މައްޗަށެވެ.