ވޯލްޑް ކަޕް މެޗުތައް ގަޑިއަށް ނުފެށެނީ ކީއްވެ؟

ވޯލްޑް ކަޕް މުބާރާތެއްގައި އެ ގައުމުގެ ޓީމު ކުޅޭތަން ބަލާލުމަށް 28 އަހަރު ވަންދެން އިންތިޒާރު ކުރި ސްކޮޓްލޭންޑްގެ ސަޕޯޓަރުން، ހައިޓީއާ ދެކޮޅަށް ކުޅުނު މެޗު ފެށުން ދެ މިނެޓާއި ބައި ލަސްވުމުން އެކަމާ މާ ބޮޑު ޝަކުވާއެއް ނުކުރާނެ ކަމަށް ބެލެވެއެވެ.

އިޓަލީގައި 1990 ވަނަ އަހަރު ބޭއްވި ވޯލްޑް ކަޕަށް ފަހު، އެ މުބާރާތުގައި ސްކޮޓްލޭންޑުން ހޯދި ފުރަތަމަ މޮޅު 1-0 ގެ ނަތީޖާއަކުން ފާހަގަކުރުމަށް ފަހު، "ޓާޓަން އާމީ" ގެ ނަމުން މަޝްހޫރު އެ ގައުމުގެ ސަޕޯޓަރުން ގަބޫލުކުރާނީ ކެތްތެރިކަމާއެކު އިންތިޒާރު ކުރުމުގެ ފޮނި މޭވާ އެންމެ ފަހުން ލިބިއްޖެ ކަމަށެވެ.

ނަމަވެސް، އެމެރިކާގެ މެސެޗުސެޓްސްގައި ކުޅުނު ގްރޫޕް ސީގެ މި މެޗު ފެށުން ލަސްވުމަކީ، 2026 ވަނަ އަހަރުގެ ވޯލްޑް ކަޕްގައި މިހާތަނަށް ފާހަގަކުރެވިފައިވާ މެޗުތައް ގަޑިއަށް ނުފެށުމުގެ ސިލްސިލާއަށް އިތުރުވި ބޮޅެކެވެ. މި މުބާރާތުގެ ފުރަތަމަ އަށް މެޗުގެ ތެރެއިން އެއްވެސް މެޗެއް ތާވަލުކުރި ގަޑިއަށް ފެށިފައެއް ނުވެއެވެ.

ހަގީގަތުގައި، މިހާތަނަށް ކުޅުނު މެޗުތައް ފަށާފައިވަނީ ކަނޑައެޅިފައިވާ ގަޑިއަށްވުރެ އެވްރެޖްކޮށް ތިން މިނެޓް ލަހުންނެވެ.

މިކަމުގައި އެންމެ ބޮޑު މައްސަލައެއް ދިމާވީ ބުރާސްފަތި ދުވަހު މެކްސިކޯ އާއި ދެކުނު އެފްރިކާ ބައްދަލުކުރި އިފްތިތާހީ މެޗުގައެވެ. އެ މެޗު ފަށާފައިވަނީ ހަ މިނެޓް ލަހުންނެވެ. އަދި ހޮނިހިރު ދުވަހު ގަތަރާއި ސްވިޒަލޭންޑް ބައްދަލުކުރި މެޗު ފަށާފައިވަނީ ގާތްގަނޑަކަށް ފަސް މިނެޓް ލަހުންނެވެ.

މެޗު ފަށަން ކަނޑައެޅި ގަޑިއާ އެންމެ ގާތްކުރާ ވަގުތެއްގައި ފެށުނީ އެންމެ ދެ މެޗެވެ. އެއީ 40 ސިކުންތުގެ ލަސްވުމަކާއެކު ފެށި އޮސްޓްރޭލިއާ އާއި ތުރުކީ ބައްދަލުކުރި މެޗާއި، 51 ސިކުންތު ލަހުން ފެށި ދެކުނު ކޮރެއާ އާއި ޗެކް ރިޕަބްލިކް ބައްދަލުކުރި މެޗެވެ.

މެޗުތައް ލަހުން ފެށެނީ ކީއްވެ؟

މެޗެއް ފެށުން މިނެޓެއް ނުވަތަ ދެ މިނެޓް ލަސްވުމަކީ އާންމު ގޮތެއްގައި މާ ބޮޑު ކަމަކަށް ނުވި ނަމަވެސް، މެޗުގެ ކުރިން ހިނގާ ކަންކަން ވަރަށް ފުރިހަމައަށް ރާވާ ފީފާއިން، މިއީ ރަނގަޅު ކުރަންޖެހޭ ކަމެއްގެ ގޮތުގައި ފާހަގަކުރާނެއެވެ.

ކޮންމެ މެޗަކަށް ވެސް ވަކި ހާއްސަ ތަރުތީބެއް (ރަނިންގ އޯޑަރެއް) ކަނޑައެޅިފައި އޮވެއެވެ. މީޑިއާތަކަށް ވެސް ލިބެން ހުންނަ މި ތަރުތީބުގައި، ޓީމުތަކާއި މެޗު އޮފިޝަލުން ޓަނަލް ސަރަހައްދަށް އެއްވާންޖެހޭ ގަޑިއާއި، ދަނޑަށް އަރަންޖެހޭ ގަޑީގެ އިތުރުން ގައުމީ ސަލާމް ކިޔާނެ ވަގުތުތައް ސިކުންތުން ސިކުންތަށް ބަޔާންކޮށްފައި އޮވެއެވެ.

މި މައުލޫމާތަކީ މެޗު ބްރޯޑްކާސްޓްކުރާ ފަރާތްތަކަށް، ހާއްސަކޮށް އިޝްތިހާރު ފޮނުވާ ފަރާތްތަކަށް، މެޗުގެ ކުރިން ހިނގާ މުހިންމު ކަންކަން ގެއްލުނަނުދީ ދެއްކުމަށް ވަރަށް މުހިންމު މައުލޫމާތެކެވެ.

މިސާލަކަށް، ހައިޓީ އާއި ސްކޮޓްލޭންޑްގެ މެޗުގައި ދެ ޓީމު ދަނޑަށް އަރަން އޮތީ މެޗު ފެށުމުގެ ސީދާ އަށް މިނެޓާއި 40 ސިކުންތު ކުރިންނެވެ.

ނަމަވެސް، އެ ވަގުތު ޖެހުނުއިރު ވެސް ދެ ގައުމުގެ ކުޅުންތެރިން ތިބީ މެޗަށް މުޅިން ތައްޔާރު ނުވެއެވެ. އަދި ފީފާގެ އޮފިޝަލަކު އެ ކުޅުންތެރިން އަވަސްކުރުވަން އުޅޭ މަންޒަރު މެޗުގެ ލައިވް ފީޑުން ފެނިފައިވެއެވެ.

ދެ ޓީމުގެ ކުޅުންތެރިން ޓަނަލުން ނުކުމެގެން ދަނޑަށް ދިޔައިރު، ތާވަލަށްވުރެ 90 ސިކުންތު އޮތީ ލަސްވެފައެވެ. މެޗު ފެށުން ބޮޑުތަނުން ލަސްވި އެހެން މެޗުތަކުގައި ވެސް މައްސަލަ ދިމާވެފައިވަނީ ކުޅުންތެރިން ދަނޑަށް އެރުން ލަސްވުމުގެ ސަބަބުންނެވެ.

މުބާރާތް ބާއްވާ ތިން ގައުމު ކަމަށްވާ މެކްސިކޯ، ކެނެޑާ އަދި އެމެރިކާ ކުޅުނު މެޗުތަކުގެ ކުރިން ހާއްސަ އިފްތިތާހީ ރަސްމިއްޔާތުތަކެއް ބޭއްވުނު ނަމަވެސް، އެ ހަރަކާތްތައް ނިމިފައިވަނީ މެޗު ފެށުމުގެ މާ ކުރިން ކަމަށްވާތީ، އެއީ މެޗު ލަސްވާންޖެހޭ ސަބަބެއް ނޫނެވެ.

އެހެންނަމަވެސް، މެޗު ފެށުމުގެ ކުރިން ބާއްވާ ރަސްމިއްޔާތުތައް ފީފާއިން އިތުރަށް ފުރިހަމަކޮށް ވަރުގަދަކުރުމަކީ މި ލަސްވުމަށް ދިމާވާ ސަބަބަކަށް ވެދާނެއެވެ.

މިހާރު އޮންނަ އުސޫލުގެ ދަށުން، ގައުމީ ސަލާމް ކިޔާއިރު ދަނޑުގެ މެދުގައި ހުންނަ ބުރު (ސެންޓަރ ސާކަލް) އަށް ހަމައެކަނި ފުރަތަމަ އެގާރަ ކުޅުންތެރިންގެ ބަދަލުގައި މުޅި ސްކޮޑް އެއްވާންޖެހެއެވެ. އަދި ދަނޑުގެ ދެ ފަޅީގައި ބޮޑެތި ދިދަތައް ވެސް ދައްކާލައެވެ.

ދުނިޔޭގެ ފުޓްބޯޅައިގެ މައި އިދާރާ، ފީފާއިން ގަބޫލުކުރާ ގޮތުގައި މި ރަސްމިއްޔާތަކީ "އެއްބައިވަންތަކަމާއި، ފަޚުރުވެރިކަމާއި، ޖަޒުބާތީ" ވަގުތުކޮޅެކެވެ. ނަމަވެސް މިއީ އިންތިޒާމުކުރަން އުނދަގޫ އަދި ގިނަ ވަގުތު ހޭދަވާ ކަމެކެވެ.

ޓީމުތަކާއި، އޮފިޝަލުން އަދި އިންތިޒާމުކުރާ ފަރާތްތައް މި އާ އުސޫލުތަކަށް ހޭނެމުންދާ ވަރަކަށް، މި ކަންކަން އަވަސްވެގެންދާނެ ކަމަށް ބެލެވެއެވެ. އެހެންނަމަވެސް، މިއީ މިކަމަށް ހޭދަވާނެ ވަގުތު ފީފާއަށް ކުޑަކޮށް އަންދާޒާ ކުރެވުމުގެ ނަތީޖާއަކަށް ވުމަކީ ވެސް އެކަށީގެންވާ ކަމެކެވެ.