އީރާން ކޯޗު: "ވޯލްޑް ކަޕްގައި އެންމެ ތަކުލީފު ޖައްސާފައިވާ ޓީމަކީ އަހަރެމެން"

ވޯލްޑް ކަޕްގައި ވާދަކުރާ އީރާން ޓީމަށް ދަތުރުފަތުރުގެ ކަންކަމުގައި ފަހު ވަގުތު ހުރަސްތަކެއް ކުރިމަތިކުރުވުމާ ގުޅިގެން، އެ ޓީމަކީ މުބާރާތުގައި އޮތް "އެންމެ ބޮޑަށް ތަކުލީފު ޖައްސާފައިވާ" ޓީމު ކަމަށް އީރާނުގެ ހެޑް ކޯޗު އާމިރު ގަލޭނޮއީ ބުނެފިއެވެ.

ހޯމަ ދުވަހުގެ ރޭ ނިއުޒީލެންޑާ ބައްދަލުކޮށް 2-2 އިން އެއްވަރުވި މެޗަށްފަހު ވާހަކަދައްކަމުން ކޯޗު ބުނީ، އެ ރޭ ލޮސް އެންޖެލެސްގައި މަޑުކުރުމަށްފަހު ޖެހިގެން އައި ދުވަހު ރިކަވަރީ ސެޝަނެއް ކުރިއަށް ގެންދަން ކުރިން ރޭވިފައި އޮތް ނަމަވެސް، މެޗު ނިމުނުތަނާހެން ވަގުތުން މެކްސިކޯގައި ހުންނަ އެ ޓީމުގެ ޓްރޭނިން ކޭމްޕަށް އެނބުރި ދިއުމަށް އަންގާފައިވާ ކަމަށެވެ.

ވޯލްޑް ކަޕްގެ މުއްދަތުގައި އީރާން ޓީމު ބޭސް ކުރަން ކުރިން ހަމަޖެހިފައި އޮތީ އެމެރިކާގެ އެރިޒޯނާގެ ޓޫސަންގައެވެ. ނަމަވެސް ލޮޖިސްޓިކްސް އަދި ވިސާގެ މައްސަލަތަކެއް ކުރިމަތިވުމާ ގުޅިގެން، މެއި މަހުގެ ފަހުކޮޅު އެ ޓީމުގެ ކޭމްޕް ވަނީ މެކްސިކޯގެ ޓިހުއާނާއަށް ބަދަލުކޮށްފައެވެ.

"މެޗު ނިމުމާއެކު އެމީހުން އަހަރެމެން ގާތު ބުނީ ވަގުތުން ފުރަން ޖެހޭނެ ކަމަށް،" ގަލޭނޮއީ ބުންޏެވެ.

"އަހަރެމެންނަށް އަންގާފައިވަނީ ފްލައިޓަށް އަރައިގެން ޓިހުއާނާގައި ހުރި އަހަރެމެންގެ ކޭމްޕަށް އެނބުރި ދިއުމަށް. މިއީ އަހަރެމެންނަށް ކުރިމަތިވި ވަރަށް ބޮޑު ތަކުލީފެއް."

"އަހަރެމެންނަށް މަޖުބޫރު ކުރަނީ މާ އަވަހަށް އެނބުރި ދިއުމަށް. އެމީހުން ދަނީ ކަންކަން އިތުރަށް އުނދަގޫކޮށް، ގިނަ ހުރަސްތަކެއް ކުރިމަތިކުރަމުން. އެކަމަކު އެއްވެސް ކަމަކަށް އަހަރެމެންގެ އެންމެ ރަނގަޅު ކުޅުން ދެއްކުމަށް ހުރަހަކަށް ވިޔަކަ ނުދޭނަން."

މެދުއިރުމަތީގައި ހިނގަމުންދާ ހަނގުރާމައާއި ސަލާމަތީ ކަންކަމާ ގުޅިގެން، ވޯލްޑް ކަޕްގައި އީރާން ބައިވެރިވުމާ މެދު ވަނީ ނުތަނަވަސްކަމާއި އޮޅުންބޮލުންތަކެއް އުފެދިފައެވެ.

މި ނުތަނަވަސްކަން ބޮޑުވެފައިވާ ދަނޑިވަޅެއްގައި، ނިއުޒީލެންޑާ ދެކޮޅަށް ކުޅުނު މެޗަށްފަހު ފީފާގެ ރައީސް ޖިއާނީ އިންފަންޓީނޯ ވަނީ އީރާން ޓީމުގެ ޑްރެސިން ރޫމަށް ޒިޔާރަތްކުރައްވާފައެވެ.

އީރާން ޓީމުގެ ބެކްރޫމް ސްޓާފުންގެ ތެރޭގައި ހިމެނޭ މުހިންމު ބައެއް މެންބަރުންނަށް އެމެރިކާއަށް އެތެރެވުމުގެ ވިސާ ދީފައި ނުވާއިރު، މުބާރާތް ފެށެން ކުޑަތަންވެފައި ވަނިކޮށް އީރާނަށް ދޫކުރި ޓިކެޓްތައް ކެންސަލް ކުރުމާ ގުޅިގެން، އީރާން ފުޓްބޯޅަ ފެޑެރޭޝަނުން ވަނީ ވަކި ފަރާތަކަށް ނުޖެހުމާއި، އިންސާފުވެރިކަމާއި، ކަނޑައެޅިފައިވާ ގަވާއިދުތައް ދެމެހެއްޓުމަށް ފީފާއަށް ގޮވާލާފައެވެ.

ގްރޫޕް ޖީގެ މެޗުތަކުގެ ތެރެއިން ޖޫން 21 ވަނަ ދުވަހު ބެލްޖިއަމާ ދެކޮޅަށް ކުޅޭ މެޗަށް އީރާން ޓީމު އަލުން ލޮސް އެންޖެލެސްއަށް ދާނެއެވެ. އަދި ގްރޫޕްގެ ފަހު މެޗުގައި ޖޫން 27 ވަނަ ދުވަހު ސިއެޓްލްގައި އެ ޓީމު ނުކުންނާނީ މިސްރާ ދެކޮޅަށެވެ. "ތެދަށް ބުނަންޏާ އަހަރެމެން އެނބުރި ފޮނުވާލަނީ ކީއްވެގެން ކަމެއް ނޭނގޭ. މިއީ ވަރަށް އާދަޔާ ހިލާފު ކަމެއް. ހީވަނީ އަހަރެމެންގެ ކަންކަން ރާވަނީ އެހެން ބައެއްހެން،" ގަލޭނޮއީ އިތުރަށް ބުންޏެވެ.

"އަހަރެމެން މެޗުގެ ދެ ރޭ ކުރިން މިތަނަށް އަންނަން އޮތީ، އެކަމަކު އެ ފުރުސަތެއް ނުދިން. އަދި މިރޭ މިތަނުގައި މަޑުކޮށްގެން ރިކަވަރީ ހެދުމަށްފަހު މާދަމާ މެންދުރު ފުރަން އޮތީ."

"އަހަރެން ގަބޫލުކުރާ ގޮތުގައި މުޅި ވޯލްޑް ކަޕްގައިވެސް އޮތް އެންމެ ބޮޑަށް ފިއްތުން ކުރިމަތިކޮށްފައިވާ ޓީމަކީ އަހަރެމެންގެ ޓީމު. އަހަރެމެންގެ ފެޑެރޭޝަނެއް މިތަނަކު ނެތް، މީޑިއާއެއް ނެތް، އަދި މެނޭޖްމަންޓެއްވެސް ނެތް."

އީރާން ޓީމުގެ ކެޕްޓަން މަހްދީ ތާރޭމީ ވެސް ވަނީ ކޯޗުގެ ވާހަކަތަކަށް ތާއީދުކޮށް، އެ ޓީމަށް ކުރިމަތިވެފައިވާ ހާލަތަކީ "ބޮޑު ކާރިސާއެއް"ގެ ގޮތުގައި ސިފަކޮށްފައެވެ.

ފީފާގެ ރައީސް އިންފަންޓީނޯ ޑްރެސިން ރޫމަށް ޒިޔާރަތްކޮށް، ކަންބޮޑުވުންތައް ހިއްސާކުރުމުގެ ފުރުސަތު ދެއްވުމުން އެކަމަށް ތާރޭމީ ތައުރީފުކުރި ނަމަވެސް، އީރާން ގައުމީ ޓީމަށް އެހީތެރިވުމަށް ފީފާއިން މިއަށްވުރެ ބޮޑަށް މަސައްކަތްކުރުމަށް އޭނާ ގޮވާލިއެވެ.

"މިއީ އަހަރެމެންނަށް ރަނގަޅު ގޮތެއް ނޫން. މިއީ ފުޓްބޯޅައަށްވެސް އޮތް ރަނގަޅު ގޮތެއް ނޫން. ސަބަބަކީ ވޯލްޑް ކަޕެއްގައި، ޖެހިގެން އަންނަ މެޗަށް ރަނގަޅަށް ތައްޔާރުވާން ޖެހޭނެ. މިއީ ކުޅުންތެރިންނާއި ސްޓާފުންނަށް ވަރަށް ބޮޑު ސްޓްރެސްއެއް ކުރިމަތިވާ ކަމެއް،" ތާރޭމީ ބުންޏެވެ.

"އެކަމަކު އަހަރެމެންނަށް އެ އެހީތެރިކަމެއް ނުލިބޭ. އަހަރެން ގަބޫލުކުރަނީ ފީފާއިން މިއަށްވުރެ ބޮޑަށް އަހަރެމެންނަށް އެހީތެރިވާން ޖެހޭނެ ކަމަށް."