އީރާނު ޓީމަށް އެމެރިކާގައި ވިސާ މައްސަލަތަކާ ދަތުރުފަތުރު ހުރަސްތައް

2026 ވަނަ އަހަރުގެ ވޯލްޑް ކަޕްގައި ނިއުޒީލެންޑާ ދެކޮޅަށް ކުޅުނު ފުރަތަމަ މެޗަށްފަހު، އީރާނުގެ ގައުމީ ފުޓްބޯޅަ ޓީމަށް އެމެރިކާގައި ދަތުރުފަތުރުގެ އިތުރު މައްސަލަތަކަކާ ކުރިމަތިލާން ޖެހިއްޖެއެވެ. ރިޕޯޓްތައް ބުނާގޮތުން ލޮސް އެންޖެލެސް އެއާޕޯޓުން ޓީމުގެ ކެޕްޓަން މަހްދީ ތަރޭމީ އާއި އެސިސްޓަންޓް ކޯޗު ސައީދު އިލާހޫއީ އަނެއްކާވެސް މަޑުކުރުވައި ލަސްތަކެއް ކުރިމަތިވެފައިވާއިރު، މިޑްފީލްޑަރު މަހްދީ ތުރާބީގެ އެމެރިކާ ވިސާގެ މުއްދަތު އެންމެ ދަތުރަކަށްފަހު ވަނީ ހަމަވެފައެވެ.

އީރާނު ޓީމަށް މި މައްސަލަތައް ކުރިމަތިވީ، އަންގާރަ ދުވަހު ލޮސް އެންޖެލެސްގައި ނިއުޒީލެންޑާ ދެކޮޅަށް ކުޅުނު މެޗު 2-2 އިން އެއްވަރުވުމުން، މެކްސިކޯގެ ޓިހުއާނާގައި ހުންނަ އެ ޓީމުގެ ބޭސް ކޭމްޕަށް އެނބުރި ދިއުމަށް ދަތުރުކުރަނިކޮށެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، އެއާޕޯޓުން ބޭރުވާ ގޭޓު ކައިރިން ތަރޭމީ އާއި އިލާހޫއީއަށް "އެއްވެސް އުސޫލެއް ނެތް ލަސްތަކެއް" ކުރިމަތިވުމުގެ ސަބަބުން، މެޗަށްފަހު ޓީމު ފުރުން ލަސްވެ، ދަތުރުގެ ރޭވުންތަކަށް ވަނީ ބުރޫއަރާފައެވެ.

މި ހާދިސާއަކީ މެޗުގެ ކުރިން އެމެރިކާއަށް އެތެރެވިއިރު ވެސް އެ ދެމީހުންނަށް ކުރިމަތިވި ކަންތައްތަކުގެ ތަކުރާރުވުމެކެވެ. އެ ފަހަރު ވެސް އީރާނު ވަފުދުގެ މެންބަރުން އިތުރަށް ޗެކްކޮށް، ގިނަ ވަގުތުތަކެއް ވަންދެން މަޑުކުރުވާފައިވާ ކަމަށް ރިޕޯޓްތައް ބުނެއެވެ.

އެމެރިކާ، ކެނެޑާ އަދި މެކްސިކޯ ގުޅިގެން ބާއްވާ މި ފަހަރުގެ ވޯލްޑް ކަޕްގައި އީރާނުން ބައިވެރިވުމާ ގުޅޭގޮތުން ވޮޝިންޓަނުން އަމަލުކުރަމުންދާ ގޮތަށް އަމާޒުވެފައިވާ ފާޑުކިޔުންތައް، މި ފަހުގެ ހާދިސާއާއެކު ވަނީ އިތުރަށް ގަދަވެފައެވެ. އީރާނުގެ ކުޅުންތެރިންނަށް ދަތުރުފަތުރުގެ ލިޔެކިޔުންތައް ލިބުނު ނަމަވެސް، ޓީމަށް އެހީތެރިވާ މުހިންމު ބައެއް މުވައްޒަފުންނާއި ފުޓްބޯޅަ ފެޑަރޭޝަނުގެ އޮފިޝަލުންނަށް އެމެރިކާގެ ކަމާބެހޭ ފަރާތްތަކުން ވިސާ ދީފައެއް ނުވެއެވެ.

މި ހުރަސްތަކުގެ ސަބަބުން، އީރާނު ޓީމުން ވަނީ އެމެރިކާގެ ފަސްގަނޑުގައި ހޭދަކުރާ ވަގުތު މަދުކުރުމުގެ ގޮތުން، އެމެރިކާގެ އެރިޒޯނާގެ ޓޫސަންގައި ހަދަން ނިންމި ބޭސް ކޭމްޕް، އަވަށްޓެރި މެކްސިކޯގެ ޓިހުއާނާއަށް ބަދަލުކޮށްފައެވެ.

ވިސާގެ މި މައްސަލަތަކުގެ ސަބަބުން ޓީމުގެ ތައްޔާރީތަކަށް ވެސް ވަނީ ބޮޑެތި ހުރަސްތަކެއް ކުރިމަތިވެފައެވެ.

އީރާނުގެ ރިޕޯޓްތައް ބުނާގޮތުން، އެހެން ކުޅުންތެރިންނަށް މަލްޓިޕަލް-އެންޓްރީ ވިސާ ދީފައިވީ ނަމަވެސް، ތުރާބީއަށް ދޫކޮށްފައިވަނީ އެންމެ ފަހަރަކު އެތެރެވޭ ގޮތަށް އޮތް ވިސާއެކެވެ. ނިއުޒީލެންޑް މެޗަށް ލޮސް އެންޖެލެސްއަށް ދަތުރުކުރުމާއެކު އޭނާގެ ވިސާގެ މުއްދަތު ހަމަވުމުން، ޓީމާއެކު އޭނާއަށް ކުރިއަށް ދެވޭނެ ގޮތް ހެދުމަށްޓަކައި އީރާނު ފުޓްބޯޅަ ފެޑަރޭޝަނުން މިހާރު ދަނީ އާ ވިސާއެއް ހޯދުމަށް މަސައްކަތް ކުރަމުންނެވެ. ނިއުޒީލެންޑާ އެއްވަރުވި މެޗަށްފަހު، ކެޕްޓަން ތަރޭމީ ވަނީ މި ހާލަތަށް ފާޅުގައި ފާޑުކިޔާފައެވެ. އޭނާ ބުނީ މިފަދަ ނުތަނަވަސްކަމުގެ ސަބަބުން ކުޅުންތެރިންގެ ނަފްސާނީ އަދި ޖިސްމާނީ ދުޅަހެޔޮކަމަށް އަސަރުކުރަމުންދާ ކަމަށެވެ.

"އަދިވެސް އަހަރެމެންނަށް ގިނަ މައްސަލަތަކެއް އެބަހުރި،" އޮލިމްޕިއާކޯސް އެފްސީއަށް ކުޅޭ ފޯވާޑް މެޗަށްފަހު ނޫސްވެރިންނާ ވާހަކަދައްކަމުން ބުންޏެވެ.

ތަރޭމީ ބުނީ ވޭތުވެދިޔަ މަސްތަކުގައި ޓީމުން ގިނަ ދަތިތަކަކާ ކުރިމަތިލާފައިވާ ކަމަށާއި، އީރާނުން މި މުބާރާތުގައި ބައިވެރިވުމަށް ކުރިމަތިވެފައިވާ ހާލަތަކީ "ހަގީގަތުގައި ވެސް ބިރުވެރި" ހާލަތެއް ކަމަށެވެ.

"ކުޅުންތެރިންނާއި ކޯޗިން ސްޓާފުންނާއި އެހެން އެންމެންނަށް ވެސް ބޮޑު ސްޓްރެސްއެއް އެބައޮތް. އެކަމަކު އަހަރެމެންނަށް ބޭނުންވާ އެހީތެރިކަމެއް ނުލިބޭ،" އޭނާ ބުންޏެވެ.

އީރާނުގެ ކެޕްޓަން ވަނީ ވިސާގެ ހުރަސްތަކުގެ ސަބަބުން ޓީމުގެ މުވައްޒަފުން މަދުވުމުން ދިމާވާ މައްސަލަތަކަށް ވެސް އިޝާރާތްކޮށްފައެވެ.

ގްރޫޕް ޖީގައި އީރާނުން ކުޅުނު ފުރަތަމަ މެޗުގައި، ލޮސް އެންޖެލެސް ސްޓޭޑިއަމްގައި 70،000 އަށްވުރެ ގިނަ ސަޕޯޓަރުންގެ ކުރިމަތީގައި އެ ޓީމުން ވަނީ ނިއުޒީލެންޑާ ދެކޮޅަށް ވަރުގަދަ ކުޅުމެއް ދައްކާފައެވެ.

މެޗުގެ ހަތްވަނަ މިނެޓުގައި އެލައިޖާ ޖަސްޓް ޖަހައިދިން ލަނޑުން ނިއުޒީލެންޑުން ކުރި ހޯދި ނަމަވެސް، 32 ވަނަ މިނެޓުގައި ރާމިން ރިޒާއިއާން ވަނީ ލަނޑެއް ޖަހައި އީރާނަށް ނަތީޖާ އެއްވަރުކޮށްދީފައެވެ. ދެވަނަ ހާފު ފެށިގެން ކުޑަވަގުތުކޮޅެއްގެ ތެރޭގައި ޖަސްޓް އަނެއްކާވެސް ނިއުޒީލެންޑަށް ލީޑު ހޯދައިދިނެވެ. ނަމަވެސް 64 ވަނަ މިނެޓުގައި ރިޒާއިއާން ތަނަވަސްކޮށްދިން ފުރުސަތަކުން މުހައްމަދު މުހައްބީ ވަނީ ލަނޑެއް ޖަހައި، ނަތީޖާ 2-2 އަށް ބަދަލުކޮށްފައެވެ.

ވާދަވެރި މި މެޗުގައި އީރާނުން ޖެހި އިތުރު ލަނޑެއް އޮފްސައިޑް ކަމަށް ނިންމައި ރެފްރީ ވަނީ ގަބޫލުނުކޮށްފައެވެ.

މެޗުގައި ލަނޑެއް ޖަހައި، ދެވަނަ ލަނޑު ޖެހުމަށް އެހީތެރިވެދިން ރިޒާއިއާން ވަނީ ފީފާގެ މޭން އޮފް ދަ މެޗުގެ މަގާމު ހޯދާފައެވެ.

ގްރޫޕް ޖީގެ އަނެއް މެޗުގައި މިސްރާއި ބެލްޖިއަމް ބައްދަލުކުރި މެޗު 1-1 އިން އެއްވަރުވުމާ ގުޅިގެން، ފުރަތަމަ ބުރު ނިމުނުއިރު މި ގްރޫޕްގައި ހިމެނޭ ހަތަރު ޓީމު ވެސް އޮތީ އެއް ޕޮއިންޓާއެކު އެއްވަރުވެފައެވެ.