ބައެއް ފަހަރު ސަޕޯޓިވް ލޯބިވެރިޔެއްގެ ޒިންމާ ވެސް އަދާ ކުރަން ޖެހޭ: ކެނެޑާގެ ކުރީގެ ބޮޑު ވަޒީރު ޓްރޫޑޯ

އަމިއްލަ ޤައުމަށް ވުރެ ލޯބި އިސް ކުރި ކަމަށް ބުނެ އަމާޒު ވަމުން އަންނަ ފާޑު ކިޔުން ތަކަށް ކެނެޑާގެ ކުރީގެ ބޮޑު ވަޒީރު ޖަސްޓިން ޓްރޫޑޯ ރައްދު ދެއްވައިފި އެވެ.

ޓްރޫޑޫ މިހެން ވިދާޅުވެފައި ވަނީ އެމެރިކާ އާއި ކެނެޑާ އަދި މެކްސިކޯގައި ކުރިއަށްދާ މުބާރާތުގައި، ކެނެޑާ އިން ކުޅުނު ފުރަތަމަ މެޗު ބައްލަވަން ވަޑައި ނުގެން، އެމެރިކާ އާއި ޕެރަގުއޭ ބައްދަލު ކުރި މެޗު ބައްލަވަން ވަޑައިގެންނެވުމުން ގިނަ ބަޔަކު ފާޑު ކިޔަމުން އަންނަ ވަގުތެއްގައި އެވެ.

އެމެރިކާގެ ކެލަފޯނިއާގައި އެމެރިކާ އާއި ޕެރަގުއޭ ބައްދަލު ކުރި މެޗު ބައްލަވަން ޓްރޫޑޯ ވަޑައިގެންނެވީ، އެ މެޗު ފެށުމުގެ ކުރިން އޮތް ރަސްމިއްޔާތުގައި ޓްރޫޑޯގެ ލޯބެރިޔާ ކޭޓީ ޕެރީ ބައިވެރިވާތީ އެވެ. އެ މެޗުގެ ކުރިން އޮތް ރަސްމިއްޔާތުގައި ކޭޓީ ޕެރީ ޕާފޮމަންސް ކުރިއިރު، އެއަށް ފަހު ދެ މީހުން ވަނީ ދަނޑުގެ ވީއައިޕީ ބޮކޮސްގައި މެޗު ބައްލަވަން މަޑު ކުރައްވައިފަ އެވެ.

ކެނެޑާ އާއި ބޮސްނިއާ ބައްދަލު ކުރި މެޗު އެއްވަރުވީއިރު، އެ މެޗު ބައްލަވަން ވަޑައިގެންނެވުމުގެ ބަދަލުގައި ލޯބިވެރިޔާގެ ޕާފޮމަންސް ބައްލަވަން ޓްރޫޑޯ ވަޑައިގެންނެވުމުން އެތައް ބަޔަކު އަންނަނީ ސޯޝަލް މީޑިއާގައި ފާޑު ކިޔަމުންނެވެ. އެގޮތުން ޤައުމަށް ވުރެ، ލޯބި އިސް ކުރީ ކަމުގައި ގިނަ ބަޔަކު ބުނަމުން ގެންދެ އެވެ. 

އެކަމަށް ރައްދު ދެއްވައި އެކްސްގައި ކުރެއްވި ޕޯސްޓެއްގައި ޓްރޫޑޯ ވިދާޅުވީ، ބައެއް ފަހަރު ސަޕޯޓިވް ލޯބިވެރިޔެއްގެ ޒިންމާ ވެސް އަދާ ކުރަން ޖެހޭ ޙާލަތްތައް އަންނާނެ ކަމަށެވެ. އެހެން ނަމަވެސް، ވޯލްޑް ކަޕްގަައި އޭނާ ސަޕޯޓު ކުރަނީ ކޮން ޤައުމަކަށްކަން އެންމެނަށް ވެސް އިނގޭނެ ކަމަށް ވިދާޅުވެ، ޓްރޫޑޯ ވަނީ ކެނެޑާގެ ދިދަ އެ ޕޯސްޓުގައި ހިމަނުއްވައިފަ އެވެ. 

އުމުރުން 54 އަހަރުގެ ޓްރޫޑޯ ވަނީ، 2015 ވަނަ އަހަރުން ފެށިގެން، 2025 ވަނަ އަހަރާ ހަމައަށް ކެނެޑާގެ ބޯޑު ވަޒީރުކަން ކުރައްވައިފަ އެވެ. ބޮޑު ވަޒީރު ކަމުގެ މަގާމުން ޓްރޫޑޯ އިސްތިއުފާ ދެއްވާފައި ވަނީ 2025 ވަނަ އަހަރުގެ މާޗު މަހުގެ ތެރޭގައި އެވެ. ޓްރޫޑޯ އާއި ކޭޓީ ޕެރީ  ލޯބީގެ ގޮތުން ގުޅިފައި ވަނީ ވެސް 2025 ވަނަ އަހަރު އެވެ.