ތުރުކީ ބަލިކޮށް، އޮސްޓްރޭލިއާ އިން ފެށުން ރަނގަޅު ކޮށްފި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕް ޑީގައި ތުރުކީއާ ދެކޮޅަށް ކުޅުނު މެޗުން މޮޅުވެ، އޮސްޓްރޭލިއާ އިން މުބާރާތުގެ ފެށުން ރަނގަޅު ކޮށްފި އެވެ.

ކެނެޑާގެ ބީސީ ޕްލޭސްގައި އާދީއްތަ ދުވަހުގެ ހެނދުނު ކުޅުނު މެޗު އޮސްޓްރޭލިއާ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އޮސްޓްރޭލިއާ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގައި އެވެ.

މެޗު ފަށައިގެން ފުރަތަމަ ހާފުގެ 27 ވަނަ މިނެޓުގައި އޮސްޓްރޭލިއާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އޮސްޓްރޭލިއާ އަށް ޖަހައިދިނީ ނެސްޓޮރީ އިރަކުންޑާ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޕައުލް އޮކޮން އެންސްލާ އެވެ.

އޭގެ ފަހުން ވެސް މެޗުގައި އޮސްޓްރޭލިއާ އިން ވަނީ ރަނގަޅަށް ކުޅެ، އިތުރު ލަނޑު ޖަހަން މަސައްކަތް ކޮށްފަ އެވެ. މެޗުގެ ދެ ވަނަ ހާފުގެ 75 ވަނަ މިނެޓުގައި އޮސްޓްރޭލިއާގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ކޯނޯ މެޓްކާފް އެވެ. 

ގުރޫޕް ޑީގެ ކޮންމެ ޓީމަކުން ވެސް އެއް މެޗު ކުޅެފައިވާއިރު، އެއް ވަނައިގައި އޮތީ އެމެރިކާ އެވެ. ދެ ވަނައިގައި އޮސްޓްރޭލިއާ އޮތްއިރު، ތުރުކީ އާއި ޕެރަގުއޭ އަށް ޕޮއިންޓެއް ލިބިފައި ނުވެ އެވެ. ގުރޫޕް ސްޓޭޖުގައި އޮސްޓްރޭލިއާގެ ދެ ވަަނަ މެޗުގައި ނިކުންނާނީ އެމެރިކާއާ ދެކޮޅަށެވެ. އަދި ފަހު މެޗުގައި ނިކުންނާނީ ޕެރަގުއޭއާ ދެކޮޅަށެވެ.