އިންތިޚާބަށް އަތްބާނަން އުޅެފިނަމަ "ލަޓިބުރި އާއި އޮށްގަލުން" ނަތަންޔާހޫ މަގާމުން ދުރުކުރަންޖެހޭނެ ކަމަށް އިޒްރޭލުގެ ކުރީގެ ބޮޑުވަޒީރު އިހޫދު ބަރަކް ވިދާޅުވެއްޖެ

އިޒްރޭލުގައި ކުރިއަށް އޮތް އާންމު އިންތިޚާބަށް ހުރަސްއެޅުމުގެ ގޮތުން ލުބުނާނަށް ހަމަލާދީ އަސްކަރީ ފިޔަވަޅުތަކެއް އެޅުމަށް ބެންޖަމިން ނަތަންޔާހޫ މަސައްކަތް ކުރައްވައިފިނަމަ، "ލަޓިބުރި އާއި އޮށްގަލުން" އޭނާ މަގާމުން ދުރުކުރަންޖެހޭނެ ކަމަށް އިޒްރޭލުގެ ކުރީގެ ބޮޑުވަޒީރު އިހޫދު ބަރަކް ވިދާޅުވެއްޖެއެވެ.

އާދީއްތަ ދުވަހު ދެއްވި އިންޓަވިއުއެއްގައި ބަރަކް ވިދާޅުވީ، ނަތަންޔާހޫ އިންތިޚާބަށް ހުރަސްއަޅަން މަސައްކަތް ކޮށްފާނެ ކަމުގެ ބިރު އެބައޮތް ކަމަށާއި، އެއީ އޭނާއަށް ވަރަށް ފަސޭހައިން ކުރެވިދާނެ ކަމެއް ކަމަށެވެ. އަދި ނަތަންޔާހޫ އެފަދަ ކަމެއް ކުރަން އުޅެފިނަމަ، ލަޓިބުރި އާއި އޮށްގައު ބޭނުންކޮށްގެން ނަމަވެސް އޭނާ މަގާމުން ދުރުކުރުން ނޫން އިތުރު ގޮތެއް ނޯންނާނެ ކަމަށް ބަރަކް ވިދާޅުވިއެވެ.

އުމުރުން 76 އަހަރުގެ ނަތަންޔާހޫ އިޒްރޭލުގެ މިހާރުގެ ކޯލިޝަން ސަރުކާރުގެ އިސްވެރިއަކަށް ހުންނަވަމުން ގެންދަނީ 2022 ވަނަ އަހަރުގެ ޑިސެމްބަރު މަހުގެ ފަހުކޮޅުން ފެށިގެންނެވެ.

ފަލަސްތީނުގެ ބިންތަކަށް ވެރިވެގަނެ 1948 ވަނަ އަހަރު އިޒްރޭލު އުފެއްދި ފަހުން، އެ ގައުމުގައި މިހާތަނަށް އުފެދުނު އެންމެ ކަނާތު ފިޔައިގެ ހަރުކަށި ސިޔާސަތުތައް ގެންގުޅޭ ޕާޓީއަކީ ނަތަންޔާހޫގެ ލިކޫޑް ޕާޓީ ކަމަށް ސިފަކުރެވެއެވެ.

އިޒްރޭލުގެ ޕާލަމެންޓުގެ މިހާރުގެ ދައުރު 2026 ވަނަ އަހަރުގެ އޮކްޓޯބަރު މަހަށް ހަމަވާއިރު، އާންމު އިންތިޚާބު ބޭއްވުމަށް ލަފާކުރެވެނީ އެ އަހަރުގެ ސެޕްޓެމްބަރު ނުވަތަ އޮކްޓޯބަރު މަހުގައެވެ.

ބަރަކް އިންޒާރު ދެއްވި ގޮތުގައި، ލުބުނާނަށް ހަމަލާދީގެން ނަތަންޔާހޫ "އިންތިޚާބަށް ހުރަސްއަޅައިފާނެ" އެވެ. އެފަދަ ހަމަލާއެއް ދީފިނަމަ، ލުބުނާނުގެ ހިޒްބުالله ޖަމާއަތުން ނުވަތަ އީރާނުން ރައްދު ހަމަލާ ދިނުމަށް މަޖުބޫރުވާނެ ކަމަށް އޭނާ ވިދާޅުވިއެވެ.

ނަތަންޔާހޫ ބޭނުންވަނީ ނިމުމެއް ނެތް ހަނގުރާމައެއް ކުރިއަށް ގެންދަން ކަމަށާއި، އެއީ ހަނގުރާމަ ހުއްޓާލުމާއެކު އޭނާގެ މައްޗަށް ހިނގަމުންދާ ޝަރީއަތްތައް އަވަސްވެގެންދާނެކަން އޭނާއަށް އެނގޭތީ ކަމަށް ބަރަކް ވިދާޅުވިއެވެ.

ނަތަންޔާހޫގެ މައްޗަށް މިހާރު ވެސް ކޮރަޕްޝަނުގެ ދައުވާތަކެއް އުފުލައި ޝަރީއަތް ހިނގަމުންދާއިރު، ޣައްޒާގައި ހިންގަމުންދާ ގަތުލުއާންމުގައި ހަނގުރާމައިގެ ކުށްތަކާއި އިންސާނިއްޔަތާ ޚިލާފު ޖަރީމާތައް ހިންގާފައިވާތީ، 2024 ވަނަ އަހަރުން ފެށިގެން ބައިނަލްއަގުވާމީ ޖިނާއީ ކޯޓު (އައިސީސީ) އިން ވެސް އޭނާ ހޯދަން ބޭނުންވެއެވެ. ޣައްޒާގައި އިޒްރޭލުން ހިންގަމުންދާ އުދުވާނުގައި މިހާތަނަށް 72,000 އަށްވުރެ ގިނަ ފަލަސްތީނު މީހުން މަރުވެ، 172,000 މީހުން ވަނީ ޒަޚަމްވެފައެވެ.

އީރާނަށް ހަމަލާދިނުމާ ގުޅިގެން ނަތަންޔާހޫއަށް ފާޑުވިދާޅުވަމުން ބަރަކް ވިދާޅުވީ، ނަތަންޔާހޫގެ ބޮޑާކަމާއި ދުރުވިސްނުން ނެތުމުގެ އަގު އިޒްރޭލުން ދައްކަން ޖެހިފައިވާ ކަމަށެވެ. އެއީ އީރާނާ ދެކޮޅަށް ކުރި ހަނގުރާމައިގެ އެއްވެސް މަގްސަދެއް ހާސިލުވެފައި ނުވާތީ ކަމަށް އޭނާ ވިދާޅުވިއެވެ.

މީގެ އިތުރުން، ވޮޝިންޓަނާއި ތެހެރާނާ ދެމެދު ކުރިއަށްދާ މަޝްވަރާތަކަކީ އިޒްރޭލަށް "ވަރަށް ގޯސް" ކަމެއް ކަމަށާއި، ކުރިއަށް އޮތް އެއްބަސްވުމުގެ ޒިންމާ އުފުލަންޖެހޭނީ ނަތަންޔާހޫ ކަމަށް ވެސް ބަރަކް ވިދާޅުވިއެވެ.

އީރާނާއި އެމެރިކާއާ ދެމެދު މަޝްވަރާ ކުރެވެމުންދާ ކަންކަމަކީ ފުރިހަމަ އެއްބަސްވުމެއް ނޫން ކަމަށާއި، އެއީ މިސައިލް ޕްރޮގްރާމާއި އީރާނުގެ ސަރަހައްދީ ބައިވެރިންގެ މައްސަލައަށް ހައްލެއް ނުލިބޭ "މެމޮރެންޑަމް އޮފް އަންޑަސްޓޭންޑިން (އެމްއޯޔޫ)" އެއް ކަމަށް ބަރަކް ވިދާޅުވިއެވެ.

އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސްއެންއެސްސީ) ގެ ސެކްރެޓޭރިއަޓުން ހޯމަ ދުވަހު ބުނީ، ހަނގުރާމަ ނިމުމަކަށް ގެނައުމާ ގުޅޭ ފަހުމުނާމާގެ އިބާރާތްތައް ތެހެރާނާއި ވޮޝިންޓަނުން ފައިނަލް ކޮށްފައިވާ ކަމަށެވެ. މީގެ ތެރޭގައި ލުބުނާން ހިމެނޭހެން ހުރިހާ ފްރަންޓެއްގައި އަސްކަރީ އޮޕަރޭޝަންތައް ވަގުތުން އަދި ދާއިމީކޮށް ހުއްޓާލުމާއި، އީރާނާ ދެކޮޅަށް އެމެރިކާއިން ހިންގާ ކަނޑުގެ ބްލޮކޭޑް ނިމުމަކަށް ގެނައުން ހިމެނެއެވެ.

އާދީއްތަ ދުވަހުގެ ރޭ ފައިނަލް ކުރި މި ފަހުމުނާމާގައި ސޮއިކުރުމަށް ހަމަޖެހިފައިވަނީ އަންނަ ހުކުރު ދުވަހު ސްވިޒަލޭންޑުގައެވެ.

މި އެއްބަސްވުމުގެ ދަށުން، ލުބުނާން ހިމެނޭ ގޮތަށް ހުރިހާ އަސްކަރީ ހަމަލާތަކެއް ވަގުތުން ހުއްޓާލެވޭނެ ކަމަށާއި، އީރާނާ ދެކޮޅަށް އެމެރިކާއިން ހިންގާ ކަނޑުގެ ބްލޮކޭޑް އުވާލެވޭނެއެވެ.

މި އެއްބަސްވުން ތަންފީޒު ކުރުމުގެ ތަފްސީލުތަކާ ގުޅޭގޮތުން ފަންނީ އަދި ސިޔާސީ އިތުރު މަޝްވަރާތައް ސޮއިކުރުމަށްފަހު ކުރިއަށްދާނެ ކަމަށް ބެލެވެއެވެ.

އީރާނާ ދެކޮޅަށް އެމެރިކާ އާއި އިޒްރޭލުން އުދުވާން ފަށާފައިވަނީ 2026 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ.

އީރާނުގެ އަސްކަރިއްޔާއިން ވަނީ އިޒްރޭލުން ވެރިވެގަނެފައިވާ ބިންތަކުގައި ހުރި އަމާޒުތަކަށާއި، މުޅި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ކޮންމެ ދުވަހަކު މިސައިލާއި ޑްރޯން ހަމަލާތައް ދީފައެވެ.

މީގެ އިތުރުން އީރާނުން ހުރުމުޒް ކަނޑުއޮޅި ބަންދުކުރުމާ ގުޅިގެން، ދުނިޔޭގެ ބާޒާރުގައި ތެލުގެ އަގާއި ހަކަތައާ ގުޅުންހުރި އެހެނިހެން ތަކެތީގެ އަގު ވަނީ ވަރަށް ބޮޑަށް އުފުލިފައެވެ.