އެމެރިކާ އާއި އީރާންގެ ސުލްޙައިގެ އެއްބަސްވުމަށް ޔޫރަޕިއަން ކައުންސިލް އިން މަރުޙަބާ ކިޔައިފި

އެމެރިކާާ އާއި އީރާންއާ ދެމެދު އެކުލަވާލާފައިވާ އެއްބަސްވުމަށް މަރުޙަބާ ކިޔާ ކަމަށާއި، ދާއިމީ ސުލްޙަ އަށް މަގުފަހި ކޮށްދިނުމަށް ތައްޔާރަށް އޮތް ކަމަށް ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވެއްޖެ އެވެ. 

ޔޫރަޕިއަން ކައުންސިލްގެ ރައީސް ކޮސްޓާ އެކްސްގައި ކުރެއްވި ޕޯސްޓެއްގައި ވިދާޅުވީ، ހޮރްމޫޒް ކަނޑު އޮޅީގައި މިނިވަންކަމާ އެކު ދަތުރު ކުރުމުގެ ފުރިހަމަ މިނިވަންކަން އަލުން ހޯދުމަށާއި، ބޮޑެތި ގެއްލުންތައް ލިބިފައިވާ މި ހަނގުރާމަ ނިމުމަކަށް އަންނާނެ ކަމަށް އުންމީދު ކުރައްވާ ކަމަށެވެ. 

ކޮސްޓާ ފާހަގަ ކުރެއްވި ގޮތުގައި، މިހާރު ހަތިޔާރުތައް ބޭނުން ކުރުން ހުއްޓާލަން ޖެހޭނެ އެވެ. އަދި ދެ ޤައުމުގެ ދެމެދުގައި އޮތް ހުރިހާ ޚިލާފު ތަކެއް ބައިނަލްއަގުވާމީ ގާނޫނާ އެއްގޮތްވާ ގޮތުގެ މަތިން، ސުލްޙަވެރި ގޮތުގައި ހައްލު ކުރަން ޖެހޭނެ ކަމަށް އޭނާ ވިދާޅުވި އެވެ.

ޔޫރަޕިއަން ކައުންސިލްގެ ރައީސް ކޮސްޓާގެ މި ބަޔާނަކީ، އީރާން އަދި އެމެރިކާގެ ދެމެދުގައި ދިގު މުއްދަތަކަށް ދެމިގެން ގޮސްފައިވާ އަދި ހަނގުރާމަ އަށް ހުޅުވުނު ޚިޔާލުތައް ހައްލު ކުރުމަށް ހެދިފައިވާ އެއްބަސްވުމަށް ބައިނަލްއަގުވާމީ މުޖުތަމައުން ކިޔާފައިވާ ފުރަތަމަ މަރުޙަބާގެ ތެރޭގައި ހިމެނޭ ބަޔާނެކެވެ. 

ޔޫރަޕިއަން ޔޫނިއަން އިން ހާމަ ކޮށްފައިވާ ގޮތުގައި، މި ސަރަޙައްދުގައި ދާއިމީ ސުލްޙަ ގާއިމު ކުރުމަށް ބޭނުންވާ އެންމެހާ ދަރަޖައެއްގެ އެހީތެރިކަން ފޯރު ކޮށްދިނުމަށް އެ ކައުންސިލް އިން އޮތީ ތައްޔާރަށްކަން ކޮސްޓާގެ ބަޔާނުން ސާފުވެފައިވެ އެވެ. 

ހޮރްމޫޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގެ ވަރަށް މުހިންމު ސަރަހައްދެކެވެ. މި ސަރަޙައްދުގައި މިނިވަންކަމާ އެކު ދަތުރު ކުރުމުގެ ހައްގު ދެމެހެއްޓުމަކީ ދުނިޔޭގެ އިގްތިސާދަށް ވަރަށް މުހިއްމު ކަމެކެވެ.

އީރާން އާ އެމެރިކާ އާ ދެމެދު އޮތް ޚިލާފު ތަކަކީ މިހާރު ދުނިޔޭގެ ސުލްޙަ އަށް އޮތް އެންމެ ބޮޑު ބިރުވެރި ކަމެއްގެ ގޮތުގައި ބައިނަލްއަގުވާމީ މުޖުތަމައުން ދެކެ އެވެ. މިހެންވެ، މި ދެ ގައުމުގެ ދެމެދުގައި ސުލްޙައިގެ އެއްބަސްވުމަކަށް އައުމަކީ ބައިނަލްއަގުވާމީ މުޖުތަމަ އަށް ލިބުނު ވަރަށް ބޮޑު ހިތްހަމަ ޖެހުމެކެވެ.